الأربعاء، 18 فبراير، 2009

شركة 6 أبريل


بيقولك اتنين من 6 أبريل قابلوا واحد ليبرالي ف الشارع
عرضوا عليه ينضم للحركة
وعشان يشجعوه قالوله الحركة بتضم أي حد
فبعد ما سابهم لقى شركة طالبة شباب جميع المؤهلات راح قدم فيها
الواد الليبرالي قدم ف الشركة وتم قبوله
وبعد كام يوم بدأ العمل بالشركة
كان العمل بيقوم على إدخال بيانات استمارات التموين ف جهاز الكمبيوتر
الشاب الليبرالي وهو بيدخل البيانات فوجىء بناس غريبة جدا
مثلا راجل ف الأرياف مخلف ست عيال أكبرهم متجوز وعاطل وكلهم قاعدين ف بيت واحد
ف خضم عمل الواد الليبرالي بالشركة متعددة الفئات
لقى إن في ناس معاه ف الشغل مؤهلاتهم أكبر من بساطة الشغل
واحد مثلا معاه ماجستير ف الأدب العربي بييجي كل يوم ف معاده يدخل 50 استمارة ف اليوم ولأن الاستمارة ب 26 قرش فهو عمل بالنسباله مربح عشان يقدر يصرف على سجايره اليومية
واحدة تانية حلوة وزي القمر واضح إنها جاية الشغل لهدف آخر حيث تيجي تتعرف على زمايلها الولاد وبتعمل ف اليوم 10 استمارات بس
الواد الليبرالي زهق من العيال إللي ف الشركة لأنهم مختلفين
وزهق من شغل الشركة عشان أي حد معاه إعدادية بيعرف يكتب ع الكمبيوتر يقدر يعمله
وزهق من نفسه عشان بيستسهل ومبيحبش يتعب
العجيب إنه وهو ماشي ف الشارع ف يوم لقى الاتنين بتوع 6 أبريل إللي كلموه من أسبوع واقفين مع صاحب الشركة!

ليست هناك تعليقات: