الأحد، 10 أغسطس، 2008

100 مقالة كلمتين في الجون

Image hosted by servimg.com
كلمتين في الجون

الحمد لله العبد لله عمل 100 مقالة كلمتين في الجون. أنا سعيد جدا جدا. كلمتين في الجون مش مجرد مقالات هبلة والسلام. لا كلمتين في الجون دية مشروع تأسيسي يستمر لسنوات إن شاء الله عشان أوصل لصورة احترافية للعمود بتاعي المزمع تدشينه ف أي جورنان أو مجلة تعرض عليا نشر العمود ده.
كلمتين في الجون كانت ف الأول تحدي بالنسبالي عشان كنت خايف أكتب بالعامية جدا لأني ف الفصحى بقدر أعبر أحسن. المهم حاولت وحاولت والنتيجة كانت مرضية ليا وللمقربين من أصدقائي وللوالدين وبعض الناس إللي معرفهومش. كنت ف الأول بكتبها باختصار وسذاجة. مع الوقت بقيت بكتبها الحمد لله بعمق جيد بيختلف من موضوع لموضوع حسب معلوماتي عنه. لكن كلمتين في الجون فعلا قدرت توصل وجهة نظري ف التعليم والتربية والعلمانية والسلفية والتزبيط باقتدار. ودايما كنت براعي الاختصار فيها تماشيا مع العنوان المحبب. وبحاول دايما أجدد ف مواضيعها وأكتب ف كل حاجة حتى لو طلعت ف مرة ساذجة. بس المهم أحاول وأحاول وأكيد ف وقت حعرف أكتب عن كل حاجة بطريقة مرضية.
أكتر سلسلة مقالات لحد دلوقتي بحبها من كلمتين في الجون هيا سلسلة (فن التزبيط في مصر) لأنها معبرة جدا عن تفكيري وعشان محدش كتب ف الموضوع ده من نفس منظوري العلماني قبل كده. وأكتر مقالة من كلمتين في الجون بحبها هيا (تعدد أنماط التفكير) ف الثبت بتاعي عن السلفية عشان اتكتبت بأسلوب حلو أوي كان مفاجأة ليا عشان أنا وقتها كنت سايب نفسي أكتب براحتي مش ف بالي فكرة المقالة يعني.
وف النهاية أحب من كل من تابع كلمتين في الجون بصورة جيدة إنه يقول رأيه فيها. مميزاتها إيه؟. عيوبها إيه؟ بصراحة ومن غير كسوف أنا ناقد أدبي ومبزعلش من النقد مدام بأدب. إيه رأيكم ف أسلوب كتابتها؟. ف فكرتها؟. ف طولها؟. ف الحاجات إللي اخترتها كأحب المقالات بالنسبة ليا؟. إيه أكتر مقالة عجبتك فيها؟. وإيه أوحش مقالة؟. إيه رأيك ف الكتابة بالعامية فيها خصوصا وعموما؟.

أحمد منتصر
في
جمادى الأولى 1429

هناك 8 تعليقات:

كنكه يقول...

خدعوك يا ضينايا
بجد هما هبل في هبل
يلا يا اخويا انت راخر
استعد للكنكة
هع هع
قولي ياض الوالد والوالدة بيقروهم
يا نهار اسوح
وموافقين ياض
وطالقينك تطرش علينا
انصحك ياض روح كح ام السجاير اللي بتشربها ولاحسة مخك بلا تدوين بلا وجع دماغ
جرنال ايه ي ننوس اللي هيخليك
تكتب فيه
تعالى اكتب في الكنكة يا بابا
هع هع

أحمد منتصر يقول...

حوش يا له !

أحمد عبد الفتاح يقول...

الكتابة أصبحت مهنة من لا مهنة له!

Ihab Omar يقول...

الف مبروك يا احمد .. و واصل الكتابة و باذن الله تعالي سوف تصل الي ما تريد

أحمد منتصر يقول...

الله يبارك فيك يا إيهاب باشا

أحمد عبد الفتاح يقول...

مرة تانية:
الكتابة أصبحت مهنة من لا مهنة له

ADAM يقول...

ألف مبارك عليك يا مونتي

غيبت وغيبتك طولت

وشاكك فيك إنك عملت عملة

ومستخبي ورا الغير معروف

بس لو اكتشفت إن إنت

هعمل فيك زي ماعملوا في سليمان


سلام



آدم

أحمد منتصر يقول...

الله يبارك فيك يا معلمي :)