الأحد، 31 أغسطس، 2008

ثلاث رسائل في الجنس 2

Image hosted by servimg.com
كلمتين في الجون

المثلية الجنسية -1

المثليون عددهم كبير جدا. وهما تلات أنواع: مثليون تامون: ودولا بيبقى موضوعهم الجنسي مقصور على أفراد من نفس نوع جنسهم. بينما أفراد الجنس الآخر مش موضوع جنسي لهم وبيحسوا ناحيتهم بالبرود والنفور. مثليون ثنائيون: ودولا يقدروا يمارسوا الجنس بنفس المتعة مع كلا من الجنسين الذكر والأنثى. مثليون عرضيون: ودولا بقى مثليين بصفة عرضية استثنائية.
والمثليون بيختلفوا عن بعض في تقبلهم لأنفسهم. فمنهم من يتحمس ويتقبل نفسه بصورة طبيعية. ومنهم من يثور ويستغرب نفسه. حالاتهم فيها تغيرات زمنية فمنهم من يتذكر نفسه منذ الصغر مثليا ولم ينجذب قط للجنس الآخر. ومنهم من لاحظ مثليته بعد مرور فترة على بدء المراهقة.
ومنهم من يستمر طوال حياته مثليا. ومنهم من يتوقف ولو توقفا مؤقتا. بس ممكن يرجع مُغاير تاني. وممكن تظهر عليه المثلية ف وقت متأخر من حياته بعد فترة طويلة من ممارسة الجنس طبيعيًا. ولوحظ إن بعض المثليين عنده تذبذب دوري بين كده وكده شوية مثلي وشوية مغاير..يا حلاوة!. وممكن الشخص يقلب مثلي بعد خبرة مؤلمة مع موضوع جنسي مغاير.
طيب ما هي طبيعة المثلية انحلال عصبي ولا مش انحلال عصبي؟. عموما الموضوع مش مهم أوي لإن المسألة خلافية بين أهل الطب النفسي. لكن نقدر نقول إن مثليين كتير مثقفين ومش منحلين عصبيا في عمليات تانية زي العملية الجنسية. والمثلية كانت شيء عادي بين المجتمعات القديمة في أوج تألقها. وكمان منتشرة بكثرة بين السلالات البدائية والمتوحشة ولو حد اعترض على إن مفهوم الانحلال خاص بالحضارات الحديثة المتحضرة فنقدر نقول إن الجو والسلالة ليهم تأثير كبير ف العملية المثلية. يتبع.

أحمد منتصر
في
جمادى الأولى 1429

الجمعة، 29 أغسطس، 2008

ثلاث رسائل في الجنس 1

Image hosted by servimg.com
كلمتين في الجون
مقدمة

العبد لله وهو بيدعبس ف المكتبة بتاعة الوالد لقى كتاب (ثلاث رسائل في الجنس) بتاع فرويد ترجمة الدكتور محمد عثمان نجاتي. وتكمن شهرة هذا الكتاب في إنه أكبر مرجع لآراء فرويد الجنسية الشهيرة وإللي أثارت ضجة ف العالم كله منذ صدور الكتاب عام 1905 بفيينا. حيث قام فرويد بتفسير الجنس في حياة الإنسان بعد الملاحظة المباشرة عن طريق فن التحليل النفسي لكذا حالة دون الوضع ف الاعتبار الآراء البيولوجية عن الجنس المعروفة. فمثلا اعتبر فرويد إن بعض تصرّفات الطفل قبل البلوغ -بل والطفل حديث الولادة- تدخل تحت بند الجنس. والمعروف بيولوجيا إن الجنس بيبدأ ف حياة الإنسان عن طريق النشاط الجنسي بدءًا من فترة المراهقة.
الكتاب كما هو واضح من عنوانه بيتضمن ثلاثة كتيبات. الأولاني عن الانحرافات الجنسية زي المثلية واتخاذ الأطفال والحيوانات كموضوعات جنسية. والتاني عن الجنس عند الأطفال وإللي خلص فيه فرويد إلى إن النشاط الجنسي متوافر برضه عند الأطفال. واتكلم عن العوامل الداخلية والخارجية إللي بتؤثر ف استعداد الأطفال للانحراف. وف التالت اتكلم عن تغيرات المراهقة الجنسية.
وف نهاية المقدمة دية أحب أقول كما قال فرويد إن الكتاب ده مش نظرية كاملة في الجنس. وإن مشكلات جنسية مهمة كتيرة لم يتطرق إليها هذا الكتاب. وإن الكتاب اعتمد على الملاحظة المباشرة إللي لو اعتمدت البشرية عليها مكانش الكتاب ده اتكتب أساسا. وإن أهمية الجنس إللي بيتطرق إليها الكتاب ليس المقصود منها تفسير كل شيء بالجنس. وحتى لو كان الكتاب بيوحي بكده فإن الجنس مثله مثل أي حاجة إنسانية أخرى يجب دراستها بحيادية وعدم الخشية منها.

أحمد منتصر
في
جمادى الأولى 1429

نصائح ذهبية

بعد الحمد لله والصلاة والسلام على رسوله ومصطفاه.

بعد أيام قليلة يهل علينا هلال شهر رمضان بلغنا الله إياه ونحن في أتم صحة وعافية. أعزائي هذه كلمات مختصرات إن أريدُ بها إلا الإصلاح ما استطعت. فمن الملاحظ أنه في كل عام يستقبل الناس رمضان بحماس منقطع النظير يظهر جليا في غص المساجد بالمصلين. والمسارعة في الخيرات كتلاوة القرآن بالمئين. ثم بغتة يتوقفون قبل انتهاء العشر الأوائل من رمضان أو قبيل منتصفه. ولا يُرَوا بعد ذلك إلا ليلة السابع والعشرين.

وهذا يحدث لأسباب أهمها الإعجاب النفس. فالبعض يرى مثلا أنه قد ختم القرآن تلاوة أو قياما مرة في رمضان ثم ينام بجوار تلك الختمة.
والملل. حيث لا يقوى على العبادة الكثيرة إلا من كان قبلها يتعبد بمقدار لا بأس به ولو قليل.

وعلاج الإعجاب بالنفس سهل ولكن يجب المسارعة بالترياق قبيل الهلاك: التذلل لله الملك الجبار المتكبر. من أتته السماوات السبع والأراضين. الغنِي عن عباده أجمعين.

وعلاج الملل سهل كذلك ولله الحمد. ذلك أنّ الدين أنزل للإسعاد. قال تعالى: (ما أنزلنا عليك القرآن لتشقى) سورة طه. وقد لام الله قوما كلفوا أنفسهم فوق الطاقة. ثم انسحبوا من أرض الواقع ناكثين بما ألزموا أنفسهم به: (ورهبانية ابتدعوها ما كتبناها عليهم إلا ابتغاء رضوان الله فما رعوها حق رعايتها) سورة الحديد.

فمتى مَلِلت توقف. ولا أقول لك توقف عن عبادة مفروضة. ففي الأمر مندوحة. والحصيف من ضبط نفسه وحياته وفق دينه دون إهمال أو إملال.

فمثلا: إذا شعرت أنك قد مللت من صلاة التراويح. فصلّ أربعا فقط لمدة ليال حتى تعود إليك همتك العالية.
وإذا شعرت بفتور همتك وأنت تقرأ القرآن. فلا بأس من الاكتفاء ببعض التهليل والتسبيح والتكبير والحمد مقدار الوقت الذي كنت تقرأ فيه من المصحف.

احرصْ في رمضان على العمل الذي ترتاح له. بالطبع لا أطلب منك الاكتفاء به، ولكنْ أكثر منه. إذا كانت همّتك وخفتك في التصدق فأكثرْ من التصدق. زُر اليتامى في بيوتهم. زوّج شابا عفيفا خليقا.

وأخيرا: لا ترهق نفسك في أول رمضان ثم تشكو في آخره. اعلموا أيها الناس أنّ أفضل رمضان هو الليالي العشر الأخيرة. فالاقتصاد الاقتصاد في العبادة. والحذر الحذر من تلبيس إبليس لك بفوات الحسنات الكبار من يديك. فرُبّ مقتصد في أول رمضان هو مجتهد في آخره. خير من متعجل بنزق في أوله هو ألعبان في آخره.

هذا..وبالله التوفيق.
وصلّ اللهم وسلم على عبدك ورسولك محمد.

المرجع: كتاب (لا تحزن) للدكتور عائض القرني.

أحمد منتصر
في
شعبان 1428

الاثنين، 25 أغسطس، 2008

الليبرالية باختصار

Image hosted by servimg.com
كلمتين في الجون

الليبرالية تقوم على حرية الفرد أو الحرية الشخصية وده أصل مقدس فيها. بعد كده تتضمن الليبرالية تلات حاجات: العلمانية وهيا سياسيا يعني فصل الدين عن الدولة وأبرز مظاهرها عدم تطبيق الحدود الشرعية. أما فرديا فممكن يكون العلماني ملحد دينيا أو مسلم برضه وشرحنا مقامات حكم الإسلام ف العلماني ف مقالة: الإسلام والدولة العلمانية آنفا. وممكن يكون متدين ف حتت معينة على نفسه بس من صلاة وصوم وعبادة وكده. ومن أشهر ما ذهب إليه العلمانيين هو حرية المرأة والاختلاط والاستنساخ وجواز السكنى خارج كوكب الأرض وإن أصل الإنسان مش آدم عشان ثبت عندهم إن الإنسان البدائي مكنش سوي الخلقة.
الديمقراطية وهيا بتقوم على تقبل الآخر واحترام رأيه. وإن الأغلبية تحكم. حتى لو مكانتش ملتزمة دينيا بعكس وجهة نظر الأصوليين العنصريين إللي معندهمش ديمقراطية لإن لازم الدولة تكون دينية عندهم. وعلى المستوى الفردي الديمقراطية بتنفع الواحد ف العمل والعلاقات العامة لأن الناس حتحبك لأنك بتحترمها وبتسمع لها. والليبراليين هم أحب الناس لأصحاب المذاهب المختلفة.
الرأسمالية بقى نتيجة للعلمانية والديمقراطية. بنطبق ده بقى ع الاقتصاد فيما يُعرف باقتصاد السوق الحر. ودعه يعمل دعه يمر. يعني بنسمح بتعدد رؤوس الأموال داخل الدولة. والدولة لا تتدخل بشكل كامل ف الاقتصاد. والرأسمالية مرفوضة عند الأصوليين تطبيقيا عشان البنوك التي تتعامل بالفوايد ربا محرّم عندهم.

أحمد منتصر
في
جمادى الأولى 1429

الخميس، 21 أغسطس، 2008

حفل توقيع العدد الثاني من مدونات مصرية للجيب

تتشرف دار اكتب بدعوة سيادتكم لحضور حفل توقيع العدد الثاني من سلسلة مدونات مصرية للجيب وذلك بساقية الصاوي بالزمالك في تمام الساعة السابعة ولمدة ساعتين
السبت القادم
Image hosted by servimg.com
العبد لله أنا وطارق عميرة حنجمع ونطلع من طنطا ع الساعة 4 كده نتشرف بمصاحبة كل من يرغب بالحضور من المدونين والقراء
Image hosted by servimg.com

السبت، 16 أغسطس، 2008

جديد شهر أغسطس

أحلام نارية
رواية
محمد إبراهيم محروس
بعشرة جنيهات
Image hosted by servimg.com
أطياف الصمت
شعر
شيماء سمير
بسبعة جنيهات
Image hosted by servimg.com
سلك شايك
قصص
مراد ماهر
بسبعة جنيهات
Image hosted by servimg.com
واحد ماشي
مسرحيات
محمود سلام
بسبعة جنيهات

سلسلة حكايات الأشباح
1) الزئبق الأحمر
علا بركات
بسبعة جنيهات
ثمة ترقب
وبقليل من السرعة في الزحف يمكننا الانفلات
نص روائي
محمد الطناحي
بعشرة جنيهات
أماكن توزيع إصدارات دار اكتب بطنطا:
- المكتبة القومية الحديثة بشارع القاضي بجوار عبد الفتاح مرزوق
- مكتبة الأندلس بشارع المديرية
- بتاع جرايد محطة القطر
- بتاع جرايد شارع أبو فريخة بجوار المساحة
- مكتبة العز وراء سينما مصر
أو
من موزع الدار بطنطا
أحمد منتصر
0107241813
بخصم جنيه على كل كتاب

الجمعة، 15 أغسطس، 2008

سبب ولع الكتاب بالتدخين

Image hosted by servimg.com
كلمتين في الجون

التدخين بيخلي الواحد مسترخي. وده شيء مهم جدًا لأي كاتب: الهدوء والاسترخاء. يعني مثلا الطبيعي بتاع أي مدخن إنه يدخن 10 سيجارات يوميًا تقريبًا. فلو دخن كل ساعة وربع سيجارة يبقى بيخلو بنفسه ف مكان هادي كل ساعة وربع يوميًا من 7 إلى 10 دقائق. وده بيدي فرصة للتفكير وإعمال الذهن ف القضايا المحيطة. وف أفكار المقالات الجديدة. وف مراجعة أحداث اليوم وكده.
لذا فصعب على الكتاب دونا عن بقية خلق ربنا من المدخنين إنهم يبطلوا تدخين لأنه بيساعدهم على الكتابة والاسترخاء. لدرجة إن بعض الكتاب بيعتقد إن السيجارة شريك له ف كتابة معظم أو أغلب كتاباته!.

أحمد منتصر
في
جمادى الأولى 1429


الخميس، 14 أغسطس، 2008

حلم ما بعد الجنس

Image hosted by servimg.com
كلمتين في الجون

ف رواية (يوتوبيا) الصادرة مؤخرًا عن دار ميريت. جابر المثقف فكريًا العشوائي اجتماعيًا كان بيردد الكلمة دية كتير أوي ف مذكراته (حلم ما بعد الجنس). وده شيء المفروض الجميع يهتم بيه. أي تقديم الاهتمام بالعاطفة على حساب الجنس. المراهقين بيهتموا بالجنس بصورة كبيرة جدًا. وده شيء فسيولوجيًا عادي جدًا وطبيعي مفهوش إزعاج. لكن لازم المراهق يُحد من التصرفات إللي بيعملها ودافعها شهوته بطيش. يعني ميتحرّش ببنت ف الشارع. ميمارسش العادة السرية بشراهة. ميتفرجش على مواد جنسية كتير. كده.
أما الإنسان الراشد فبيلاقي إن شهوته قلت وبقى يقدر يتحكم فيها بسهولة عن فترة المراهقة. وطبعًا مش بنقلل من ضرورة الجنس ف حياة الراشدين. لكن بنقول إن أي راشد لازم يقدم عاطفته على رغبته الجنسية. يعني ميرتبطش بواحدة لمجرد إن جسمها لذيذ. ميُسرفش ف قضاء حاجته الجنسية وبعد فوات الأوان يلاقي إن حياته صارت كالمانيكان حلوة من برّه ووحشة ومقرفة من جوه!.
وده لإن العاطفة لما بتشبعها بتكون دافع كبير لمواصلة الحياة والنجاح فيها والإقبال عليها. لذلك تلاقي كل إللي بيحبوا ومرتبطين ولو ف فترة المراهقة ناجحين ف حياتهم المهنية. وعلى استعداد إنهم يكدوا ويتعبوا عشان حبايبهم. لذلك الارتباط ف فترة المراهقة نقدر نوعّي المراهقين بيه فيكون سبب لسعادتهم وانطلاقهم لكن التحذير منه بإفراط فده شيء غلط تمامًا. كمان إشباع العاطفة بيمنع الاكتئاب وبيفيد الجسم صحيًا.

أحمد منتصر
في
جمادى الأولى 1429

الأحد، 10 أغسطس، 2008

100 مقالة كلمتين في الجون

Image hosted by servimg.com
كلمتين في الجون

الحمد لله العبد لله عمل 100 مقالة كلمتين في الجون. أنا سعيد جدا جدا. كلمتين في الجون مش مجرد مقالات هبلة والسلام. لا كلمتين في الجون دية مشروع تأسيسي يستمر لسنوات إن شاء الله عشان أوصل لصورة احترافية للعمود بتاعي المزمع تدشينه ف أي جورنان أو مجلة تعرض عليا نشر العمود ده.
كلمتين في الجون كانت ف الأول تحدي بالنسبالي عشان كنت خايف أكتب بالعامية جدا لأني ف الفصحى بقدر أعبر أحسن. المهم حاولت وحاولت والنتيجة كانت مرضية ليا وللمقربين من أصدقائي وللوالدين وبعض الناس إللي معرفهومش. كنت ف الأول بكتبها باختصار وسذاجة. مع الوقت بقيت بكتبها الحمد لله بعمق جيد بيختلف من موضوع لموضوع حسب معلوماتي عنه. لكن كلمتين في الجون فعلا قدرت توصل وجهة نظري ف التعليم والتربية والعلمانية والسلفية والتزبيط باقتدار. ودايما كنت براعي الاختصار فيها تماشيا مع العنوان المحبب. وبحاول دايما أجدد ف مواضيعها وأكتب ف كل حاجة حتى لو طلعت ف مرة ساذجة. بس المهم أحاول وأحاول وأكيد ف وقت حعرف أكتب عن كل حاجة بطريقة مرضية.
أكتر سلسلة مقالات لحد دلوقتي بحبها من كلمتين في الجون هيا سلسلة (فن التزبيط في مصر) لأنها معبرة جدا عن تفكيري وعشان محدش كتب ف الموضوع ده من نفس منظوري العلماني قبل كده. وأكتر مقالة من كلمتين في الجون بحبها هيا (تعدد أنماط التفكير) ف الثبت بتاعي عن السلفية عشان اتكتبت بأسلوب حلو أوي كان مفاجأة ليا عشان أنا وقتها كنت سايب نفسي أكتب براحتي مش ف بالي فكرة المقالة يعني.
وف النهاية أحب من كل من تابع كلمتين في الجون بصورة جيدة إنه يقول رأيه فيها. مميزاتها إيه؟. عيوبها إيه؟ بصراحة ومن غير كسوف أنا ناقد أدبي ومبزعلش من النقد مدام بأدب. إيه رأيكم ف أسلوب كتابتها؟. ف فكرتها؟. ف طولها؟. ف الحاجات إللي اخترتها كأحب المقالات بالنسبة ليا؟. إيه أكتر مقالة عجبتك فيها؟. وإيه أوحش مقالة؟. إيه رأيك ف الكتابة بالعامية فيها خصوصا وعموما؟.

أحمد منتصر
في
جمادى الأولى 1429

السبت، 9 أغسطس، 2008

مستقبل مهنة التصحيح اللغوي

Image hosted by servimg.com
كلمتين في الجون

الواحد مندهش جدا من حال كل من يكتب بالعربية ومش بيستعين بمصحح لغوي ماعن أخطاؤه بالجملة: المدرسين الخصوصيين ف المذكرات بتاعتهم. بتوع الدراسات العليا ف رسايلهم. الكتاب إللي بينشروا ع النت ف المنتديات أو مدوناتهم. المحامين. الجرايد المحلية. الخطاطين ووكالات الإعلان. القنوات الفضائية.
ومع الوقت المهنة دية مفيش إقبال عليها إلا من قبل المترجمين من اللغات الأخرى للعربية. وده بيدل على عدم الاهتمام بالعربية. أو من قبل بتوع الأزهر ودار العلوم لا لشيء إلا إنهم لما خلصوا دراسة نظامية لقوا إنهم كويسين ف العربي فاشتغلوا مصححين لغويين.
واحد يقوللي: نسيت بتوع آداب عربي. هأو يا خويا!. دولا لما بيخلصوا دراسة مش لازم يبقوا ف العربي كويسين. وأنا قلت قبل كده إني أعرف واحد ف تالتة آداب عربي بيجيب جيد ومبيفهمش ف التصحيح اللغوي. لأن المهنة دية عاوزه تدريب الأول. واحتكاك بإللي هما أكتر منك خبرة فترة من الزمن وتوافر المراجع. وسَعة الاطلاع على القرآن والتراث العربي. والصبر على مراجعة المادة المراد تصحيحها كذا مرة. وطبعا أهم حاجة حفظ القواعد.
المهم لازم يبقى فيه اهتمام بالعربية يا جماعة. ولازم نهتم بالمصححين اللغويين وندربهم. يعني زي ما في دورات تدريبية لتعلم اللغات الأجنبية نعمل دورات ف النحو والبلاغة والإملاء. آه مش عيب لأن الدراسة النظامية مش كافية. كمان لازم الجهات والناس إللي ذكرناهم ف أول المقالة لإما ياخدوا دورات كويسة ف العربي لإما يستعينوا بمصححين لغويين.

أحمد منتصر
في
جمادى الأولى 1429

الجمعة، 8 أغسطس، 2008

السياج السلفي حول العقل

Image hosted by servimg.com
كلمتين في الجون

عندما كنت سلفيا كانوا يحذروننا نحن المراهقين من الحدادين خصوصا أنّ بدء أمرهم كان من طنطاويّ مثلنا وهو محمود الحداد. ومن المخالفين للسلفيين عموما. وهذا التحذير أو الوصاية على عقلي كانت في أول الأمر تريحني وتبعث في نفسي الطمأنينة. ثم ضجّتْ النفسُ بهذا السياج الفكريّ حول العقل. وأخذتُ أطلب العلم عند الحدادين أنفسهم. والحدادون لمن لا يعرفهم هم سلفيون ولكن متشددون أكثر دينيا واجتماعيا. لهم نظرة جديرة بالاهتمام إلى من يدعونهم السلفيون بالسلف الصالح. فمثلا قال الحدادون بتكفير أبي حنيفة ولديهم أدلتهم. ولكن بدلا من أن يفتح السلفيون -وهم الجماعة الأعرق والأكثر عددا وانتشارا- الباب للحوار مع الحدادين؛ أغلقوه.
صاروا كدأبهم يحذرون منهم كما يحذرون من السماع لسائر مخالفيهم. المهم أني بعد مخالطتي للحدادين شهرًا وبحثي في كتبهم ومراجعهم لم أقتنع بطريقتهم. ولكنه اقتناع ناجم عن قناعة شخصية بعد معرفتي بالآخر يفرقُ كثيرا عن قناعة مسبقة غيبية يعتقنها أغلب السلفيين عن الآخر أيا كان مذهبه أو مرجعيته.
هذا..على الرغم من أن ابن تيمية نفسه كان دارسًا وعالمًا بدين النصارى، وكان يجادلهم ويذكر لهم نصوصا يحفظها من كتبهم. ولمّا ناظر عالما شافعيا قال له الشافعي: ما تقوله ليس عندنا. فأفحمه ابن تيمية قائلا: أنا أعلم بكتبكم منكم!. أو كما رُويت القصة. وهذا يدل على أن ابن تيمية نفسه وهو من هو عند السلفيين كان عليما بالآخر بأدلته وبكتبه ومراجعه. ولم يكن يرجم عنهم بالغيب.
وارجعْ إلى ما كتب ابن تيمية عن النصارى تجده يستشهد بما ورد في كتبهم. والسلفيون الآن الذين يحذرون من القراءة في الفلسفة أو المنطق أقول لهم: كيف ذلك وابن تيمية ألف بنفسه كتاب (نقض المنطق) وهذا يعني أنه قد درس المنطق دراسة وافية؟.
يقول السلفيون للمراهق الصغير الذي يأتم بهم: أنت لست على دراية كافية بالأصول. لذا لا يمكنك النظر في كتب مخالفينا خشية أن يلج باطلهم إلى قلبك فتنتكس!. اتركوه. فهذه الوصاية والسياج الغشيم على العقل يبعث على الجهل وكره الآخر وعدم الانخراط في الحياة الاجتماعية. ولكن السلفيين يأبون الواقع. ويتعاملون على أنهم الكثرة الحاكمة وهم قلة. بل أشك أنهم إن داوموا على مثل هذه التحذيرات سيغدون القلة.

أحمد منتصر
في
جمادى الأولى 1429

الخميس، 7 أغسطس، 2008

دولة للسلفيين في مصر

Image hosted by servimg.com
كلمتين في الجون

أقترح إقامة دولة للسلفيين في مصر زي الفاتيكان كده. وده لإراحتهم وإراحتنا. دولة ليست طبعا بالمعنى الشائع. يعني مثلا نديهم منطقة توشكى أو أي حتة صحراوية لأن أكتر من 90% من مساحة مصر غير معمورة. ونبقى ناخد منهم ضرايب زي أي مواطن مصري. وهما يقدروا يمارسوا شعائرهم الدينية من صلاة وعبادة وأمر بالمعروف ونهي عن المنكر وحتى يقدروا يطبقوا الشريعة من قطع يد السارق وجلد شارب الخمر وقطع رقبة القاتل والمرتد وتارك الصلاة ومانع الزكاة مع نفسهم!.

أحمد منتصر
في
جمادى الأولى 1429

الأربعاء، 6 أغسطس، 2008

اضحك على السلفيين ج2


- بيقولك واحد سلفي قابل واحد سلفي لابس قميص وبنطلون فقاله: إيه التبرج إللي إنت فيه ده!؟.
- بيقولك واحد سلفي أمن الدولة مسكه عشان لقى ف بيته الـ(نووي)!.
- قال الشيخ حسين يعقوب: مينفعش المنتقبة تقف ف الشارع مع راجل حتى لو كان أخوها! ما أصل الناس حتعرف منين إن هو أخوها؟.
- واحد سلفي قابلوه بعد الانتكاس وكان لابس خاتم دهب ف إيده فقالهم: لو أعلم شيئا أكثر حرمانية منه للبسته!.

الثلاثاء، 5 أغسطس، 2008

شفت في الحلم عجبا

شفت في الحلم عجبا

في مسجدٍ للسلفيينَ بالصّدفةِ. وقد اصطفوا كما الملائكةِ حول الشيخ. الذي بجانبه فتاةٌ بيضاءُ بخمار على كرسيّ تتهيأ للترتيل. وأنا في آخر المسجدِ تحدوني رغبة بالبكاءِ خاصّة عقب سماعي لموسيقى ناعمةٍ خفيةٍ أفكرُ: عندهم تيسيرٌ! ضاعَ مني الخيرُ بمخالفتِهم.
أخرجُ من المسجدِ. أألفُ محلَ لِبٍّ مجاور نصفَ مغلق. أمدُّ يدي وأقبضُ على حباتِ لِبٍّ ولا أتورّعُ. آكلها وأنا أعبرُ الشارعَ. يخرجُ أبي بعدي في كامل أناقتِه. ألاحظ شابة غيداءَ صبوحًا تعبرُ بيننا. لا أنظر إليها أكثرَ من مَرّةٍ لبرودي. أسمعها تنادي أبي وبلكنتها عُجمة: السلام عليكم! فين القصر؟. فأشار إلى سيارةِ أجرةٍ قادمة وقال: اركبي العربية دي! وأنا مالي أنا بالقصر؟. يقول نصف العبارة الأخير بطبقةِ صوتٍ أعلى زاعقة. ألتفتُ ساخرًا وأضربُ كفا بكفٍ. وأفكر: أيترك أحدًا مثل هذا القمر؟. الغيداءُ تعوجُ ضبّها. وانتهى الحلمُ.

أحمد منتصر
في
شعبان 1429

الاثنين، 4 أغسطس، 2008

قفص اسمه أنا

Image hosted by servimg.com
العبد لله ألفَ رواية بلدياتنا العزيزة رباب كساب في مكتبة اسمها القومية الحديثة ف شارع القاضي مع سعد الدين جنب ميدان الساعة ناحية محطة القطر بطنطا. فحبيت أترك انطباعاتي عقب قراءة كل كام فصل من هذه الرواية إللي سمعت عنها كلام حلو خصوصا إن رباب بتقرا مدونتي فأحب أكتب حاجة تهمها. وعموما الروائي بيبقى نفسه حد يقعد معاه ويتكلم عن كل تفصيلة ف روايته لدرجة الملل وده طبعا مفيد للروائي للوقوف على نقاط الشد والجذب والضعف والإثارة ف كتاباته. فلنبدأ:
الفصل (1):
أسلوبك زي ما هو سلس وجميل ومشوق. كثرة أسماء الشخصيات أربكتني ومحفظتش طبعا ولا اسم منها إلا اسم صفاء لأني من الكلام إللي سمعته عن الرواية عرفت إن صفاء هيا البطلة. عموما كثرة الشخصيات ف الراوية -أي رواية- بيدي فرصة للقارىء إنه يتعاطف ويندمج مع أحب الشخصيات أو أقربهم إليه خصوصا إذا كان هناك ف الشخصيات تباين ف السيكولوجيات. في أخطاء لغوية معرفش ليه كل دار نشر مبتشغلش عندها مصحح لغوي متمرس؟. لسه قاري برضه رواية إنجيل آدم بتاعة محمد علاء الدين الطبعة الأولى ومليانة على تمة عينها أخطاء لغوية ماعنها رواية قصيرة.
الفصلان (2-3):
عجبتني أوي حكاية فتحي مع البت ميادة الحقودة دية وبعدين لما صفاء صدقته بعد افتراء ميادة عليه ودور صفاء الإيجابي في اعتذار أبو ميادة لفتحي ف الآخر. قعدت أضحك من الاستمتاع والإثارة والنقطة دية حلوة إنك يا رباب عرفتي تقنعينا بعلاقة فتحي وصفاء القوية منذ وقت مبكر ف الرواية لسه.
أما تمرد صفاء وكده فده شيء عجبني برضه لأني بحب البنت المتمردة ولقيت تشابه بين شخصيتي وشخصية صفاء فشكلي كده حستمتع بالشخصية الرئيسية ف الرواية. يا بختي!.
الفصلان (4-5): بحب أنا قصص الحب دية وبقعد أقول حتى لو بشوف فيلم حب: يا سلام!. مممم متهيألي بعد كده عماد حيحب صفاء فصفاء ما تصدق بحيث يتجوّزها ويبعدها عن جو الحارة إللي هيا فيه ده. حنشوف.
الفصلان (6-7): أيوه يا رباب أحسن حاجة فيكي أسلوبك. عجبتني الجملة دية أوي على لسان صفاء (إنت مالك بتتكلم زي الناس المتواكلين إللي دايما باصين لروحهم إنهم ف أحسن حال رغم إن هما مش كده؟ ومن جواهم عايزين الأحسن لكن مش قادرين والآخر يقولوا كلمتين زي إللي قلتهم بالضبط).
كمان عجبتني حكاية ذكر شارع المديرية بطنطا أحب أنا القصص الأدبية إللي طنطا بتيجي فيها. عشان بحس إني جزء من الحكاية. فما بالك إن أنا كمان ف حقوق زي صفاء وفتحي؟. الندرة فعلا من طلبة حقوق زي صفاء أنا برضه لقيت إني صعب أتعين ف النيابة فرحت لمحامي قريبنا أتدرب عنده أيام ما كنت ف أولى أو تانية. لكن كنا ف الصيف بقى والدنيا حر أوي خصوصا إن أسانسير مجمع المحاكم ضيق ولو وكيل نيابة جيه بيركب لوحده!. فكنا بنطلع السلالم طالع نازل ونرجع هلكانين وكل ده عشان نخلص ورق وأختام وندفع رسوم ف الخزنة. فتعبت وبعدين جيت أرجع أتدرب تاني أتاري المحكمة بتاخد أجازة ف شهر أغسطس هع هع.
الأغلبية من طلبة حقوق بقى زي فتحي. يعني لو قلنا دفعة سنة رابعة عددها ألفين طالب. يبقى 200 واحد وواحدة بس زي صفاء لإما عايزين يطلعوا محامين لإما راسمين على نيابة. ويبقى الباقي كله واخدها شهادة وخلاص وللهروب من التجنيد.
الفصلان (8-9): (إنها ببساطة كلمة واحدة دائما تفسر نفسها وينهار إلى جوارها كل منافس حتى ولو كان حبيبا إنها كلمة (أنا)) حلوة الجملة دية ومعبرة عن عنوان الرواية. الزمن المادي إللي إحنا فيه خلى مشاعرنا نحو الآخرين بقت مزيفة. فإللي فاكرنا بنحبه بنكون بنستغله ولو مصدر تميزه راح حنهجره.
أحداث الرواية ف رأيي كتيرة. بتعرفي تعبري عن أحاسيس المرأة كويس جدا وبتفكريني بإحسان عبد القدوس. مش عارف أخلص الرواية بسرعة لأني بقرأ فصلين فصلين وأقعد أفكر فيهم.
الفصول (10:15): هيه!. ده اسمه الإخلاص لفن الرواية إنتي كتبتي كل الكلام ده إمتى يا رباب؟. رواية طويلة.. بس لذيذة. الفِقرة دي عجبتني (لم يكن ينقصها في تلك الرحلة سوى فتحي. ولكن صفاء أمرت أن تظل مع صفاء، وطالما هي أمرت فأمرها واجب التنفيذ، لأن الأنا لديها أسمى من أي شيء فصفاء لصفاء مهما حدث).
هممممم مكنتش متخيل إن فتحي هو إللي يطلب من صفاء تسيبه لكن هو أثبت إنه راجل فعلا وأنا حبيت فتحي جدا من خلال تأمل الموقف ده. وبكده أكون حبيت الشخصية الرئيسية من كام فصل. وأهوه حبيت كمان شخصية لها دور كبير ف الرواية بفضل موقفه الإنساني النبيل.
حلوة الفِقرة دية معبرة على لسان أيمن (هذا يا دكتور لأنك من الزمن الجميل، زمن العواطف والحب والصداقة، أما الآن فلا شيء من هذا. لم يعد هناك سوى المصلحة والطموح والرغبة، ولم تعد هناك امرأة تقنع بكونها زوجة وأمًا بل هي تطلب أكثر من هذا ألف مرة وإني لأجزم أن بداخل كل امرأة صفاء أخرى تريد التمرد على حياتها نفسها دون إفساح مجال للآخرين في دنياها).
طيب إحنا كده وصلنا لمنتصف الرواية لحد دلوقتي الرواية بالنسبالي واقعية جدا ومعبرة ومؤثرة. مساعدة الناس لصفاء سواء كانوا الأهل أو المحامي أو الدكتور حاجات معادتش كتيرة ف الزمان ده. المفروض ناخد بإيد كل مبدع ومجتهد ونوصله ونسهل عليه الصعوبات. ده غير كذا موقف إنساني ف الرواية الملآنة بالمواقف النبيلة التي تصلح لأن تكون مواقف تربوية مفيدة للجميع.
الفصول (16:النهاية): (نسيت إن الحب هو أهم وأجمل ما في الوجود، إن لازم نضحي بالغالي والرخيص عشانه مش نضحي بيه) على لسان صفاء جامدة جدا الجملة دية. لما فتحي مات الواحد دمع وكده وفعلا حس بندم صفاء على كل السنين إللي ضاعت منها بعيد عن حبيبها.
طيب التقييم النهائي بقى:
- الأسلوب: قلنا سلس وجميل وبسيط. تمام.
- العنوان: موفق جدا.
- اللغة المستخدمة بأسلوب تقريري تتخلله بعض التشابيه والتصاوير جيدة.
- التعبير عن العاطفة أجدتِ فيه وعلى الأخص التعبير عن مشاعر الأنثى المتمردة الكتوم.
- الحوار بالعامية عند رباب كساب لا يقل روعة عن سردها بالفصحى.
- فكرة العمل تقليدية. ولكن واقعية.
- المعالجة جيدة جدا.
إذن العمل جيد جدا. مبارك عليكِ نجاح الرواية يا رباب.

أحمد منتصر
في
جمادى الآخرة 1429