الأحد، 27 يوليو، 2008

سذاجة التفكير الديني

Image hosted by servimg.com
كلمتين في الجون

تكمن سذاجة التفكير الديني ف إنه بيعتمد على النقل والأدلة المأثورة وبيبني عليها حاجات يرجع المتدينون يقولك دي صحيحة عقليا. وهيا صحت عندهم عقليا بس عشان ثبتت عندهم بالنقل ليس إلا. وبعدين يتكلموا ف حاجات غيبية اعتمادا على أدلة نقلية. يقولك عذاب قبر ومش عارف إيه. وإن مخالفيهم ف النار.
غير إنهم بيتكلموا بمناهج نزلت من آلاف السنين وعبثت بها تطبيقات الإنسان الخطاء فتميعت وتجمدت عند فترة تاريخية معينة.
خد عندك موقف المرأة ف الإسلام. الإسلام قالك الأنثى ليها نص حظ الذكر من الميراث لو كانوا ف درجة متساوية من الميت. وإن المستحب للمرأة المكث بالبيت. وإن المرأة تنتقب أو تلبس خمار ولبس واسع. وإن المرأة مينفعش تتجوز بإرادتها لازم موافقة ولي أمرها. وإن المرأة لازم تسمع كلام جوزها لأنه ولي أمرها. وإن المرأة شهادتها بنص شهادة الرجل. وإن المرأة مينفعش تتجوز أربعة زي الراجل.
فموقف الإسلام من الأنثى عموما هو التهميش. جيه بقى تطبيق الإنسان زوّد الطين بلة. قالك إيه؟. قالك مفيش توريث للأنثى وده حاصل عند المسلمين ف المجتمعات القبلية وصعيد مصر. وقالك مدام المرأة لازم تسمع كلام جوزها فجوزها لما يستغل الموقف وميسحمش بخروجها تسمع كلامه. والحجاب مش بس بقى نقاب أو خمار لا ده امتد إلى عقل المرأة بحيث بنلاقي ترحيب كبير من النساء بلبس الحجاب ماعنه ضد الفطرة عشان مفهوش مساواة للمرأة بالرجل ومفهوش حرية للمرأة وبتترتب عليه حاجات كتيرة جدا ف الجنس والشغل والتعليم والدراسة والاختلاط بين الجنسين. وبنات كتير بتتمنع من استكمال التعليم عشان تنتقب وتقعد ف البيت. وكما هو معروف 50% من سكان مصر أميين أغلبهم من الإناث.
بالنسبة للجواز فولي أمر المرأة بيتحكم ف إللي هيا عايزه تتجوزه سواء كان زميلها ف الشغل أو ف الدراسة. بحيث يخليها تتجوز واحد غني أو واحد عاجبه هو. وده تحدي صريح لحرية الإنسان ولما الواحد بيتكلم فيه بنلاقي المتنطعين جعجعوا وصرخوا ماعن زي ما من حق الراجل يختار زوجته بنفسه من حق برضه البنت تختار زوجها بنفسها. بالنسبة لإن شهادة المرأة بنص شهادة الرجل فالناس حرّفوها وبقى لا يؤخذ برأي الأنثى ف البيت أو ف الشغل أو ف التعيين كقاضية. ويقولك كلمة الراجل هيا إللي تمشي وده تخلف ورجعية وعنصرية شديدة. وأخيرا بالنسبة لإمكان زواج المرأة من أربعة زي الراجل. أولا أنا مش مع تعدد زوجات الرجل. لكن نقطة تعدد الزوجات دية ف الإسلام خلت الراجل يحس إنه مسموحله الجنس وحرام على المرأة. وده بيظهر في إمكانية إن الولد يمارس الجنس قبل الزواج بينما البنت لا يمكن ويقولك حرام وقلة أدب ومعرفش إيه. القيود مخففة على الواد ولو مارس بنكبر دماغنا. بينما البنت هيا المجرمة والفاجرة وبنت الكلب.
دي بس عينة من سذاجة التفكير الديني ف قضية واحدة زي قضية المرأة وهيا قضية مهمة جدا لتقدم الأمم عشان أقل حاجة الإناث نص السكان فلو اهتمينا بيهم حنبقى طفرنا بنص السكان بضربة واحدة للأمام.

أحمد منتصر
في
رجب 1429

هناك 14 تعليقًا:

أحمد عبد الفتاح يقول...

انت ناقل الكلام على سبيل التريقة على صاحبه ولا على سبيل التأكيد عليه
لو انت ناقله على سبيل التريقة فأوك
انما الكارثة انك تبقى مقتنع بالهبل ده

أحمد منتصر يقول...

قناعة...

محمود حسين يقول...

على فكرة يا مونتى المناهج القديمة اللى انت بتتكلم عليها دة القرآن الكريم والقرآن يصلح لكل زمان ومكان
وكمان الكلام اللى انت كاتبة عن مكانة المرأة فى الاسلام دة كلام مش صح راجع معلوماتك
المرأة مش مهمشة دى كات مهمشة قبل الاسلام والاسلام خلى ليها شخصية مستقلة عن الرجل وخلى ليها ذمة مالية مستقلة

أحمد منتصر يقول...

حودة حبيب قلبي

ما كل الناس بتقول الإسلام نصر المرأة

فين الأدلة على كده؟

أحمد عبد الفتاح يقول...

المفترض اني هنا ف مدونة محترمة
علشان كده مش هطول لساني بشكل مش مقبول..!
مع انى بجد متغاظ منك دلوقتي بشكل لا تتخيله
علشان ما أبقاش لسه مقنع واحد ملحد ازاى الاسلام نصر المرأة وتطلعلي انت المسلم وتتكلم الكلام الأهبل ده

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
mahmoud hussein يقول...

يا مونتى راجع مكانة المرأة فى الاسلام فى كتاب الشريعة اللى عندك بتاع السنادى

Ma7moud So3ody يقول...

انت مع الاسلام ولا ضد الاسلام يا منتصر؟
الاسلام لما عمل للمرأه نص الميراث كان لأن المرأه مش بتتكفل بالمصاريف زي الرجل.. شهادة الرجل على المرأه مغلبه لأن حضرتك عارف ان المرأه بتغلب عليها العاطفة و بالتالي حكم اتنين من النساء هيكون موازن الى حد ما من الرجال


بص يا منتصر علشان تريح نفسك

ماتبصش لترصفات الغوغاء عندنا وتقول هو ده الدين و تعارضه

الاسلام حجه على الجميع ، وليس أحد حجه على الاسلام
شيخ الازهر لو انت شفته بيعصي ربنا ده مش معناه ان المعصية بقت حلال


الدين ضاع مننا يا احمد لأن اننا عاوزين نحكمه
و الاصل ان هو اللي يحكمنا في اطاره


الاسلام لا يتجزأ.. اقبل الدين كله
وافهمه صح

أو ابعد عنه و ريح دماغك

لأنك مش هينفع تكون مسلم... بس تنقي وتعترض علي اللي يعجبك او لأ

ياريت يكون عندك حماس للمناقشه و الفهم

تحياتي لصراحتك

أحمد جمال يقول...
أزال أحد مشرفي المدونة هذا التعليق.
أحمد جمال يقول...

الجميل يا أخ منتصر أنك بتقول على نفسك ليبرالي .. ودا شيء انا شايف انه من حقك طبعاً .. لكن الأجمل بقا أنك بتمارس كل حاجة تثبت أنك مش ليبرالي خالص ..

بالمناسبة يا أخ .. تعرف يعني ايه ليبرالي ؟

miada ref3at.. يقول...

لا حول ولا قوة الا بالله..
ده على كده نسيب ديننا خالص ونمشى على القوانين اللى انت بتقول عليها دى..

يعنى الحقيقه انا مش عارفه اقوللك ايه الكلام تاه من الكلام اللى بتقوله ده..

رجاءً أخ منتصر ..الدنيا دى ربنا سبحانه وتعالى خلقهالنا بقوانين..
مينفعش احنا بقى البشر اللى منساويش حاجه نتعدى القوانين دى..حتى لو فيلسوف عظيم من الفلاسفه..

الدين مفيهوش فلسفه يا اخ أحمد..
ولما نيجى نفتى فى ديننا يبقى ستوب..
خوفاً عليك من غضب ربنا سبحانه وتعالى صدقنى..

ديننا يسر وليس عسر..
شوف الايام والحياه بتثبت فعلاً ان الحجاب ده هو أكبر تكريم للمرأه..
كويس قوى انك تتفرج على شويه فيديو كليب وعلى شويه عرى وتقول حسبى الله ونعم الوكيل..دول عالم متخلفه..

الدين اللى انت بتدَّعى انه تخلف ده والقرآن الكريم بيقول حاجات بتحصل دلوقتى والكلام ده متقال من آلاف السنين..

عيب قوى لما ناس أجانب عن دجيننا بيحترموه وألاقى شخص ربنا مأنعم عليه بنعمة الاسلام ويقول كلام زى ده..

رجاءً ثم رجاءً ابحث فى عراقة النبى صلى الله عليه وسلم وازاى الاسلام قدر يقف على رجليه..
ويبقى دين سماحه وتكريم..

ولى عوده..

غير معرف يقول...

المشكلة إنك واخد الدين من تطبيقنا ليه .. و مش راضى تفرض إن ممكن يكون تطبيقنا ليه غلط ، و بتفتخر بإنك مش ملتزم دينياً كانها شئ يفتخر بيه ، ما تقول إنك لادينى و خلاص و تريح نفسك ، و حتفضل محسوب علينا مسلم بالبطاقة

و واضح من كلامك إن إنت مش مقتنع بكلامك من جواك عشان كدة عمال تكرر نفس المواضيع و تجاهر بإنك ليبرالى و تؤيد الحرية الجنسية إلى أخر أفكارك الغريبة ..
الأعجب و الأغرب إنك بتقوم بتأريخ مقالاتك بالتاريخ الهجرى اللى هو تاريخ دينى إسلامى بالأساس و لا تستخدم التاريخ الميلادى الأكثر إنتشاراً...
مش أعرف أسمى ده تناقض فى الافكار و لا رغبة فى التميز و الاختلاف؟؟؟ ياريت إنت تقولى عشان أفهمك أكتر .
h.a