الأربعاء، 30 يوليو 2008

المحيط

Image hosted by servimg.com
المحيط

كثيرًا ما أتصَوّرُ نفسي بَطلا يقفزُ في الهواءِ ويُكسّرُ الطواحينَ بسيفِه البتار. يُمْنة ويُسْرَى. أعلى وأعلى. ولا أنظرُ أبدًا تحتي.
بالأمس كان صديقٌ لي يتباهَى بفحولتِه وكثرةِ ما نكحَ من النساءِ. وكان الجميعُ يومِىءُ له يُعْجَبُ بكلامِه. فكرتُ: أمّال أنا الذي لا أعرفُ إلا صديقتين عزيزتين. وأتحرز من التعرفِ بفتاةٍ جديدةٍ. وأتقبلُ الآخرَ. لمَ تتكالبُ عليّ الطواحينُ؟...

أحمد منتصر
في
رجب 1429

الأحد، 27 يوليو 2008

سذاجة التفكير الديني

Image hosted by servimg.com
كلمتين في الجون

تكمن سذاجة التفكير الديني ف إنه بيعتمد على النقل والأدلة المأثورة وبيبني عليها حاجات يرجع المتدينون يقولك دي صحيحة عقليا. وهيا صحت عندهم عقليا بس عشان ثبتت عندهم بالنقل ليس إلا. وبعدين يتكلموا ف حاجات غيبية اعتمادا على أدلة نقلية. يقولك عذاب قبر ومش عارف إيه. وإن مخالفيهم ف النار.
غير إنهم بيتكلموا بمناهج نزلت من آلاف السنين وعبثت بها تطبيقات الإنسان الخطاء فتميعت وتجمدت عند فترة تاريخية معينة.
خد عندك موقف المرأة ف الإسلام. الإسلام قالك الأنثى ليها نص حظ الذكر من الميراث لو كانوا ف درجة متساوية من الميت. وإن المستحب للمرأة المكث بالبيت. وإن المرأة تنتقب أو تلبس خمار ولبس واسع. وإن المرأة مينفعش تتجوز بإرادتها لازم موافقة ولي أمرها. وإن المرأة لازم تسمع كلام جوزها لأنه ولي أمرها. وإن المرأة شهادتها بنص شهادة الرجل. وإن المرأة مينفعش تتجوز أربعة زي الراجل.
فموقف الإسلام من الأنثى عموما هو التهميش. جيه بقى تطبيق الإنسان زوّد الطين بلة. قالك إيه؟. قالك مفيش توريث للأنثى وده حاصل عند المسلمين ف المجتمعات القبلية وصعيد مصر. وقالك مدام المرأة لازم تسمع كلام جوزها فجوزها لما يستغل الموقف وميسحمش بخروجها تسمع كلامه. والحجاب مش بس بقى نقاب أو خمار لا ده امتد إلى عقل المرأة بحيث بنلاقي ترحيب كبير من النساء بلبس الحجاب ماعنه ضد الفطرة عشان مفهوش مساواة للمرأة بالرجل ومفهوش حرية للمرأة وبتترتب عليه حاجات كتيرة جدا ف الجنس والشغل والتعليم والدراسة والاختلاط بين الجنسين. وبنات كتير بتتمنع من استكمال التعليم عشان تنتقب وتقعد ف البيت. وكما هو معروف 50% من سكان مصر أميين أغلبهم من الإناث.
بالنسبة للجواز فولي أمر المرأة بيتحكم ف إللي هيا عايزه تتجوزه سواء كان زميلها ف الشغل أو ف الدراسة. بحيث يخليها تتجوز واحد غني أو واحد عاجبه هو. وده تحدي صريح لحرية الإنسان ولما الواحد بيتكلم فيه بنلاقي المتنطعين جعجعوا وصرخوا ماعن زي ما من حق الراجل يختار زوجته بنفسه من حق برضه البنت تختار زوجها بنفسها. بالنسبة لإن شهادة المرأة بنص شهادة الرجل فالناس حرّفوها وبقى لا يؤخذ برأي الأنثى ف البيت أو ف الشغل أو ف التعيين كقاضية. ويقولك كلمة الراجل هيا إللي تمشي وده تخلف ورجعية وعنصرية شديدة. وأخيرا بالنسبة لإمكان زواج المرأة من أربعة زي الراجل. أولا أنا مش مع تعدد زوجات الرجل. لكن نقطة تعدد الزوجات دية ف الإسلام خلت الراجل يحس إنه مسموحله الجنس وحرام على المرأة. وده بيظهر في إمكانية إن الولد يمارس الجنس قبل الزواج بينما البنت لا يمكن ويقولك حرام وقلة أدب ومعرفش إيه. القيود مخففة على الواد ولو مارس بنكبر دماغنا. بينما البنت هيا المجرمة والفاجرة وبنت الكلب.
دي بس عينة من سذاجة التفكير الديني ف قضية واحدة زي قضية المرأة وهيا قضية مهمة جدا لتقدم الأمم عشان أقل حاجة الإناث نص السكان فلو اهتمينا بيهم حنبقى طفرنا بنص السكان بضربة واحدة للأمام.

أحمد منتصر
في
رجب 1429

الخميس، 24 يوليو 2008

آسف على الإزعاج

Image hosted by servimg.com
فيلم رائع. وجبة سينمائية متميزة. أصلا أنا بعشق حد اسمه أحمد حلمي. بس فعلا أحمد حلمي طور أوي أداؤه التمثيلي. بقى ممثل مرعب فعلا. حلمي ف الفيلم م الأول كده عامل شخصية جامدة ومحبكاها أوي. ومفيش إفيهات كتيرة زي أغلب أفلامه السابقة سطحية الموضوع. مزهقتش لأن الفيلم فيه كافة عناصر النجاح: الكاميرا الرشيقة الحلوة. الشخصية الجديدة إللي أحمد حلمي بيقدمها بإتقان بالغ. محمود حميدة ودلال عبد العزيز ومتابعة تمثيلهم الاحترافي. اللوك الجديد بتاع منة شلبي كانت زي القمر بجد. حضور محمد شرف القوي جدا ما عنه متحركش من على كرسي القهوة.
العبد لله اتصل بأبو السيد ف البيت قالولي نايم. نزلت الشارع رايح لمصطفى عبدو قابلته ف الشارع. عرضت عليه دخول الفيلم الليلة. ضحك مني (مش ضحك عليا!) وقاللي: يا عم ادفع فلوس الرحلة الأول!. قصده رحلة السافاري إللي طالعة قريبا.
سيبك منهم. فلطالما أردت دخول السينما لوحدي. التذكرة بخمستاشر جنيه. دفعتهم راضيا ماعنهم مرتب تلات تيام شغل ف محل الموبايلات (موضوع ممكن أحكيه بعدين). دفعتهم ودخلت عرض السواريه بتاع عشرة ونص بسينما ريفولي. سينما كده نضيفة أول مرة أدخلها شكلي حدخلها بعد كده علطول إلا لو حمود عزمني كالعادة مجانا ف سينما مصر هع هع.
عمو أبو كشاف (حلوة عمو دية بتفكرني بواحدة بنت عزمتني على سينما قبل كده!) نورلي النور وقاللي: كل سنة وإنت طيب!. إديته نص التذكرة التاني هع هع. وقلتله: مفلس والله!. وصدقتُ. قعدت ورا واد وموزة لكن الحمد لله قاموا عشان أعرف أضحك براحتي. القاعة بقى إيه لول مكيفة ولوز. والكرسي مريح جدا وممكن يرجع لورا وييجي لقدام. العيب الوحيد إن التدخين ممنووووووووع. كنت مولع سيجارة كوكو معفنة عشان معييش فلوس أجيب علبة سجاير تكساس الجديدة النضيفة الرخيصة. لكن حتى مستمتعتش بالكوكو. قاللي عمو: التدخين ممنوع!. روحت عملت حركة مكنتش أتخيل إني حعملها ف حياتي المجيدة: رميت السيجارة وأنا لسه ف نصها!!.
لا لا بس الأيام دية الواحد مهيص ناس تعزم عليه ف المحل بميريت وناس بروزمان. حاجة تخليك متبطلش تدخين بصراحة. عموما الواحد بيقلل وف طريق التبطيل. كنت الأول بشرب علبة ف اليوم. وطبعا لإني مادي معفن قلت لا ده كده يعني خمسين جنيه ف الشهر سجاير (لأني طبعا مش حجيب كل يوم!).
فرّغت نفسي للفيلم: أحمد حلمي قام بأداء المشاهد التراجيدية بحرفية بالغة. ف منتصف الفيلم كده بدأنا نلاحظ مشكلة حلمي إنه وحيد وأمه مجنناه. لكن ف نهاية الفيلم الأحداث اتقلبت زي فيلم كده رضا كده لما قلب ف الآخر بوليسي.
عموما فيلم جامد جدا وأنصحكم بدخوله..طلعت أول واحد من السينما بعد انتهاء الفيلم واكتشفت إني وحيد!...

أحمد منتصر
في
رجب 1429

السبت، 19 يوليو 2008

عيوب الحجاب

Image hosted by servimg.com
كلمتين في الجون

الحجاب العادي: الإيشارب. الأنثى لما بتلبسه تبدأ متهتمش بشعرها. البعض منهم بيبالغ ف تقصيره لدرجة الكاريه أو إنها تعمله زي الرجالة. والبعض منهم من كتر ما بتغطي شعرها وبتبقى لفاه تحت الإيشارب خصلاته بتضعف وتبدأ تموت لإنه لازم يتعرض للهواء النقي مش جو المطبخ المحتقن أو جو البيت عموما إللي مفهوش تيارات هوا.
ولما بتلبسه الأنثى بتبدأ متهتمش بجسمها ورشاقته. فتبدأ تتخن وتتخن. وده مبيهمهاهش خصوصا لو كانت متجوزة!. وعموما أغلب المحجبات بتلبس واسع.
ولما بتلبس الحجاب بتبدأ تصرف على لبسها أكتر عشان لازم تجيب طقم مناسب للون الطرحة. وده لو فقيرة يعني. عشان لو الطرحة عاجباها حتجبلها طقمين تلاتة. ده غير الميكاب إللي لازم يكون مناسب مع لون الطرحة. يعني مصاريف زيادة وخلاص. بعكس غير المحجبة إللي كل لما تقلع أكتر توفر أكتر خصوصا ف اللبس النهاري.
المحجبة بتصرف على مزيلات العرق والبرفانات والكلام ده أكتر من البنت العادية غير المحجبة. ده غير إنها مبتهتمش تشيل شعر جسمها الزائد ف الساقين والدراعين والكلام ده فلما تيجي تركب تاكسي ولا حاجة تقرف أوي.

أحمد منتصر
في
رجب 1429

الخميس، 17 يوليو 2008

ثقافة الكبت الجاهلي

Image hosted by servimg.com
كلمتين في الجون

المقالة دية مش مناسبة لعيون ناس كتير. إنها مقالة قليلة الأدب أخي الكريم هع هع:
زمان أيام ثانوي كان العيال عشان يشوفوا سكس يروحوا لإما سايبر لإما عند واحد منهم عنده القمر الأوروبي ف البيت. وكان الراجل لما يقفش واحد بيشوف سكس ع النت يقفل الجهاز ويزعقله ويمشيه. وكنا زمان بنشتكي لبعضينا من الكبت. فلا نعرف بنات. وحتى البنات إللي معانا ف الدروس الخصوصية مش عاوزين يمشوا معانا. ولا عمر واحد فينا باس بنت. ولا..الهوا.
والمضحك إني وأنا بفتكر الأيام الكئيبة دية أضحك عشان كان منتهى أملنا نمشي مع بنت ونمسك إيدها. حاجات بريئة يعني العالم المتقدم تعارف عليها خلاص. ومكانش حد بيوجهنا خالص من الكبار إزاي نواجه شهوتنا العارمة في هذه السن الحرجة. مفيش إلا رجال الدين بأفكارهم النيرة كانوا يقولولنا إننا أصلا عصاة عشان بننظر إلى البنات. وإنما ينبغي على الشاب المسلم الملتزم غض بصره. فإن لم يستطع فعليه بالصوم والمكث بالبيت!.
المثير إننا كنا مقتنعين جدا بكلام المسجد. لكن لما نروح النادي يوم الخميس بالليل نتحول إلى مردة وشياطين نقعد نلصق ف البنات ونبعبص فيهم ونجري.

أحمد منتصر
في
رجب 1429

الأربعاء، 16 يوليو 2008

غياب الإستراتيجية التعليمية في مصر

Image hosted by servimg.com
كلمتين في الجون

التعليم في مصر واضح فيه كذا أزمة. ويرجع ده إلى عدم التطوير المستمر ليه. ولعلنا ف هذه الكلمات القصيرات نوضح بعض أزماته: منها غياب الإستراتيجية التعليمية وده بيرجع إلى غياب الرؤية المستقبلية إللي حطتها ثورة 52 للمستقبل. فشوية اشتراكية. وشوية رأسمالية. وشوية مهلبية. وبعدين كل وزير تعليم سواء عالي أو مش عالي ييجي يعملك مؤتمر تعليمي ويعملوا ضجة ومعرفش إيه وف النهاية نطلع بقرارات أقل ما توصف به هو العبط. زي إلغاء السنة السادسة الابتدائية. ثم إعادتها في تلاعب مخيف بالعملية التعليمية يتسم بالتهريج. برضه زي أزمة الثانوية العامة إللي صنعوها بإيديهم. ما كل كلية تعمل اختبار لكل طالب حابب ينضم إليها وخلاص. نجح فيه يدخلها منجحش فيه خلاص يشوف كلية تانية.
ومنها تعدد أشكال التعليم في مصر. تعليم أزهري. تعليم عادي حكومي. تعليم أجنبي. كوسة بمعنى الكلمة. وده بيأثر على المدرسين إللي بيطلعوا بعد كده يدرسوا للطلبة لأن كل واحد دارس بطريقة مختلفة على رأي دكتور جابر عصفور فمثلا مدرس اللغة العربية إللي اتخرج من دار العلوم له رؤية مخالفة لزميله خريج كلية اللغة العربية جامعة الأزهر وزميله خريج آداب عربي وزميله خريج تربية عربي. كل واحد له رؤية معينة حيروح يجربها بعد كده ع الطلبة والعب العب.
ومنها التلقين والتحفيظ وده أشهر عيب ف التعليم المصري بس هل الجميع فاهم يعني إيه تلقين وتحفيظ وإيه البديل الصحي ليه؟. التلقين والتحفيظ ده شيء جميل جدا للأطفال الكتاكيت خالص إللي أقل من سبع أو تمن سنين كده. لإنه بيبقى مش مستوعب المعلومة إللي بتديهاله فبتضطر تحفظه. لكن بعد المرحلة العمرية دية العقل بيتكون وبيبدأ يدرك ويعي فلو الطفل استوعب المادة المدروسة هو من نفسه حيعرف يعبر عنها بأسلوبه من غير تلقين وتحفيظ. وده بيفتح مجالات واسعة جدا للإبداع والتطور الذاتي. وعشان كده برضه لما نعرف إنه واحد رسب ف مادة عشان مش حاببها نعذره لإنه مش حاببها يعني مستوعبهاش. مش نقوله بقى احفظها صم واقعد سمعها لنفسك لأ ده غلط.

أحمد منتصر
في
رجب 1429

الثلاثاء، 15 يوليو 2008

أزمة البطالة والحكومة الذكية

Image hosted by servimg.com
كلمتين في الجون

بشأن أزمة البطالة الحكومة وجدت حل أخيرا ليها. هو مش حل واقعيا بس هما مسميينه كده. الحل إنهم يقللوا من عدد الطلاب الجامعيين. لأن مفيش سوق عمل تستوعبهم. وده حيكون بزيادة المصاريف وده تم تدريجيا من كام سنة. أنا مثلا ما عني انتظام كنت بدفع خمسين جنيه ف السنة. دلوقتي بقوا 150 جنيه فما بالك بطلبة انتساب؟.
وإنهم عملوا اختبارات شفهية أو عن طريق الكمبيوتر للي رماهم التنسيق ع الكليات. حاجة زي اختبارات الكليات الحربية والشرطة كده. وطبعا ده بيفتح باب مفتوح أصلا للرشوة والواسطة وخلافه.
أنا ف رأيي الشخصي من سنوات إن التعليم الجامعي جاف وبيعتمد على الحفظ زي تعليم المدارس. وبالذات الكليات الأدبية النظرية. يعني مثلا أعرف واحد ف آداب عربي هو ف تالتة دلوقتي. بيجيب جيد. تمام كده؟. لا يا أخويا مش تمام لأني أنا إللي مدرستش عربي أكاديميا زيه أحسن منه ف التخصص بتاعه!. وده على الرغم من إني مستوايا متوسط للأمانة. يعني م الآخر الواد ده أستيكة ولو عايز يشتغل بتخصصه ده لازم يدرس بجد م الأول تاني.
علميا: طبعا التعليم الجامعي مهم. حتى لو ف الكليات النظرية ده شيء مختلفناش عليه. لكن سوق العمل ف مصر دلوقتي مبتاخدش غير المتخصصين. أصحاب الحرف. الشباب إللي دارس لغة وكمبيوتر كويس. الأوائل على دفعاتهم. إللي معاهم رأسمال يبدؤوا بيه حياتهم العملية. وغيرهم من المتميزين. وده شيء طبيعي طبعا لكن الطبيعي كمان إن الناس العاديين يلاقوا هما كمان شغل مناسب. وبمرتب مناسب كمان.
يعني لو إنت معاك بكالوريوس تجارة الطبيعي (لو كان عندنا سوق عمل طبيعي) إنك تلاقي شغلانة محاسب بـ500 جنيه علطول. لكن قلة رؤوس الأموال خلت فرص العمل محدودة للغاية بعكس عدد الطلاب الجامعيين المتزايد سنة عن سنة لدرجة إننا بقينا بنلاقي خريجين صيدلة وطب بشري مش لاقيين شغل!. وده شيء كئيب جدا. عشان كده يا أولاد الحكومة قررت تريحكم وبدل ما تبقوا حملة مؤهلات عليا عاطلين حتبقوا حملة ثانوية عامة عاطلين برضه. ويا محلاها الحكومة الذكية!.

أحمد منتصر
في
جمادى الأولى 1429

الاثنين، 14 يوليو 2008

الريس عمر وكابتن هيما

العبد دخل من ليلتين فيلمي الريس عمر حرب وكابتن هيما. طبعا للي ميعرفوش وعايشين ف العز أغلب سينمات الأقاليم العرض بتاعها فيلمين والتذكرة بتبقى مخفضة. عموما دخلت كالعادة مجانا مع حمود. آخر مرة دفعت فيها تمن تذكرة سينما كانت ف إسكندرية من سنة!. يخليك ليا يا حمودي يا كتكوتي.
Image hosted by servimg.com

في البدء كان الريس عمر حرب. مكنتش متحمس أوي للموضوع بالرغم من اعترافي بإثارة سينما خالد يوسف. الفيلم أول ما بدأ تلاقيه بيشدك من أول لحظة. خالد صالح عامل دور الشرير الطيب وهاني سلامة قاعد يروي. وف النص تدخل ما بينهم شخصيات زي سمية الخشاب وغادة عبد الرازق. الفيلم هع هع فيه مناظر بنت كلب أوي حتى أنا كنت بنتبه ف نصها وأقول: إيه ده؟ ده فيلم عربي!. عشان متعودين نشوف الحاجات دية ف الأجنبي بس. عموما بما إني من دعاة الحرية الجنسية فالمناظر دية مفيدة لكسر تابو الجنس تدريجيا عندنا ف مصر. خالد يوسف عرض شخصية الريس عمر حرب باختلاف تقليدية الشر إللي اعتدنا عليها ف أفلامنا زي دور الشر إللي قام به أحمد زاهر ف كابتن هيما. عمر حرب تلاقيه بيبرق كده يقوم يحرك مكنة القمار ويخلي النرد يقف ع الرقم إللي هو عاوزه ويخوف الكلاب قدرات خارقة يعني بدئت من أول نص ساعة ف الفيلم قلت إزاي والفيلم واقعي؟. الفيلم مشوق جدا كعادة خالد يوسف ف أفلامه. بس حين ميسرة عملي إشباع عاطفي وصدمة أكتر. لكن الريس عمر حرب فيلم جيد جدا طبعا. ف النهاية عمنا هاني سلامة بص لخالد صالح بعد ما كشف له المستور فقاله: إنت مش إنسان. الموسيقى اشتغلت. جسمي قشعر. إنت شيطان!!. وانتهى الفيلم!.
Image hosted by servimg.com
Image hosted by servimg.com
Image hosted by servimg.com

كابتن هيما بقى فيلم لذيذ وخفيف. تامر حسني ف رأيي أكتر فنان بيعبر عن جيل الشباب بجد. مستهتر. صايع. بيحلم يبقى كويس. بيحلم بفلوس. بيتهرب من التجنيد. لكن من جهة أخرى المفروض الفنان يبقى قدوة.
Image hosted by servimg.com
تامر ف الفيلم بيمثل جزء كبير من قصة حياته. لما كان بيشتغل سواق أتوبيس معفن وبيحب المس الأمورة النضيفة. وما شاء الله عضلاته ابن الذين تضخمت أوي. لكن لسه بيمثل بشخصيته الحقيقية وقاعد يقول (يا نهار إسود) و(هو ده) و(أيوه). دور زينة كان هامشي ومش جامد ف الفيلم وممثلتش حاجة درامية تدي بُعد للشخصية ف عقلك الباطن لما تطلع من الفيلم. شخصية الشر إللي أداها أحمد زاهر كانت سطحية أوي وساذجة. حتى ف شكلها الواد الشاب أبو دقن إللي عنده فلوس كتيرة ومرتبط بالحزب الوطني.
Image hosted by servimg.com
فيلم عمر وسلمى كان أكتر كوميدية ف رأيي. مشاهده الدرامية كانت أعمق. أحمد راتب ف كابتن هيما أضاف للفيلم جدا بخبرته وحضوره القوي. برضه ميار إللي أدت دور توتا أخت تامر عملت حضور قوي. إخراج نصر محروس جيد أحسن من إخراج شريف صبري ف 7 ورقات كوتشينة بما إنهم كانوا مخرجين فيديو كليبز. لكن لازم نحط ف الاعتبار إن نصر محروس توافر له مجموعة ممثلين جامدين زي تامر وأحمد زاهر وأحمد راتب وزينة. بعكس شريف صبري ف الفيلم بتاعه.
Image hosted by servimg.com
تسمية الفيلم بكابتن هيما حاسس إنها مقحمة أوي. كان المفروض لو حنسمي الفيلم ببطله يبقى الأسطى هيما مش كابتن هيما. عموما اسم كابتن هيما ملفت وخلاص. ملحوظة اجتماعية: عمنا تامر حسني عامللي راجل وقاعد يتحكم ف الفيلم ف أخته توتا وروحي اطلعي البيت لما تبقى ف الشارع ومش حطمن (قصده مش حخلص منك) عليكي إلا لما تتجوزي. حاجة تقرف كفاياكم بقى تحكم ف البنات يا ولاد الذين.
Image hosted by servimg.com
Image hosted by servimg.com
Image hosted by servimg.com
Image hosted by servimg.com
Image hosted by servimg.com
Image hosted by servimg.com
Image hosted by servimg.com

عموما الفيلم شغال ممكن نقول عليه بدبلوماسية جيد.

أحمد منتصر
في
رجب 1429

خطورة التدخين السلبي

Image hosted by servimg.com
كلمتين في الجون

ضرب أبي كفا بكفٍّ وهو يقول: عليه العوض ف الواد!. فوْر أن علم بأني بدأت التدخين. والحقيقة أني لم أكن أتوقع قط أن أدخن البتة، وحتى فترة بسيطة ماضية. قال لي أبي: جاي بعد العمر ده كله تدخن؟ دنتا معملتهاش ف ثانوي!. والحقيقة الثانية كذلك أني كنت أنفر من رائحة السجائر حتى فترة قريبة ماضية أيضا.
إنه التدخين السلبي الذي جعلني أعتاد على رائحة السجائر المنبعثة مع أنفاس أصدقائي المدخنين. والذي جعلني بالتدريج أطلب سيجارة من صديقي. ثم كررت الأمر حتى اشتريت علبة سجائري الخاصة. لذا أنصح كل من يجلس مع أصدقائه وهم يدخنون وهو ليس بمدخن أن يبتعد عنهم لعدة دقائق حتى ينتهوا من تدخين سجائرهم ثم يقفل إليهم غانما في أوج صحته.

أحمد منتصر
في
محرم 1429

الأحد، 13 يوليو 2008

المفتون ج1

رواية المفتون بتاعة فؤاد قنديل جميلة جدا. أول مرة أقراله صراحة. اعتقادي الأول عند القراءة للكبار إنهم معقدين ومفردات معقدة وكلام من ده. لعل الشيء الوحيد إللي حسيت منه إن كاتب العمل كبير التواريخ إللي كان مهتم بذكرها. واهتمامه المبالغ فيه بعبد الناصر. عموما عشرين سنة كمان وكل الناصريين إللي عاصروا عبد الناصر حيندثروا ونتخلص منهم. عندهم أفكار دقة قديمة أوي زي الوحدة العربية. والاشتراكية. وفكرة الرجل الواحد الإله. الصواب المطلق. حاجات قديمة اتغيرت دلوقتي بالمصرية. والرأسمالية. ودولة المؤسسات. ونسبية صحة كل الأفكار في كل حاجة زي الدين والجنس والسياسة.
عحبتني أوي الجملة دية ص 91: ما أروع عقل المرأة إذا احتشد بالثقافة ثم تألق بالإحساس وسما بالطموح والأمل وحب الحياة!.
أسلوب الكاتب بسيط ومش معقد وجميل جدا هو ده يا جماعة حاولت أقرا ف نفس الوقت مجموعة سعيد الكفراوي القصصية (يا قلب مين يشتريك) حاجة معقدة: لغة وأفكار وتقعير. ماشي في ناس تحب تكتب بأسلوب قوي أدبيا زي طه حسين اقراله مثلا (أحلام شهرزاد) بس وإنت بتقرا حتستمتع بالأسلوب والفكرة الفلسفية الهايلة. لكن سعيد الكفراوي أنا مقدرتش أقراله من أسف.
إللي لاحظته ف الغلطات اللغوية غلطة نحوية (أربعين طالب ثانويا): والصحيح (طالبا) تمييز. وفي غلطات تكررت بكسر همزة (أن) لما تيجي ورا الفعل زي (يدرك إن..) والصحيح: (يدرك أن).
أسلوب الخلط بين الفصحى والعامية كان محبب ولذيذ ويشد.
الراوي في العمل اتنين. المؤلف نفسه وبعدين ساعات واحد يخش يستدرك عليه وأحيانا يروي كراو غامض الهوية.
شعرت بالضيق من حكاية أم هند السلطوية دية وقاعدة تتحكم ف بنتها وجوازها من فؤاد لحد لما فؤاد زهق وكبر دماغه من الجوازة وأنا استريحت جدا للقرار ده. بلا جواز بلا وجع دماغ وربنا يباركلنا ف الحرية الجنسية هع هع.
وبكده نكون خلصنا من الجزء الأول وبانتظار صدور الجزء التاني بفارغ الصبر.

أحمد منتصر
في
رجب 1429

السبت، 12 يوليو 2008

الحرية الجنسية

الحرية الجنسية الحل الأمثل لجرائم الاغتصاب
http://ahmedmontaser.blogspot.com/2007/12/blog-post_78.html

التحرشات الجنسية بالإناث

شيكو الحسود

قررت الابتعاد عن صديقي شيكو الحسود. كان بدر حذرني قبل كده من قدراته الحسدية. لكني استهزقت ببدر وقعدت أضحك عليه وأسخسخ ف تدوينة (فوبيا الحسد). لكن فجأة الفترة إللي فاتت كنت بخرج كتير مع شيكو عشان حمود وأبو السيد وشلبي بيذاكروا وأنا مدخلتش الامتحانات الترم ده. كنت بخرج معاه كل يوم. فاشتريت ولاعة صيني حلوة بتنور. الواد شبط ف الولاعة وعجبته أوي. يمسكها ويبرق ويقوللي حلوة. طب ما تجيب يا بني ولاعة زيها لكن إزاي؟ ده بخيل كيك.
ليلتها الولاعة باظت فيها غاز وبتعمل شرارة لكن مبتولعش. رحت غيرتها من البياع التانية طلعت بتسرب غاز. بعديها الموبايل هنج واحتاج سوفت وير. عملتله سوفت وير بعديها بكام يوم البوردة اتحرقت. بعديها الكمبيوتر هيس وديته عند الراجل اتصلح. خساير مادية وهيا دي أكتر حاجة تخليني أخسر واحد صاحبي أو بنت حلوة. لذا قررت الابتعاد عن شيكو ذلك أن مصلحتي الشخصية أهم حاجة عندي وفوق كل اعتداد. وبعد كده لو سمعت عن واحد إنه حسود حبعد عنه.

معرض الروح لسلوى صعب

معرض الروح لسلوى صعب من لبنان
منشورة بباب قصص على الهواء
مجلة العربي يونيو 2008

هذا العمل من أفضل ما قرأت في فن القصة القصيرة بحق. التصاعد الدرامي للحدث والإثارة في السرد كانا عاملين هامين للغاية كي تخرج لنا الأديبة سلوى عملا فنيا رائعا.
الأسلوب والمعالجة: سلس. جذاب. غامض. الزوج (المنهك من الألم) يجترّ ذكريات زواجه القريب مخلدًا (قصة حب استثنائية توّجت بطلاق منحها إياه ومعه منحها فرصة أن تحقق رغبة دفينة، هي نفسها لم تكن تعلم بأنها ما ماتت أبدًا). الرغبة بالإنجاب. كل ذلك عبرت عنه الكاتبة ببساطة احترافية ملفتة. وبالنسبة للمعالجة فلقد كانت اللوحات تعبر عن (رغبة دفينة) مسّت شغاف قلب الزوج فانتبه إلى العقدة العويصة في زواجه وقرر أن يطلق حبيبته مضحيا وآثرا إياها على نفسه وهنا تتجلى أسمى آيات الحب الصداق لمّا يضحي أحد الحبيبين باغيا سعادة مرجوّة من الانفصال لحبيبه. كذلك التسلسل المتصاعد لفهم الزوج لرغبة زوجه الدفينة مع تأمل كل لوحة أجادت الكاتبة في حبكه. ووصف كل لوحة ببساطة متناهية تحسد عليهما.
الفكرة تقليدية: الزوج الذي يطلق زوجه بسبب عقم الزوج أو عيب به. ولكن الأسلوب السرديّ الاحترافيّ الهادىء والمعالجة الدرامية المحبوكة عوّضا قِدم الفكرة.
العاطفة والخيال: كان وصف اشتياق الزوج في بادىء القصة عند صعوده الدرج لزوجه محبوكا. أيضا عند تصوير المواجهة بين الزوجين بالتدريج من الاستغراب والصدمة. للصراخ والانهيار والجلوس على الأرض طبيعيا ولم أشعر بالافتعال. أما الخيال في أفكار المَشاهد في لوحات الزوجة فكان موفقا وينمّ عن خيال للكاتبة يسري.
العنوان (معرض الروح) كان موفقا ومعبرا عن الفكرة الرئيسية للعمل.
هناك غلطة لغوية (لم أقصد ذلك أبدا) والصواب (لم أقصد ذلك قط) لأن (أبدا) للمستقبل أما (قط) فللماضي. وكذلك (ما ماتت أبدا).
إذن العمل رائع.

أحمد منتصر
في
جمادى الأولى 1429

الاثنين، 7 يوليو 2008

قرب كمان شريط تامر الجديد

Image hosted by servimg.com
Image hosted by servimg.com
شريط عمنا تامر حسني الجديد حلو أوي وتامر وصل فيه لمرحلة نضج مبكرة. الشريط كله حلو. ناخد كده أغنية أغنية ونقول رأينا فيها:
1) متوصينيش: الكلمات واللحن بتوع تامر هاديين وعاملين حالة فنية تحفة. المفروض الأغنية مش حزين لكن اللحن والجو الهادي وطول الأغنية عاملين حالة كده لوحدها نقدر نسميها حالة متوصينيش. الحتة إللي ف نهاية الأغنية تامر غناها حلو أوي وختمها بآهاته المتميزة: (يا حبيبي يا إللي..خطفت قلبي..أنا قلبي قاللي..ملوش غير هواك). أغنية للتاريخ.
2) دايب: أغنية خفيفة. كلماتها حلوة. جيدة.
3) بكلمة نتصالح: الدخلة بالجيتار تحفة. اللحن بقى خفيف ولذيذ وتقدر ترقص بسهولة على (روحنا ورجعنا..للي كان بينا..إيه حيبعدنا..وبعد كل ده إيه). أغنية جيدة.
4) قرب كمان: دخلة الجيتار جامدة برضه. اللحن بقى جديد وفيه مد ف الصوت كتير مع فكرة الكلمات وكده عملوا حالة جامدة جدا. لما سمعتها ف المعمورة ع البحر كانت لذيذة جدا.
5) اسكتي: عاملة زي اعتذري ف الشريط إللي فات. أقل أغاني الشريط مستوى.
6) افتكرلي: جيدة.
7) يا تاعبني: أول ما سمعتها فكرتني ببهون عليكي أيام فيلم عمر وسلمى. يمكن الموسيقى متشابهة. جيدة.
8) قلبي إللي حبك: جيدة.
9) قسمة ونصيب: جميلة جدا (ويا ريت إللي يشوفها يسألها عاملة إيه..ويا ريت يطمن خوفها مش حقول كان بينا إيه) الموسيقى تحفة وعاملة جو جامد جدا.
10) بعيد عن عيني: جامدة جدا عاملة حالة زي متوصينيش كده. الختمة بتاعة الأغنية تامر غناها حلو أوي. واللحن عموما فيه وقفات تحفة.
11) هيا دي: أغنية الصيف من قبل ما يخلص. الكلمات بنت كلب فاجرة. كل حاجة ف الأغنية تحفة الموسيقى واللحن لكن الكلمات هيا أحسن حاجة ف الأغنية (أنا عارف إن الملايكة يا حبيبتي مبتتشافش طب إزاي أنا شايفك..وأحلى حاجة ف حبي ليكي إنه اتاخد قفش..آه عشان مبخافش معقولة أنا شايفك).
12) أيام زمان: شريط طويل وجامد والله. الأغنية دية الدخلة بتاعتها جامدة جدا. الكلمات والفكرة جداد ويحسب لتامر إنه غناها.
13) روح قلبي: أغنية خفيفة وحلوة أوي. (طب خلي الدنيا تضايقك يوم وشوف أنا حعمل إيه ف الدنيا..علشانك أنا أتحدى الكون ولا أشوف دموعك لو ثانية).
14) أصعب إحساس: برضه جامدة بتعبر عن المصري البسيط. (وعشان أنا عادي وأبويا كان عادي يبقى حلال فينا الظلم والعذاب).
إذن الشريط جامد جدا ومتهيألي الصيف ده مفيش شريط حييجي بنفس المستوى أو حتى مقارب للمستوى ده. تمام يا تامر. قريب بقى أبقى أشوف الفيلم وأتكلم عنه.

الأحد، 6 يوليو 2008

التطور الطبيعي للإخوان المسلمين

Image hosted by servimg.com
كلمتين في الجون

الإخوان كانوا زمان بيدعوا للخلافة الإسلامية. آه والله أستاذية العالم. وكانوا بيطالبوا بتطبيق الشريعة الإسلامية كاملة. ده كان لحد نهاية الألفية التانية تقريبا.
لكن مع بداية الألفية التالتة تقريبا الخطاب الفكري للإخوان اتغير بطريقة ملفتة. بدؤوا يطالبوا بدولة مدنية علمانية يعني. وبدؤوا يطالبوا بالديمقراطية للجميع لأنهم كانوا بيطالبوا الأول بالديمقراطية ليهم وبس. لكن لما جم يعملوا حزب سياسي الناس خبطت فيهم ف موضوعين: الأقباط والمرأة. قالك مينفعش قبطي أو امرأة يمسك الحكم رئاسة الدولة يعني. وبعدين قالك ده مستبعد واقعيا عشان أغلبية المصريين مسلمين. طب منين بتدعوا لدولة علمانية وتقول مينفعش المختلف عنك يوصل للحكم وتمنع ترشيحه بالمنطق ده وكده؟.
ده غير إنهم عايزين يطبقوا الشريعة بما فيها من مصادمات للواقع. زي حدود القصاص والحرابة والسرقة وشرب الخمر والزنا. إزاي وعقوبة الإعدام بدأت تتلاشى من العالم المتقدم خلاص؟. ولو حد من دعاة الأقباط أو غيرهم قال إنه لا يعترف بالإسلام حيطبق عليه حد الحرابة؟. ولو حد شرب الخمر حيجلده؟. ولو حد مارس الجنس وده حق طبيعي للإنسان حيجلده؟. ويقولك دولة مدنية قال.
أنا طلعت من التطور الطبيعي ف رأيي للإخوان ده بحاجتين: الأولانية إن أهوه أكتر ناس مش متشددين دينيا عندهم عقد وكلاليع عند تطبيق مفهوم الدولة العلمانية. التانية إن التطور الطبيعي لأي فكر ديني إنه يقلب بفكر علماني حبة حبة.

أحمد منتصر
في
رجب 1429

الجمعة، 4 يوليو 2008

حب إسكندرية ملا عليا حياتي

رحلة يوليو 2008
Image hosted by servimg.com
Image hosted by servimg.com
Image hosted by servimg.com
أنا وحمود
Image hosted by servimg.com
أنا ومصطفى عبدو
Image hosted by servimg.com
Image hosted by servimg.com

بمناخير مقشرة وجبهة كذلك العبد لله يكتب عن رحلة إسكندرية بتاعة الشهر ده إللي طلعتها مع معظم مجموعة رحلة أبريل إللي فاتت. كان معايا أبو السيد وحمود وشلبي وطارق عميرة. الصور المرادي مش كتير وهما كام صورة ليا خدتهم من العيال عشان موبايلي باظ خلاص وكل سنة وإنتو طيبين أنا اتعقدت خلاص من الموبايلات كل ما أجيب موبايل ميكملش سنة. بيبوظ عشان بوصله بالكمبيوتر!. المشكلة إني بجيب الموبايلات عشان التصوير وسماع الأغاني بس!. فخلاص لما تجيلي فلوس حبقى أجيب mp4 وكاميرا ديجيتال أشيلها ف المناسبات بس وربنا يستر ومتبوظش!.
المهم..اتقابلنا الساعة سبعة قدام المحافظة بس انطلقنا الساعة تمانية عشان واحد اتأخر أوي. وصلنا هناك على 11 كده بدأنا بجنينة الحيوان. حمود بيقول عليها المنتزه. قعدنا نضحك عليه. أصلنا ف طنطا المنتزه بتاعنا فيه جنينة حيوان بالمرة. الجو حر جدا وكنت لابس الفانلة الجديدة إللي جايبها من صديقي السلفي مصطفى ولسه مدفعتلهوش تمنها.
قعدنا ساعة ف جنينة الحيوان وبعد كده انطلقنا على المعمورة. كتغيير بدل المنتزه بتاع المرة إللي فاتت. كل واحد دفع 12 جنيه بالدخول والكرسي ع البلاج والشمسية وكل حاجة. نزلنا المية كان الموج هايج جدا. لكن المقرف إن المية فيها حاجات بني كده معفنة تقرف!. طبعا شط المنتزه كان أجمل. لكن شط المعمورة أكبر وبره الشط في سوق أسعاره عادية والمعمورة مليانة موزز وكمان شيكو صديقي الأنتيخ بيقوللي بالليل بتبقى أجمد.
من المواقف المضحكة منظر المنقبة إللي قاعدة على البلاج وكاشفة وجهها!. ومنظر المنقبة إللي لابسة نقاب على جلابية بيت كإن ستر الوجه أوْلى من ستر الصدر بخمار!. من جهة أخرى بالنسبة للموزز فواحدة بنوتة كتكوتة كانت لابسة مايوه ف المية ومهيصة فواحد جيه واتحرّش بيها فاتكدرتْ وكده بس البت كانت فرسة بصراحة. ومنظر الموزة إللي بره البلاج لما كنت بجيب سندوتش شاورما لابسة شورت وبادي محزق أوي بلا أكمام وهيا فرسة طول بعرض. حمود شافها اتهبل أنا عادي يعني هيا حرة فمهتمتش بالموضوع أوي. حتى هيا خبطت فيا خبطة جامدة لكن عادي يعني طب أعملها إيه؟.
طول الرحلة تقريبا الواحد مشافش بنت أبهرته لحد الإذبهلال. معرفش بقى عشان أنا بارد تطبعًا ولا عشان أنا ليبرالي اتعودت مركزش ف البنات عشان متعداش على خصوصياتهم. ولا فعلا الواحد يأس من حكاية التزبيط في مصر دية عشان مش ماشية على هواه. أصلي لا أبحث عن زوجة. فحروح للبنت أقولها ممكن نمشي مع بعض من غير زواج؟. صعبة وإن كنت أنا مقتنع بيها.
لما كنت سلفي مكانش في يوم بخرج فيه بيمر تقريبا إلا وأنبهر أوي بواحدة. معرفش الحكاية ليها علاقة بالسلفية ولا أنا عديت فترة المراهقة خلاص والحرارة قلت والاحتياج للبنات عاطفيا وجنسيا قل؟. يا عمي..سيبك!.
الواحد كان رايح بخمسة وأربعين ما عني كنت قايل للوالدة تديني خمسة وعشرين بس من مصروفي إللي بقيت باخده بالأسبوع عشان يقعد أطول فترة ممكنة. وصرفتهم!. الواحد مسرف طول ما معايا فلوس مبحبش أحرم نفسي من حاجة. شربت أربع كنزات!. وأكلت كيس شيبسي عائلي. وسندوتش شاورما كبير. وعلبة سجاير كِنت. حاجة مهزلة ملهاش لازمة يعني بس أهوه أهي مرة وعدت وخلاص.
رانيا للأسف مجاتش كانت الرحلة طالباها خصوصا إني وطارق قعدنا تحت الشمسية ع الشط فترة طويلة نتمزج بالجو. كنا نتكلم ونهزر. يلا مرة تانية يا رو. الرحلة دية مزبطتش ولا بنت بعكس الرحلة إللي فاتت.
بعد الساعة ستة كده لبسنا الجزم ومعرفش إيه وانطلقنا بالأتوبيس بتاعنا على القلعة. مشهد الغروب هناك تحفةةةةةةةة. لو كان الموبايل معايا كنت صورته فيديو وورتهولكم. حاجة فظيعة ربنا ما خلقت هذا باطلا سبحانك فقنا عذاب النار. الساعة إللي كانت ف القلعة دية كانت أحلى ما في الرحلة بجد.
بعد كده انطلقنا على جرين بلازا. وصلنا بالليل حيث العالم المرفهين بتوع جرين بلازا واحدة ماسكة كلب لولو وماشية بيه!. قعدنا نتمشى ونلف شوية ودخلنا الحمام ومعرفش إيه بس زهقنا. الرحلة مكانتش ف الجون المرادي بصراحة. حتى استخسرت الستين جنيه إجمالي الفلوس المدفوعة فيها. عموما مصطفى عبدو وعدنا برحلة تانية ف شهر تمانية كده عايز يعملها للقاهرة بقى رحلة نيلية وسيتي ستارز وكده. حنشوف.
عمنا طارق عميرة لو روحت مدونة مدوني طنطا حتلاقيه أفجر كاتب شاب ف طنطا وناس كبيرة أبدت رأيها ف أعماله وكده ومستقبله مبشر جدا خصوصا إنه شخصية جذابة بعكس العبد لله فهو شخصية انطوائية نرجسية بالمهلبية. قعد يتلو علينا قصائد ليه ع البلاج عملنا جو بصراحة. حمود بيقوللي مش إنت إللي مش عارف تكتب!. مردتش على حمود عشان حمود مش ناقد أدبي ولا يُعتدّ برأيه خصوصا إني مش بكتب شعر ولا مهتم بكتابة القصص. أنا إنسان صاحب فكر بنثره ف مقالات. طارق لسه مكتشف إن أنا علماني ف الرحلة لما سيد قاله!. والواد مش مصدق ومعرفش إيه ولسه ححكيلكم عللي حصل ف السيمينار بتاع منظمة فريدريش ناومان بعديها بيومين بس ف موضوع تاني علشان منطوّلش هنا.
ممممممممم..بس ف الرجوع لطنطا الهادية بقى خدنا وقت طويل ييجي تلات ساعات عشان التجديدات ف الطريق. ومشينا ف الطريق الدولي ومعرفش إيه. عموما العبد لله كان نايم عشان كان مطبق. كلنا أنا وطارق وحمود وأبو السيد كنا نايمين ف آخر الأتوبيس ع الكنبة وكان شكلنا تحفة بصراحة.
يلز رحلة أي كلام بس تتعوض وخيرها ف غيرها يا رجالة لول :).

أحمد منتصر
في
غرة رجب 1429

الخميس، 3 يوليو 2008

عوائق العمل المؤقت في مصر

Image hosted by servimg.com
كلمتين في الجون

شيء كتبته في حالة اكتئاب!:
أنت شاب عندك وقت فراغ شاسع وتريد أن تزيد دخلك الشهري فلا يكون مصروف والدك هو مصدر دخلك الوحيد. ستفكر في العمل المؤقت..وهذا جيد. لكن كي نوفر عليك التعب والقلق والاكتئاب نورد لك عوائق العمل المؤقت في مصر من وجهة نظرنا.
أولا يتشرط التفرغ. فإذا كنت طالبًا فإنه يصعب على رب العمل أن يشغلك لأنه يريد شخصًا متفرّغا يبقى معه لمدة طويلة. ثانيا تشترط الخبرة لعدة سنوات. أما إذا وافق رب العمل وشغلك بدون خبرة فسوف تسفّ التراب من سوء المعاملة وقلة الراتب. ثالثا تشترط الواسطة. لأن رب العمل يريد شخصا أمينا قنوعا براتب قليل!. رابعا يشترط المؤهل الجامعي وهو ما يسمى بالمؤهل العالي حتى يضمن رب العمل أنك مؤدب وابن ناس!. خامسا يشترط قرب محل السكن. أي أن تكون من أبناء المدينة محل العمل. حتى يضمن رب العمل أنك ستصل كل يوم في ميعاد عملك المحدد.
هذا بالنسبة للشاب. أما الشابة فيتشرط زيادة على ما سبق حسن المظهر. وأن تكون آنسة. وأن تكون لبقة غير خجول من الرجال. وفي النهاية تلك عوائق العمل المؤقت البسيط كعامل على آلة النقد في مركز تجاري. أو موظف استقبال في مستشفى استثماري. أو بائع في محل ملابس. أما الوظائف المرموقة فتتطلب زيادة على ما سبق إجادة الإنجليزية والكمبيوتر والعلاقات العامة.

أحمد منتصر
في
محرم 1429

انتظار لجاسم الحمود

انتظار قصة جاسم الحمود من سورية
منشورة بباب قصص على الهواء بمجلة العربي
مايو 2007

الفكرة الأم الوهمية تهلوس وإن أدركتُ ذلك عند منتصف القصة إلا أني اندمجت مع السرد المشوّق المرن حتى انقطاعه.

أسلوب السرد سخره الكاتب فتماوج مع انبعاجات الفكرة مكوّنا حالة حالمة ملفتة على الرغم من نمطية الحبكة والفكرة.

لفت انتباهي في المعالجة اهتمام الكاتب بلفت نظرنا إلى عناية الأم الوهمية بأدق تفاصيل حياة ابنها المفقود (جهزت كل شيء. نظفت غرفتك. رتبتها كما تحب. مسحت زجاج المكتبة. سحبت طاولة المكتب إلى الزاوية التي تحب قرب النافذة. وضعت فوقها أوراقا بيضاء وقلما أخضر...). حتى تخلق لابنها ابنة جيران جميلة يعشقها اسمها له دلالة: أمل.

العاطفة عبر عنها الكاتب بروعة.
الخيال في الفكرة هو انتظار الأم الوهمية ابنا وهميا وفي خيال السرد سمته وتناجيه بالرغم من انتفاء كينونة الابن أصلا.
عنوان العمل لم أحبذه. ذلك أنه تقليدي ورتيب.

إذن العمل جيد جدا.

أحمد منتصر
في
جمادى الأولى 1429