الأحد، 29 يونيو، 2008

عن الكماليات التي تحولت إلى ضروريات أتحدث

Image hosted by servimg.com
كلمتين في الجون

عمنا المدون آدم لما قلتله على نوع الموبايل بتاعي قاللي أمال بتدعي الفقر ليه يا عم؟. والحقيقة إن أنا برضه فعلا ومصر على إني فقير. لإن حتى ولو العبد لله لبس على الموضة. وشرب كان (مفرد كنز!). ومشي مع بنات نضيفة حيفضل فقير ومعفن لحد لما ربنا يكرمني بشغلانة.
دكتور جلال أمين ف مذكراته (ماذا علمتني الحياة؟) قال إن سماع الموسيقى والأغاني بقى من الضروريات بين شباب اليومين دول. مفيش يوم بيمر من غير ما حد فينا يسمع أغنية أو موسيقى. بينما زمان كانوا بيعملوا أوقات محددة لسماع الموسيقى والأغاني. وكانت حتى أغاني مناسبة للطقوس دية من قعدة وتوقيت معين وكده بحيث كانت أغاني زمان رصينة وعلى مستوى عالي.
وقس على ذلك اتباع الموضة. لأن مفيش حد عاقل يقدر دلوقتي يلبس لبس ولو كان نضيف وحلو مش ع الموضة. دكتور جلال أمين بيلفت نظرنا إلى استشراء النمط الاستهلاكي بين الزباين. بحيث إننا بقينا مبنكتفيش بالضروريات زي الفول والطعمية واللحمة زي زمان. لأ كمان بنجيب البرجر والهوت دوج والسجق والجمبري. وأحيانا بنجيب الحاجات دية كتير بدل الفول والطعمية واللحمة ما عن الفايدة واحدة والمتعة واحدة وإن كانت نسبية. كمان سعرها مرتفع جدا مقارنة بالحاجات الأولية المتعارف عليها. بيظهر عندنا هنا أناس مرفهين بيقدموا الترفيه على أي شيء تاني. وبيظهر ده ف أكلهم وشربهم واستخدام المكيفات والعربيات الفخمة جدا والتصييف ف أماكن غالية.
إذن أنا عايز إيه يعني م الكلام ده كله؟. عايز أقول حاجة واحدة بس إن كل واحد فينا يمشي على قده ويراعي ظروفه المادية وعلى فكرة حيحس براحة بال عظيمة بعكس الناس إللي عندها فلوس وقلقانة حتصرفها ف إيه!.

أحمد منتصر
في
جمادى الآخرة 1429

هناك 4 تعليقات:

محمد حلمي مخلوف يقول...

علي قد لحافك مد رجليك
فعلا سيدي
انا ساعات بادخل اماكن غالية عندنا في اسيوط وانا اساسا مش بحب ادخلها لأن بحس الناس اللي جواها بلاستيك انا بتكلم عن الشباب اللي زينا يبقي عامل نفسه مليونير وهو ممعهوش غير ثمن المشروب اللي هيشربه
وبعدين طبعا فقير طالما والدك بيصرف عليك فقير والدك معاه وانت ممعكش صح

ADAM يقول...

السلام عليك يا حبيبي


يا مولانا الموبيل N70 ليس من الضروريات

حتى وإن أمسكت بموبيل لأنه صار ضرورة

ليس ضروريا أن يكون N70 أليس كذلك ؟

وعلى رأي محمد حلمي مخلوف

على قد لحافك مد رجليك

مستنيك يا ولة

تحياتي



آدم

اهو ده عيبه يقول...

ازيك يا احمد

الناس الايام دى بقت مظهرية بشكل غريب رغم الغلا ومفيش فلوس والحالة صعبه
دلوقتى كل واحد عايز يلبس احسن لبس ويمسك احسن موبايل رفم ان مثلا من 10 او 15 سنة مكنش الناس مركزة فى المسائل دى بالشكل المبالغ ده
للاسف احنا بننحدر من شيئ لاسوء وبنقيم الامور والناس بمعايير غلط

تحياتى لك

أية الشقية الشعنونة يقول...

ازيك يا منتصر
طالما بتاخد المصروف مش تبقا فقير
تبقا غير قادر بس ده مؤقتا
ان شاء الله تلاقى وظيفة
ان شالله حتى رئيس مجلس ادارة
هههههههههههههههه
ربنا يكرمك يارب
عشان بابا يوافق عليك
هع هع هع
تحياتى