السبت، 21 يونيو، 2008

مسلم في الفضاء

Image hosted by servimg.com
كلمتين في الجون

هذه المقالة مستفادة من مقالة بملحق العربي العلمي العدد 35 أبريل 2008 بقلم د. محمد فتحي.

شيخ مظفر شكور أول ماليزي مسلم يطلع رحلة فضائية يدور فيها حول الأرض. وهو طبيب وبيشتغل محاضر جامعي. نموذج مشرف للمسلم إللي بيلتزم بدينه لكن واخد باله من دنيته ومستقبل بلاده. المؤسسات الدينية الماليزية قبل طلوعه الفضاء جاوبت عن إشكالية شروق الشمس وغروبها ف الفضاء أثناء الدوران حول الأرض ييجي 16 مرة كل 24 ساعة!. فأفتت إن مش على مظفر غير خمس صلوات يصليهم حسب توقيت قاعدة بايكانور الفضائية بكازخستان. وعن كيفية أداء الصلاة ف ظل انعدام الجاذبية أفتت إنه لو لم يستطع القيام يجوز إنه ينحني و يجلس. وإنه لو لم يستطع كذلك فعليه بالصلاة وهو ممدد. وبالنسبة لتعذر استخدام المياه ف الوضوء ف الفضاء فيجوز استخدام الفوط المبللة وغسل الأعضاء بها.
ولما سئل مظفر عن صوم رمضان ف الفضاء. قال إن الإسلام دين يسر. وإذا لم يمكنني الصوم ف الفضاء كما أتمنى فيمكنني صيام ما فاتني من أيام ف وقت لاحق بعد العودة.
ومظفر عنده 35 سنة تم اختياره بعد عملية بحث حيادية ف ماليزيا وخضع لتدريبات لأكتر من عام قبل المشاركة ف هذه المهمة الجليلة. وأثناء إقامته ف الفضاء أجرى مظفر إخصائي العظام بالجامعة الوطنية الماليزية تجارب لحساب معهد طبي ماليزي تشمل دراسة آثار انعدام الجاذبية على الخلايا السرطانية والجينات البشرية. وإجراء تجارب على الميكروبات المسببة للأمراض الاستوائية وعلى البروتينات بهدف عمل لقاح ضد الفيروس المسبب لمرض الإيدز..يا سلام!.
ماليزيا احتفلت بالإنجاز الكبير جدا ده. ومن حقها طبعا. بينما مصر فرحانة أوي إنها طلعت قمرين صناعيين لبث المحطات الفضائية!. وحتى الآن مطلعناش قمر صناعي إحنا كدول إسلامية لرصد الهلال لتحديد بدايات الشهور العربية وتلافي الاختلاف ف تحديد بدء رمضان وعيد الفطر وأول ذي الحجة. أحد المسئولين الماليزيين قال إن إللي حيحدد نجاح الرحلة دية مش بس سفر مظفر للفضاء وعودته. لأ كمان التجارب العلمية إللي أجريت خلال الرحلة ومدى الاستفادة منها.
كمان وكالة الفضاء الروسية إللي عاملة الرحلة عرضت على ماليزيا إرسال رائد فضاء تاني سنة 2010 أو 2011. كمان مظفر مكانش معقد دينيا بدليل إنه طلع الرحلة مع العلم إنها بقيادة رائدة الفضاء الأمريكية بيجي ويتسون. يعني بقيادة أنثى. ومقالش إنه مينفعش يوجد ف الفضاء مع أنثى وثالثهما القمر!. بس طبعا رائدة الفضاء الأمريكية كفء وهيا أول رائدة فضاء ف العالم تقود طاقم المحطة الدولية ييجي ستة أشهر. ومعاهم الملاح الروسي مالينتشينكو إللي صعد مع شكورعقد قرانه وهو ف محطة الفضاء الدولية خلال رحلة سابقة على إحدى الإخصائيات الأمريكيات ف مركز إدارة التحليق بتكساس عبر دائرة تلفازية تعمل بالقمر الاصطناعي.
فيا سلام لو المسلمين العرب اجدعنوا كده بدل ما هما مشغولين بحاجات صغيرة زي الحجاب والنقاب واللحية والسواك.

أحمد منتصر
في
ربيع الثاني 1429

هناك 5 تعليقات:

نونو يقول...

يا مسهل برضه يبطلوا معاصي كدة ويسرفوا فلوسهم في الحلال ويعبدوا ربنا صح هتختلف الحياة من كافة النواحي
تعرف ان مرة صحابي كان في غزوة وكانوا بينهزموا لموا بعض وقعدوا يسالوا نفسهم احنا مفرطين في ايه من السنن وما بنعملوش وبنعاقب بالهزيمة تصدق لقم
ايه
لقم انهم مفرطين في سنة السوك
سواااااااااااااااك في الحرب
هو دةالفرق ببينا احناوبينهم

شفت بقى التخلف
ربنا يهدي كل من كان ويتوب عليه

غير معرف يقول...

علي فكرة انا ادرس في الجامعة الوطنية في ماليزيا
المشتاق لله

أحمد منتصر يقول...

يا عم ألِف هدي أعصابك

لسه كنت بقرأ كتاب نسوي ف التاريخ

إقبال بركة بتقول إن ملك حفني ناصف كانت أول مدرسة أنثى مصرية

فلما نقول مسلم ف الفضاء ده شيء عادي

أهو إنجاز يحسب لينا وخلاص

وبعدين الماليزيين مش هبل

الراجل طالع يعمل أبحاث لحساب معهد ماليزي طبي

وفعلا أحد المسئولين قال إن مدى نجاح الرحلة حنحسه لما نشوف نتايج الأبحاث الطبية إللي قد نتوصل بيها إلى علاج للإيدز

لكن سيبك من ده كله

أنا كنت كاتب المقالة عشان أقول إن الإسلام عايزينه يبقى دافع وشيء قوي محرك لينا ف حياتنا ونبقى أحسن ناس

مش نهتم بالسواك والنقاب والحاجات دية

وشكرا

kareem azmy يقول...

و الله عندك حق يا ابو حميد

يا رب عقبالنا
مش موضوع اننا نزور القمر و ناخد كام صورة و كده
و نقول اول مصري طلع القمر
انما قصدي على الانجازات العلمية و كده

عجبتني قوي موضوع و ثالثهما القمر دي
هو صحيح فيه شيطان ع القمر ؟؟
ههههههههههه سؤال عبيط قوي

تحياتي
كريم عزمي

jehan يقول...

احمد

متفقة معاك طبعا ان العالم الماليزى دة مثال ممتاز للانسان المسلم ولكن فى مقالتك نقطيتين

اولا الجحاب فرض زية زى الصوم والصلاة

ثانيا وكان ثالثهما القمر اعتقد دة فية نوع من الستهزاء لان دة حديث نبوى ولا يجوز يتحريفة او الاستخفاف بية

والله اعلم