الأحد، 8 يونيو، 2008

احترم غيرك يحترمك

Image hosted by servimg.com
كلمتين في الجون
يا سلام وأنا بشرب سيجارة مارلبورو أبيض افتكرت. كنت نازل من الشقة بسيجارة روزمان أحمر لقيت ف وشي جاري الحداد. ألقيت عليه السلام مردش. وبعدين ندالي. تعللت بمشوار ورايا. جالي فمديت إيدي مصافحنيش!. قاللي: ما يصلح. ع السيجارة يعني. ارميها ومتضيعش فلوسك. قلتله ربنا يسهل وجيت أمشي راح زقني ف الحيطة ف نص الشارع. ما يصلح!. جيت ألحق نفس من السيجارة راح زق إيدي. قلتله: يا شيخ عيب كده إحنا ف نص الشارع. فاستنكر أوي إزاي أرد عليه. رحت زقيته ومشيت ولقيته ضيّع عليا تلت السيجارة منه لله!.
مبدأ الأمر بالمعروف والنهي عن المنكر ده مبدأ فاشل. أصل لو قلنا بيه مين يحددلنا الصح من الغلط؟. إنت راديكالي شايف منطقك هو الصواب وغيرك غلط. شايف السيجارة غلط مطلق باعتبارها مضيعة للصحة والفلوس. أما أنا فأنا شايفها حرية شخصية بعتبر الصحة ملك ليا أتصرّف فيها كيفما شئت. يعني أنا ليا وجهة نظر برضه المفروض تحترمها. لا إزاي؟. وحتى لو سابك ف حالك حتلاقيه مقاطعك. يعني بعد ما سبت الحداد الأخرق ده شفت واحد صاحبي سلفي أول ما شافني عمل كإنه مشافنيش!!. شخصيا لا أعترف بالحمقى والمغفلين. بس عشان مصلحة مصر حقول كلمتين ف زوري: الناس دولا بيفرّقوا وحدة الصف القومي. أبو إسحاق الحويني بيقول: كل الناس بتكره السلفي عشان بينقد الكل. فرحان أوي حضرته!. طب ما أنت لما تهاجم كله مين حيحبك؟. ولو محدش حبك عشان بتحترمه مين بعد كده حينادي بحقوقك لو ضاعت؟. مين حيقبل يسيبك تدعو الناس براحتك يا سلفي؟. لذا فإلى كل الراديكاليين أقول: احترم غيرك..يحترمك!.
أحمد منتصر
في
ربيع الأول 1429

هناك 4 تعليقات:

ADAM يقول...

أحمد بك منتصر

عودٌ أحمد

بس ليه كده ؟

الأمر بالمعروف والنهي عن المنكر

مش فاشل

والحكم عليه بالفشل معناه

إنك لا تتقبل الرأي الآخر

لأن ربنا سبحانه وتعالى

لما أقر المبدأ ده

وأمر بيه

بيخلق حالة حوار مجتمعي واعي

أما اللي بيتدخلوا في حرية الآخرين

فدي تصرفات ملهاش دعوة بالدين

والدين ملوش دعوة بيها

الأمر بالمعروف والنهي عن المنكر

مبدأ إسلامي

يدعو للنصح باللسان والقلب

بين الناس

وباليد بالنسبة للحاكم بس

أما أن يعاملك أحدهم كمعاملة

ذلك السلفي أو الحداد

فذاك الجهل يا صديقي

والقاعدة الشرعية منهما براااااااء


إذا تعلمنا أن ينصح بعضنا بعضا

بأدب جم

ويتقبل الآخر النصح بأدب جم

وليس من الضروري أن يفعل ما ينصحه به

ولكن من الضروري أن يحاوره بأدب

فقط أردت أن أوصل إليك رأيي

ربما نختلف

ربما نأتلف

لكننا أصدقاء

تحياتي

آدم

ولا

Shimaa Gamal يقول...

الأمر بالمعروف و النهى عن المنكر قصة طويلة . لكن اللى بيتعمل من زجر و الحركات اللى إنت وصفتها دى لا يمكن تكون من باب الأمر بالمعروف و النهى عن المنكر ربنا قال "إن كنت فظاً غليظ القلب لإنفضوا من حولك" يعنى الواحد عنده نصيحة يقولها بذوق . مش بالعافية و اللى عايز ياخد النصيحة ياخد بيها و اللى مش عايز هو حر . لكن نقول إنه من الإسلام الزجر و العنف و الإهانة طبعاً دى حاجة محدش يقدر يوافق عليها .

منهم لله الوهابيين اللى دخلوا فى دماغ الناس إن من حقهم خرق خصوصيتهم بالقوة تحت شعار الأمر بالمعروف و المهى عن المنكر

nonoymm يقول...

الدعوة لله فن يلزم لها الترقق
ومش معنى ان حضرتك وقعت في واحد اتصرف بطريقة غلط يبقى نعمم
شايف حضرتك حتى في نقدك للموقف دة كنت بتنقده بدون اي اخفاقات اظن لا
فيه تريقة ترقى لعدم الاحترام
تقبل كلامي
تحياتي

أية يقول...

ما شاء الله ما شاء الله
أسيبك يومين ارجع الاقيك عامل دوشة كده
هسسسسسسسسسسسس
بس خلاص امنع الهرج والمرج
بص يا ابو حميد انتا الامور اختلطت عليك الامر بالمعروف والنهى عن المنكر ده امر ربانى ومعروف عن السنة
متقدرش تنكره او تتكلم فيه كمسلم
ومش هضيف فيه اكتر من الزملاء بس فعلا احترم الاخر واجب واللى اتعمل معاك ده مش امر بالمعروف ابدا
فمتخطش الامور ببعض
لييك وحشة يا غلاسة انتا
تحياتى يا مجادل