الجمعة، 30 مايو، 2008

فن التزبيط في مصر 4

Image hosted by servimg.com
كلمتين في الجون
تابوهات التزبيط
تابوهات التزبيط في مصر كتيرة مرجعها الازدواجية إللي كل المثقفين في مصر بيشتكوا منها. التناقض يعني. الناس شايفة إن علاقة الولد بالبنت سواء أكانت صداقة أم حب غلط. وده بيظهر ف رهبة الجنسين من بعض. وتغطية البنات لأكبر جزء من أجسادهم. بينما تلاقي الواد بيعلي صوته وكده عشان البنات تاخد بالها منه. والبنت تشتري لبس جديد قبل كل فصل دراسي عشان الولاد ياخدوا بالهم منها. ومن المفارقات إنك تلاقي ولاد وبنات كتير من ضمن المواضيع إللي بيتكلموا فيها: الدين!. والدين أساسا بيقول إن علاقتهم غلط. والحل من وجهة نظرنا إن منفكرش ف علاقة الولد والبنت من وجهة نظر دينية. نبصلها من وجهة نظر اجتماعية. ده لإن المجتمعات المتحضرة كل ما ترتقي التفرقة العنصرية عندها بتقل. مفيش فرق ما بين الجنسين يبقى ليه نمنع العلاقة ما بينهما؟. حنتكلم على كام تابو: زي العُذرية. والعُذرية أعم من إن ميفضش غشاء البكارة إلا جوزك. بل بتمتد إلى إن بعض البنات عندها إنها لو عملت علاقة حب أو صداقة مع ولد قبل الزواج تبقى كده بقت بنت وحشة!. وده بيرجع إلى إن البنات دولا مفصولين عن الولاد منذ الصغر. وكمان عارفين إن نظرة المجتمع المتخلف ليهم سيئة. وهنا ف نظرة المجتمع عنصرية شديدة. يعني مفيش مانع الولد يعرف بنات لكن في كل الموانع قدام إن البنت تعرف ولاد!. بالنسبة للعُذرية كمصطلح بقى. فأنا مش فاهم ليه يعني البنت متمارسش الجنس طول عمرها لحد لما تتجوز ويقولك على ده عشان حِفظ الأعراض. أمال وسائل منع الحمل دية معمولة عشان المتجوزين؟. حاجة غريبة!. وبعدين إشمعنى يعني البنت لو مارست الجنس قبل الزواج عيب والولد براحته؟. زائد إن المعتقد ده بيخلي أزواج كتير يكدروا مراتتهم ليلة الدخلة لإنه مشافش دم وهو بيلج. وأتاري البنت بكر لسه ولكن غشاء البكارة مبيتفضش عندها من أول مرة مثلا. وف حالات علمية تانية بس أنا مش حاصرها. وبعدين ما البنات إللي مارسوا الجنس قبل الزواج بيعملوا عمليات ترقيع اسمها كده باين وبيرجعوا عذارى زي الأول. تبقى إيه لازمة عُذرية البنت أصلا من الأول؟. ده أول تابو. تاني تابو هو الرهبة ما بين الجنسين. في موانع كتيرة ما بين الجنسين ف الطبقة الوسطى والفقيرة عشان نقول عليهم دولا مع بعض عادي. الفصل ما بين الطلبة من الجنسين ف إعدادي وثانوي بيخليهم لما يدخلوا جامعة مش عارفين يتواصلوا مع بعض. وحتى لو حصل بيبقوا مش عارفين كل جنس منهم بيفكر إزاي. فتلاقي مثلا ولد لما بيقعد مع صاحبته يخبطها كده بكتفه كإنها ولد زيه. أو لما يشوفها وييجي يسلم عليها مصافحة متمدش إيديها أتاريها مبتسلمش!. الغبية دية كان الأولى متقفش مع ولاد بقى مش تقف ومتسلمش. حاجات كتيرة بتحصل منها الرهبة ما بين الجنسين نتيجة الفصل العنصري إللي بيحصل ف مرحلة المراهقة المهمة جدا وهيا المرحلتين الإعدادية والثانوية. تالت تابو وكفاية كده عشان منطوّلش: القاعدة إللي بتقول (إوعي تتعرفي بنفسك على ولد!). الله الله!. مرة سمعت بنت بتقول (أنا اتفقت مع نفسي قبل ما أدخل الكلية إني عمري ما حكلم واد معجبة بيه حتى لو حموت عليه)!. الله الله!. طب ليه؟. قلنا عشان المجتمع نظرته وحشة للبنت إللي بتكلم ولاد. فلو يعني الواد هو إللي كلمها يبقى معدهاش العيب!. والقاعدة الغبية دية بتمنع التواصل ما بين الجنسين. بالنسبة للولاد بيخافوا يروحوا يتعرفوا على بنت ميعرفوهاش أحسن تزعقلهم!. وبالنسبة للبنات مش بيكلموا ولاد لحد لما يدوّخوهم وراهم ويحاولوا يتعرفوا عليهم مرة واتنين عشان يفهموا إنهم مؤدبات!!. عندك تابوهات تانية تحب تتكلم عنها؟. تمّت السلسلة.
أحمد منتصر
في
ربيع الأول 1429

هناك 5 تعليقات:

Shimaa Gamal يقول...

علاقة الولد بالبنت فى مصر و الدولة العربية بصفة عامة عليها علامات إستفهام كثيرة . و السبب هى نظرة المجتمع للبنت . وظيفة المرأة أو البنت فى دماغ الكثير من الناس هى وظيفة جنسية . يعنى الست مخلوقة ليه ؟ مخلوقة علشان الجنس ، مجرد وسيلة الراجل يمتع بيها نفسه و تجيبله عيال . و علشان كده الست فى دماغ ناس كثيرة عورة . و علشان كده الأمهات بتخوف بناتها من الرجالة علشان الرجالة بعبع و علشان كده بيربطوا الشرف بالعذرية . و على الرغم من كده الراجل يلام لو مالوش تجارب لإنه هايكون خام و دى عيبة فى حقه لدرجة إن معظم الرجالة بيكذبوا و يألفوا مغامرات علشان ماتلزقش فيه تهمة إنه خام . البنت بقى ماتبقاش بنت لو مش خام و علشان كده فى بنات كثيرة بتكذب و بتخفى علاقاتها حتى و إن لم يكن الجنس جزء منها .
الدين مش بيحرم العلاقة و لا الإختلاط بين الراجل و الست . الدين بيحرم الخلوة . أو إن راجل و ست يكون بينهم ما قد يؤدى لحاجة حرام . و دى الحاجة اللى لازم كل الناس تفهمها .

غير معرف يقول...

اهااا ... مش بيحرم العلاقة و لا الإختلاط بين الراجل و الست . الدين بيحرم الخلوة . أو إن راجل و ست يكون بينهم ما قد يؤدى لحاجة حرام . و دى الحاجة اللى لازم كل الناس تفهمها .

فكلامك بيدل على انك مش متفق مع كلام الدين ربما؟؟؟ مش فاهم تقصد اية بالبوست دة صراحتن بس الي انا فهمته انك مدايق بأن الراجل والست مابيكنش بينهم علاقة سواء كانوا متجوزين او غير متجوزين ... وانا شايف ان تفكيرك غير منطقى بالمرة او انك راجل تعبان مولة في دماغك وبتجري ورا زبك وبس وفاكر ان الجنس كل حاجة في الدنيا


وكمان الدين مافيهوش عنصرية بس في حرام وفي حلال ... في صح وفي غلط ولو بصيتلها بالشكل الأيجابي هتلاقيها شيء متناسق وصحيح ولمصلحتك شخصياً ...

لأن لو انت زي ما بتقول كدة وان الست تكون مع الراجل عادي كدة ينيكوا في بعض وبعدين الست تروح ترقع نفسيها وترجع بكر زي ما بتقول مكنش في بنات اتجوزت ياقدع

والدنيا خربت بقى وتلاقي اخواتك وبنات عمك في الديسكوهات وهتلاقي الحياة بقت مقرفة وقيمة رجولتك بقت تحت شبشب الحمام ... لازم الواحد يحس بقيمة الحاجة ... سوف أكتفي بهذا القدر من الحديث بما ان الأخت شيماء في اخر الثلاثة سطور افادتك بالمفيد حول هذا الموضوع الذي ما اعجبني فيه هو سردك للتقويم الهجري بأخر البوست ولكن بالنسبة لي وأعتبر أن هذا رأي الشخصي أن هذا الموضوع غبي

ADAM يقول...

إيه يا عم مونتي ؟


انت بتمتحن ولا بتحارب ؟


انت لو معتقل مش هتغيب عننا كل ده

شوقتنا ليك يا راجل

شوف حل عشان نتآنس بيك

أكيد فيه أجازات بين الامتحانات

وانت في حرررروق

أقصد ضياع الحقووووق

يعني عادي لو فضيت من أسبوعك نص ساعة لحبايبك

تحياتي

وأرجو من الله إنك تنجح بامتياز

ابقى تعالى قابلني

هههههههههههههههههه



آدم

summar يقول...

انت معترض على ايه يااحمد؟
يعنى مش حرية بتاعتك اللى بتخليك تقول كده
هى حرية بتاعتهم برده
وكما ماينفعش تكلم فى حاجة زى فروض الدين وتقارنها بأى حاجة بنى ادم بيعملها
علشان كده ظلم
فكرة التناقض موجودة
بسبب او بأخر
واساسا بسبب ان الممنوع مرغوب
وان الحد بيجيب لنفسه الاعذار علشان يوصل للمرغوب
وان بمرور الوقت الاعذار دى بتبقي ثقافة مغلوطة
عادى يعنى
الناس مش عادلة اوى كده
ومعظمهم بيضحك على نفسه
مش على حد برة
يعنى برده عادى
:)
مافيش معنى لألغاء التناقض علشان الاسباب اللى قلتهالك
والموضوع مش مصري بس
او عربي بس
اللى بس بيظهر التناقض هنا اعلى
هو اساس المبدأ اللى مفروض نمشي عليه وهو الدين
لكن لة اساس المبدأ فيه خلل زى برة
مكنتش هتحس بالحجم ده للتناقض
يعنى من الاخر ده صفة انسانية مش مصرية او عربية
:)

غير معرف يقول...

ربط كل شئ بالدين اصابنا بالغباء الذاتي..نحن اصبحنا نختار ان نلغي عقلنا ونلغي اي تفكير بعيد عن التفكير الديني..لما تتحرروا من طريقه التفكير الدينيه هتقدروا تفهموا الحياة صح ..