الجمعة، 2 مايو، 2008

فن التزبيط في مصر 3

Image hosted by servimg.com
كلمتين في الجون

إزاي تدخل على بنت؟


شوف الأول إنت عاوز علاقتك بيها تبقى إيه صداقة ولا حب؟. استنى لما تبقى لوحدها أو مع زميلة ليها مش لبط وادخل باحترام اسألها ف أي حاجة المهم تكون حاجة بيتجاوب عنها عادة وتحتاج لمزيد استفسار. لو البنت قفلتك وإنت مكنتش تِنك وأليط يبقى حاول تاني معاها. لكن ادخلها ف حضور بنت جديدة معاها ويا ريت تدخلها ف المرة التانية لوحدكم أو اطلب منها الكلام بمفردكما للحظات.
لكن طبعا التهريج ف أول مرة كلام وممكن نتعرف؟ ومعرفش إيه بيترك صورة سلبية ليك عند البنت. وبيبقى شكلها وحش قدام إللي حوالكيم. وحذاري من إنك تتكلم مع بنت ف الشارع لإن ده ف مصر من تابوهات التزبيط. يعني البنت تتكلم مع الولاد ف الأماكن المغلقة لكن ف الأماكن العامة والمفتوحة متقدرش عشان شكلها. وده طبعا تناقض بس أنا مالي أنا عاوزك تزبط يا بوب أي بنت وخلاص!.
ولمّا تقعد معاها ف أول موعد اعزمها على مشروب كنز أو عصير قصب أو حاجة. البنت تحب الولد يصرف عليها عشان تحس إنها غالية عنده. حاول تبدي اهتمامك بيها وانسى ذاتك شوية لكن اتصرّف بطبيعتك. اتكلم ف مواضيع تهمها وتحس إنها عجبتها. متعرفهاش على حد من أصحابك حتى لو كانوا محترمين!. لإن من تابوهات التزبيط ف مصر إن البنت تلاقي الولد بتاعها بيعرّفها على أصحابه وهيا بتكلم الولاد أساسا بحساب عشان الشباب المصري نظرته وحشة للبنت إللي بتكلم ولاد كتير.
خد نمرة موبايلها عشان تقدر توصلها بسرعة بعد كده مش تضربلها ميعاد وتيجي تستناها متجيش. متمنيش نفسك بحاجات حتعملها معاها بعد كده زي كلام تسمعه منها حلو أو تردلك العزومة مثلا أو تعرفك على صحباتها لإن كتير من البنات المصريات فاهمين إنهم لو اتعاملوا عادي مع الولد حيفهمها غلط!. لكن ممكن فعلا تكون البنت مش طايقاك لأن أول موعد ده بيبقى ماتش يا تكسبه يا تخسره. عموما رنة منك للبنت بعد الموعد بكام ساعة لو ردتهالك تبقى البنت رايداك يا عم والله يسهلو بقى.
سيب البنت براحتها بعد أول موعد تقيّمك. لو إنت كنت عاجبها حتلاقيها عايزه تقابلك تاني لوحدها. تديك رنة. تبعتلك إيميل أو sms. لو طنشت يبقى خلاص يا بوب فرصة تانية بقى وابدأ من أول وجديد مع واحدة جديدة هع هع.
وللحديث بقية...

أحمد منتصر
في
ربيع الأول 1429

هناك 6 تعليقات:

adam يقول...

حبيبي مونتي

فينك غايب عن عيوني ؟

وحشتني والله

وعلى فكرة نفسي أشوفك وأقعد معاك

أما البوست :

فانت غريب أوي

إصرارك على توصيل فكرك قوي كده ؟

عشان انت مؤمن بان الاختلاط
والحرية الجنسية هما الحل لمشكلة

لجرائم الاغتصاب والكبت الجنسي

تعمل مقالات في ازاي الولد
اللي مش عارف يعمل ده

يتعلم ازاي يوصل للبنت ؟

ويظبطها ؟

رغم رفضي

بس معجب بشدة وحرارة وحاجات كده

أبشر يا ولدي سيكون لك شأنٌ عظيم



آدم

ســـــــمــــكة يقول...

مممم كالعادة انا مش معترضة ابدا عالمبدأ....

بس الطرق...
معرفش من الافضل ان المواضيع تيجي بسجيتها
ولطاما اننا لسنا بتحكمنا نظرة المجتمع وكلام الناس والعرف السائد يبقى المغزى الحيقيقي من التعرف والعلاقات بين الجنسين مش واضح

أبومعاذ يقول...

الأخ الفاضل /أحمد منتصر
اهتم بدينك ومتفرطش جداً فيما تقع فيه من نشر للفاحشة بين المسلمين
قال تعالى (إن الذين يحبون أن تشيع الفاحشة في الذين آمنوالهم عذابٌ أليمً في الدنيا والآخرة والله يعلم وأنتم لا تعلمون)
فانتبه أخي أن تكون منهم وأنت لا تدري اللهم بلغت اللهم فاشهد
بقية الإخوة الآفاضل- آدم يا من تسمى باسم أبى الأنبياء- والأخت الفاضلة التى سمت نفسها سمكة
حذارى من تيار الفتة فإن نهايته شاطىء الندم ولكن يوم لا ينفع الندم
وعذراً
اللهم اهدي شباب الإسلام والمسلمين لما فيه نجاتهم ورضاك
السلام عليكم ورحمة الله وبركاته

Ahmed يقول...

باشا ..
إزيك ؟!

ممتع أوي إني اقرأ الكلام ده .. عادة أنا اللي بتضبط مش العكس. البنات اليومين دول ممكن ببساطة يظبطوك عادي جدًا ..

أنا تضبطت بالمترو من يومين، كنت راكب بعربية فاضية شويتين وثلات بنات بيجروا عاوزين يدخلوا العربية .. لقيتهم قعدوا جنبي وقعدوا يضحكوا .. بعد شوية قالت لي واحدة منهم إنها مش بتعرف تقول إيه بمواقف زي دي بس هي معجبة بيا وعاوزين نتكلم ..

بصراحة جاوبتها جواب صادم أكيد أنت عارفه يا أبو حميد (وش شرير بيضحك)

أحمد

أحمد منتصر يقول...

شوفوا دية

http://ahmedmontaser.blogspot.com/2007/12/blog-post_580.html

jehan يقول...

بص يا احمد فن التظبيط دة حاجة ضحك وتهريج
لان ا فيش حاجة سامها اظبط بنت الا اذا كنت عايز اتسلى والتسلية فى العلاقات الانسانية مش حلوة
ثانيا لو فى فعلا صدافة او معرفة بين ولد وبنت الافضل انها تكون وليدة الموقف وبحكم تعامل عفوى
مش جاية عن طريق مصيدة البنت او الولد يعملها علشان يوقع الطرف التانى فية .