الاثنين، 14 أبريل، 2008

موقف السلفيين من إضراب 6 أبريل

Image hosted by servimg.com
كلمتين في الجون

المقالة دية مهداة لكل شعب مصر عشان يعرف حقيقة السلفيين من القضايا المصيرية التي تهم الأمة المصرية.
من دقايق شفت واحد سلفي بدقن طويلة وزبيبة صلاة ف راسه ووجه مكفهر بيزعق ف التلفزيون. قال إن الناس إللي عاملة الإضراب دولا ناس جشعين وطماعين. كلام يعني زي كلام المفتي عن الغلابة إللي ماتوا ف عرض البحر طلبا للرزق.
وده لإن السلفيين شايفين إن على الناس (الصبر) على جَور الحاكم ونصحه بالكلمة الطيبة طالما أقام الصلاة. يعني الحاكم مدام بيصلي العيد قدام التليفزيون كل سنة مرتين يبقى الراجل تمام والبلد فلة شمعة منورة. تضرب بقى تقلب هما ليهم يا جماعة قواعد ميقدروش يخالفوها..أمال؟.
من الآخر السلفيين انتماؤهم بس للأمة الإسلامية معندهمش حاجة اسمها انتماء لمصر بتاتا. يعني مدام الناس بتصلي ف الجامع وبتحضر دروس علم شرعي وكده. يبقى كويس وملهومش دعوة الأسعار تضرب بقى تقلب هما ناس زهّاد ومش طلاب دنيا لأ هما طلاب آخرة.
أحمد منتصر
في
ربيع الأول 1429

هناك 6 تعليقات:

ســـــــمــــكة يقول...

حسبي الله ونعم الوكيل

ببساطة..غباء.
ٍ

Rania يقول...

استاذ احمد انت دخلت على مدونتى وعلقت على حديث انا كاتبها وقلت انه غير صحيح
كل دة كلام هايل
بس السؤال انت عرفت مدونتى ازاى وازاى دخلت عليها?
بجد نفسى اعرف لان انا نفسى لما بعمل سيرش عنها مش بلاقيها ياريت تقولى
ثانيا انا لسه جديدة فى التدوين
فلو انا محتاجة بعض المساعدات ممكن تساعدنى؟؟
واشكرك شكر جزيل على اهتمامك
وليا الشرف انك تكون انت اول واحد يدخل على المدونة دى غيرى

أحمد منتصر يقول...

أستاذة رانيا :)

أنا دايما بدخل على عرض الوضع الخاص بيا

أدوس كلمة مصر

وأشوف جديد المدونات المصرية

وطبعا لو حاجة عارفها أقدر أساعدك فيها إنتي تؤمري :)

adam يقول...

العزيز أحمد منتصر

تحياتي لك

وبعد ،،،،

اسمح لي أن أعارضك بشدّة

على الهجوم غير المبرر غير المحسوب على السلفية في رفضهم للإضراب

أحمدُ الله أني من حزب اللا حزبيّة

ولا أنتمي للسلفية ولا لغيرهم

ولكن للحقّ والإنصافِ

فكلّ شخص ٍ حرٌ

لا تفرضُ عليهم قبولَ فكرةِ الإضراب ِ

ولا تعاقبُهم بالهجوم ِالشديدِ عليهم

أنا كنت من أول ِالمعارضين للإضراب ِ

وهذه وجهة ُنظري

وأنا حرّ في اختيار موقفي من الإضراب ِ

ومع ذلك فلا علاقة َلي بالسلفيّةِ

والشيخُ محمدُ حسان في الفيديو الذي
شاهدتُه على الرابط المكتوب

يعرض وجهة َنظره
التي ينصحُ بها مريديه وتلامذته

ومن شاء منهم أن يُضربَ

فلن يقيمَ الشيخُ عليهِ الحدَّ

فلا يجرّكَ اعتراضُك على بعض مساوئ السلفيين للعدوانيّةِ وتصيُّدِ الأخطاءِ ومحاولةِ إدانتِهم بأيِّ دليل ٍواهٍ

واحرص على الموضوعيّة يا صديقي

تعش أسعدَ النّاسِ

سلامي لك أرسله وقلبي كما وصفته سفيرةُ الملائكةِ فيروزُ

.... يهدهده التعبُ ....

فادع لي


آدم

أحمد منتصر يقول...

يا أستاذ آدم الإضراب ده مميزاته ف رأيي أكتر من عيوبه:

جمع كلمة كافة جموع الشعب على كلمة رجل واحد

الحكومة خافت منه جدا لأن أغلبية الجميع فيه

ظهر من خلاله أصحاب الآراء الشاذة زي الإخوان أو الموقف الرسمي للجماعة حيث خافوا من الإضراب بحجة عدم إثارة الفوضى

وكذلك من أصحاب الآراء الشاذة السلفيين. إللي توجهاتهم أممية أكتر منها وطنية. ودي بلوى لوحدها. كمان شايفين إن الخارجين ف الإضراب دولا طماعين عشان محمدوش ربنا على لقمة العيش إللي مش لاقيينها أساسا. زائد إن السلفيين عموما معندهمش وجهة نظر معينة للتغيير. اللهم إلا الصلاة ف الجامع وصوم الاتنين والخميس

من مميزات الإضراب كذلك:

وصول كلمة قوية ومسموعة لأمريكا والأمم المتحدة عن الوضع المتردي القاسي في مصر. النيويورك تايمز كتبت عن أحداث المحلة

الحكومة بدأت تتفاعل بجد وزبطت عمال المحلة ف كام حق من حقوقهم

الريس النايم على نفسه وصلتله رسالة محدش يقدر يخبيها عنه من المنافقين إللي حواليه إن ف حاجة غلط ف البلد يا ريس. قوم شوف شغلك شوية

ومميزات تانية بس كفاية كده منعا للإطالة

إنما العيب الوحيد إللي حضرتك شايفه هو إن الإضراب فيه سلبية شديدة وأنا أوافقك من حيث المبدأ. لكن بالطريقة دي عمرنا ما حنعمل ف مصر مظاهرة أو اعتصام أو إضراب أو عصيان مدني..ولا إيه؟

تحياتي :)

adam يقول...

أنا رديت عندي عالمدونة

بس حابب أضيف
إن الشعب ممكن يعمل اللي هو عايزه
بس بتنظيم أكتر واستفادة من خبرة السابقين لنا في أخذ حقوقهم في العالم

وهم كثر ...

آدم