الثلاثاء، 25 مارس، 2008

شلة الضياع

Image hosted by servimg.com
شلة الضياع

بعد الاستحسان إللي لاقته تدوينة (ليلة عيد الأم) من العيال بتوع الشلة. اقترحوا عليا تدوين الليلة دية كمان. العبد لله وافق لإن الموضوع ممتع جدا وأنا مغرم بطريقة تدوين الغربيين لما بيتكلموا عن حياتهم بالصور والفيديوهات. إذن ده نمط جديد من التدوين أتمنى ينتشر ف المدونات العربية.
مش من عادتنا كشلة ضياع نخرج يوم الاتنين بس أهوه أصلنا مش بنروح الكلية ف سبرباي عشان موجة الحر الرهيبة. ما عن النتيجة طلعت وأنا مدفعتش المصاريف مكسل أروح أدفعها وأعرف النتيجة. المهم الوالد كان عايز يعرفها تحت إلحاح الوالدة فجابها: راسب ف كل المواد طبعا والمضحك إن في مادة جيبت فيها صفر!! هع هع.
عادي خالص لما عرفتها قعدت أضحك ونزلت جيبت إزازة لتر شويبس يوسفي ساقعة. الوالد فرح أوي وقال أهم حاجة نشرب وشربنا أنا وأمي وأبي وأخويا إسلام ورقصني يا جدع!.
نمت الساعة خمسة العصر وكنت موصي سيد يكلمني الساعة تمانية يصحيني عشان نخرج. وبالفعل حصل. كلمني فيديو كالعادة العالم بتوع فودافون دولا فلة شمعة منورة بجد. ناس موز موز موز بصراحة. إيه يا بني إنت فين؟. قاللي أنا رايح لروميو أهوه البس إنت ولما أرنلك تعلالي أبو فريخة.
سيد واد عبقري ما شاء الله كان عنده مادتين ف الترم الأول السنادي بما إننا كلنا بنعيد تالتة حقوق وكل واحد شايل مواد على قد نيته. جاب ف مادة عشرة يعني ناجح. وجاب ف مادة تسعة يعني سقط فيها بس ممكن يترفع لعشرة وينجح بدرجات الرأفة ف آخر السنة. لما قابلته قلتله يعني ساقط فيها. روميو قال لا ناجح فيها بس يشد حيله ف الترم التاني!. إنت عِلماني أصلا مش فاهم حاجة!!. يا بني اسمها عَلماني إنت وهو بطلوا جهل بقى. مسكتوش وقعدوا يغلسوا عليا لحد ما حمود جيه.
أول ما اتقابلنا أنا وسيد وروميو روحنا الكشك بتاع سعيد مع محب شربنا ساقع. أنا شربت صاروخ ميريندا وجيبت علبة سجاير روزمان أحمر. ممممممم الأزرق أحسن متهيألي. روميو خد مني سيجارة ودخل عالم التدخين من أوسع أبوابه أخيرا. وسيد خد سيجارة كالعادة. كنت عاوز أجيب إل إم أزرق بأربعة ونص وكنت نازل جاهز بخمسة ونص ملقتش عند الراجل فخدت جنيه من سيد وجيبت روزمان.
قعدنا شوية جنب الكشك وبعدين روحنا عند h2o وقفنا هناك. الجو كان حلو أوي نسمات الهوا اللذيذة تخرجك من بقية سطوة قيظ النهار. في خاطرة اسمها (قيظ) حنشرها قريّب ع المدوّنة بمناسبة موجة الحر الشديدة دية.
وبعدين روحنا قعدنا ف عريشة حديدية مخصصة للعسكري يجلس فيها بالنهار قدام محل solo الحريمي. ممممممم زهقنا روحنا وقفنا قدام فتح الله. زهقنا برضه مشينا ف حسان ابن ثابت وبعدين حد من العيال عزمني على طبق كشري عند أصالة ف عمر بن عبد العزيز. طلعنا بعديها على شارع البحر أكبر شارع فيكي يا طنطا. حمود اتصل. إيه يا بني إنت فين؟. كان عايزني أجيله قال ميدان الساعة. أنا معايا سيد وروميو تعلالنا شارع البحر مع النادي. استنيناه هناك جالنا بالأتوبيس.
خد سيجارة. قلت لحمود أنا حبطل أقول عن نفسي علماني لحسن الناس العادية نظرتها وحشة للعلمانيين. أنا حقول ليبرالي. ويقعدوا يفكروا ف معناها سنة بقى!. روميو طلع مياتيني: إنت علماني ولا ألماني؟.
حمود جاب لب وسيد وروميو جابوا آيس كريم. وبعدين دخلنا على الشارع إللي فيه مستشفى المنشاوي. بعديها مشينا ف سعيد وحمود اقترح نقعد ف قهوة هارتي ف شارع النادي.
روحنا القهوة طلبت شاي. حمود وسيد طلبوا شيشة. سيد وروميو طلبوا كوكتيل فواكه. قعدت أشرب سجاير مع الشاي وبعديه. وشغلت كام أغنية زي أغنية فيلم كده رضا بتاعة هشام عباس. وأنا حر لعمرو دياب. قلتلهم إن رانيا زعقتلي إمبارح وشتمتني عشان واحدة اسمها وفاء سلطان باين مرتدة وبتهاجم الإسلام أنا قلتلها دية حرية رأي. روميو شتم فيا شوية ومُصر على إنها عِلماني بكسر العين.
وقعدوا يتريقوا عليا وعلى خليلتي سيجارة أبث في أنفاسها سخطي. فقررت ألحنها إغاظة ليهم.
حمود وسيد
Image hosted by servimg.com
Image hosted by servimg.com
Image hosted by servimg.com
مونتي
Image hosted by servimg.com
Image hosted by servimg.com
http://www.youtube.com/watch?v=oUoB1vgN9PY
روميو وإحنا ماشيين قال: تصدّقوا إحنا زي الواد العلماني ده مش بنصلي!!.

أحمد منتصر
في
ربيع الأول 1429

هناك 9 تعليقات:

ســـــــمــــكة يقول...

مش واخد بالك انكو بتاكلو كتير..؟
مش قصدي حاجة يعني عليكو بالعافية على رأي الكويتة بس حرام المصاريف كدة هههه...ونصيحة فوكك من ال اند ام بتاعت مصر والله مضروبة وورقها عامل زي ورق لزبالة وببتحرق بسرعة البرق....هههه:)
ربنا يخليلك أصحابك دايما

تحياتي

adam يقول...

سلام عليكم

عزيزي أحمد

ممكن أسألك انت خريج إيه ؟

معلش هو مش من حقي

بس فضول

لوتكرّمت

مع خالص تحياتي

وأمنياتي لك بالتوفيق
آدم

أحمد منتصر يقول...

سمكةةةةةةةةةة:

مش أنا!. أنا جيبت إزازة ساقع وعلبة سجاير وهما عزموني على كشري وشاي. صرفت خمسة ونص.

واحد زي سيد أنا شايف إنه جاب حاجات كتير: كنز وكشري وآيس كريم وكوكتيل فواكه وشرب شيشة.

والله يا سمكة إل إم أزرق هو أرخص حاجة نضيفة حسب علمي وأهو برضه أحسن من النكست.

أجيب مارلبورو؟ طيب أبيض ولا أحمر؟

هههه آمين يا رب :)

وإن كان الوالد بيقوللي إمبارح أصحابك دولا مش حيبقوا معاك طول العمر :) هع هع.

تحياتي :)

أحمد منتصر يقول...

آدم:

مقرتش إنت التدويناية دية أكيد :)

أنا لسه بدرس حقوق

تحياتي

Romeo يقول...

انت مش كاتب الشتايم ليه يابنى اللى انا شتمتهالك عموما انت ليبرالى حقير :D

غير معرف يقول...

من حرية الراى فى العلمانيه انى اشتمك فى اى وقت عن عايزه تعبيرا عن اختلافى معاك فى الرأى وده من حرية الرأى والتعبير

مشتاق لله يقول...

السلام عليكم -احمد شلة ضياع ماالذي ممكن ان تقدمه للحياري كي يهتدوا سؤال يريد اجابة منك -ارجو ان تكون اجابة عاقلة فانا اعرفك عاقلا -دمت سالما

غير معرف يقول...

طيب وماله أهم شيء أنك قريت التعليق قبل ما تحدفه


و بقة سلملي على الليبرالية بتاعتك

أحمد منتصر يقول...

الله يسهلكم كلكم هع هع :)