الجمعة، 21 مارس، 2008

ليلة عيد الأم

Image hosted by servimg.com
ليلة عيد الأم

الليلة الخميس أنا والشلة بنخرج كالعادة. سيد اتصل بيا كنت لسه صاحي وبستحمّى عشان الفترادي أنا ليلي نهاري. طلعت من الحمام كلمته فيديو لإن فودافون عاملة لكل واحد 100 دقيقة فيديو. حبيبي ومعرفش إيه تعلالي بقى إيه..دلوقتي!. المهم قفلت معاه وأكلت بسلة ولحمة بالشوكة والسكينة والمعلقة بما إني بقيت علماني خلاص والأكل بالإيدين دقة قديمة!. ومأكلتش رز عشان من ساعة ما بدأت تدخين مليش نفس.
بعد كده دخلت الحمام تاني فضيت التنك. وبعدين لبست. وشغلت الدش لقيت فيلم ناصر 56 قعدت أتفرج عليه شوية. اتصلت بسيد. إيه يا بني إنت فين؟. قاللي أنا ف السكة انزلي أهوه. لبست الجاكت وأنا نازل لقيت الحاج جيه وبيقول الدنيا حر. قلعت الجاكت. ونزلت نص كم وكان الجو فيه هوا لذيذ.
قابلت سيد حبيبي عامل إيه؟. وبعدين قلتله تعالى نعدي على صاصا صاحبي السُني بتاع اللبس. عدينا عليه لقيت هناك علاء فاتح المحل. فين اللبس الجديد يا عم؟ مفيش. دورت على بنطلون جينز عنده يكون بُني. لقيت حاجة جباردين مجاتش على مقاسي. قست حاجة تانية كانت ضيقة شوية ومعجبتنيش أوي. تركي بـ75 كمان. استخسرت وقلت ف نفسي أستنى لما يجيب فانلات آخدلي فانلتين أحسن.
علاء وجعلي دماغي لما شاف علبة السجاير معايا. إنت بتدخن؟ وهو أساسا بيدخن. محبش حد يناقشني ف حاجة هو مش قادر يعملها. قعدنا نتكلم شوية عن الدينية والعلمانية. هو قاللي إنت غلط ومعرفش إيه. قلتله أنا عارف إني غلط دينيا بس أنا تفكيري مش ديني. والعلمانية هيا أنسب منهج للعصر ومفهاش تشدد. قاللي تشدد إيه؟ قلتله النقاب والدقن وتقصير البنطلون وعدم تقبل الآخر. لما كل واحد سواء مسيحي أو يهودي أو مسلم يبقى تفكيره علماني كده حنبقى حاجة واحدة.
وأنا وسيد ماشيين قاللي إنت مش عاجبك النقاب ف إيه؟ يعني ترضى إن حد يبص لمراتك؟ قلتله أيوه عادي. قاللي تبقى خول!. قلتله النقاب ده شيء غبي إزاي نلغي وجود جنس كامل؟ إيه ذنب الإنسان إنه أنثى؟. قاللي إنت مدخل نفسك ف حوارات ملهاش لازمة خالص. قلتله أبدا. إنت لازم تختارلك مرجعية لو واحد تفكيره ديني مسك البلد لو حرامي سرق حيقطع إيده. لو واحد زنى لو كان متجوز حيرجمه حتى الموت لو كان مش مجوز حيتجلد مية جلدة!. والبنات كلهم حيتحجبوا وبلاوي. قاللي مفيش حد يقدر يخلي الناس كلها متحجبة. قلتله لا يا عم ما طالبان لما كانت ماسكة أفغانستان كانت كل البنات متحجبة وكل الرجالة بدقون. قاللي برضه إنت مدخل نفسك ف حوارات ملهاش لازمة. قلتله لما تلاقي ف الانتخابات واحد علماني وواحد ديني وواحد ملحد حتختار مين؟. قاللي حختار الأنفع ليا. قلتله ما أنت حتعرف منين الأنفع ليك لو مدخلتش نفسك ف الحوارات دية؟.
حمّود اتصل بسيد إنتوا فين؟ سيد قاله قابلنا عند سعيد مع محب. روحنا هناك عن طريق امتداد شارع أنور وسيد تايه يا عيني ومش عارف هو فين. أصل يا جماعة سيد من العجيزي. الواد ده هو وحمود من العجيزي!.
وصلنا هناك فين حمّود؟ طبعا أبو مواعيد مضروبة لسه مجاش. قلت لأبو السيد تعالى نشرب حاجة من عند h2o أنا عايز أجيب جوز هند زي رانيا. قاللي لا أنا واكل أكل جامد ومش قادر. قلتله نجيب ساقع من الكشك إللي هنا قاللي مش عاوز. جيبت أنا ميريندا صاروخ وقعدت أمزمز فيها مع سيجارة روزمان. الواد سيد أخد سيجارة ع الله يبدأ بقى تدخين ونبدأ ناخد منه سجاير هع هع. سيد اتصل بحمّود إنت فين ياض؟ قاله عند مستشفى الأمريكان سيد سألني هيا فين دية شاورتله يمين وأنا باخد نفس من السيجارة ف تلذذ. أصل سيد ده مش عارف أي حاجة أصله من العجيزي. الواد ده من العجيزي لوووووول!.
أخيرا حمّود جيه حاطط حوالين عنقه شال أبيض. إيه يا جماعة هو حلو؟ قلتله حلو. حمّود أخد سيجارة معرفش لحد إمتى حصرف ع العيال دية؟ وعيال تانية أصحابنا جم والعلبة ادمرت رحت شاري من الكشك علبة روزمان أزرق تانية. يبقى كده الساقع والسجاير بـ 6 جنيه ونص. اتبقى معايا تلاتة ونص قلت مفيش h2o إنهارده.
شندي رابع الشلة جيه. قعدنا شوية جنب الكشك وبعدين قلنا نلف شوية. روحنا ناحية h2o وقفنا. وبعدين حمّود طلع ورقة بمية جنيه وقعد يتمنظر بيها بس كان عايز يجيب بيها حاجة لأمه من شارع النادي. انطلقنا لشارع النادي وهناك حمّود دخل محل هدية وأنا وسيد قعدنا نتصور.
ده حمّود
Image hosted by servimg.com
وده أبو السيد
Image hosted by servimg.com
مونتي
Image hosted by servimg.com
Image hosted by servimg.com
Image hosted by servimg.com

أحمد منتصر
في
ربيع الأول 1429

هناك 13 تعليقًا:

ســـــــمــــكة يقول...

طبعا انا الحمدلله مش عارفة اسم اي حاجة من الي بتقولو دة حالص...
والحمدلله برضو ان ماما في مصر الشهر دة لحسن المزانية مش جميلة خالص برضو

سرد ممتع ليوم حميل
تحياتي

maha zein يقول...

اولا مع اختلافي معاك في ارائك تماما...بس هشيل الجزء الي معجبنيش واقولك علي يومك وخروجك يا رب تكون استمتعت
الاكل بالشوكة والسكينة مستفز جدا
ليه بقيت تدخن ؟ربنا يقويك وتبطل
اشكرلي سيد ولا ابو سيد ده
صراحة حساك في الحكاوي الي بالعامية بتوهني شوية ...بس انا صراحة كنت متشوقة اكمل للاخر ومعرفش ليه
تحياتي ليك وللشلة

أحمد منتصر يقول...

سمكةةةةةةة:

أنا بتكلم عن الشلة كإنكم تعرفوهم يعني مش بعرفكم لسه عليهم وأقول حمود واد أسمر وقصير قزعة وكده

وفعلا الميزانية العادي عندي إنها خربانة فمجبتش حاجة للحاجة

الله يخليكي تحياتي :)

ikhwangeeee يقول...

ماااشى يا عم


بس كان فيلم ناصر حلو ولا وحش ؟؟

ويا ريت تحدفلى حتى بسلة ...



أخوك إخوانى حتى النخاع
http://ikhwangeeee.blogspot.com

أحمد منتصر يقول...

مها زين:

دكتور :)

الأكل بالشوكة والسكينة والله لذيذ هو بس ف الأول صعب وفيه لخفنة لكن مع الممارسة بتكتشفي إنك مش بتلطخي إيديكي وده شيء مجيد

عاااااااا إزاي أشكر أبو السيد ده شتمني؟ وبعدين الواد ده يا جماعة من العجيزي لوووووول :)

أيون يا دكتور سحر الأسلوب أهم حاجة ف أي كاتب ساعات بتقري حاجة ملهاش لازمة زي البوست ده لكن الأسلوب يجبرك تكملي للآخر..شغل مصححين لغويين بقى هع هع :)

الشلة ممنونالك وتحياتي :)

أحمد منتصر يقول...

إخوانجييييييييييييي:

حبيب قلبي :)

فيلم ناصر ده عمري ما شفته بالكامل ما عنه جامد جدا
وكذلك أيام السادات

البسلة خلصت خلاص ابقى اعزمني على طبق كشري بعدين يلا هع هع :)

تحياتي

norahaty يقول...

السلام عليكم ورحمة الله
مش حاتكلم كتير
ان عجبنى الفسحه وطريقة الكلام
فعلا حسيت ان انا نزلت ورحت وجيت وكل اللى انت قلته
اما باقى الماضيع فانا لسه سيبالك السؤال
انت فى اى جهة
بكل صراحة ووضوح.
وتقبل تحياتى
norahaty

أحمد منتصر يقول...

norahaty :

أستاذتنا :)

وعليكم السلام ورحمة الله

كويس إن كلامي عجبكم

أمال لو مكنتش حاطط اسم الليبرالية بالأحمر قد كده ع الشمال؟

liberal

ليبرالية

لكن حتلاقي على كلامي مسحة دينية من واحد فاهم عشان كنت سلفي من سنة كده :)

تحياتي :)

غير معرف يقول...

مساء الخير او صباح الخير معلش اصلى تايه ومش عارف الايام من بعضها عشان كلها شبه بعضها من كتر الفراغ
انا بتفق مع الاستاذه سمكة في انى بردو مش فاهم اى حاجه من اللى بتتكلمو عنها بس نصيحه بطل السجاير عشان مضرة وبطل تلف في الشوارع شفلك حاجه مفيده :D

غير معرف يقول...

مساء الخير او صباح الخير معلش اصلى تايه ومش عارف الايام من بعضها عشان كلها شبه بعضها من كتر الفراغ
انا بتفق مع الاستاذه سمكة في انى بردو مش فاهم اى حاجه من اللى بتتكلمو عنها بس نصيحه بطل السجاير عشان مضرة وبطل تلف في الشوارع شفلك حاجه مفيده :D

كليوباترا ماتت حبا يقول...

شكرا لزيارتك مدونتى فى مهدها وعجبتنى مدونتك جدا

طنطاويه اجدع منكم يقول...

مالهم بتوع العجيزة اجدع ناس
بس ده يعتمد على هما ساكنين فى العجيزى عند نبيل الوقاد فى المساكن ولا عند موقف شبين ولا فى النص

غير معرف يقول...

ممكن لو حد يعرف واحد اسمة حمص فى العجيزى يقولى