الأربعاء، 5 مارس، 2008

ولا تسرفوا

Image hosted by servimg.comImage hosted by servimg.com
كلمتين في الجون

الواحد احتار مع العلمانيين المتطرفين دولا!. بينقدوا على السلفيين حاجات هيا فيهم برضه: الصواب المطلق. وعدم قبول الآخر. وشتم المخالف واستحلال عِرضه. وموقفهم من الأميين. وحاجات.
ده غير إنهم أصلا مش فاهمين الدين صح. ودي حاجة أنا أجزم بيها. مبياخدوش بالإجماع!. وبعدين أعلامهم يبدؤوا يعملوا نفسهم مجتهدين وهما مش فاهمين حاجة ويفسروا النصوص على مزاجهم. فمنهم المستشار العشماوي إللي قال إن الحجاب مش من الإسلام!. أمال الأنثى المسلمة تصلي بإيه؟. وإن الخمر مدام إللي شربها موصلش لدرجة السكر تبقى حلال يا بني حلال!!. أمال ليه إللي يشرب خمر ف الدنيا ملوش خمر ف الجنة؟. ومنهم سيد القمني. وإللي بيقول إن القرآن نص تاريخي والأحاديث الصحيحة سندا محتاجة تنقيح عقلي (العب!).
وبيقولوا إن السلفيين متشددين دينيا!. قال عشان متمسكين بالنص. وده طبعا لعب عيال. لإن السلفية من أهم أدواتها التمسك بالدليل النقلي. ولولاه لفتح باب الابتداع ف الدين على مصراعيْه. هما آه السلفيين متشددين اجتماعيا. لكن دينيا؟ لا يمكن. وإللي يقول عليهم متشددين دينيا ده جاهل. أمال الحدادين والقطبيين وبتوع الجماعة الإسلامية دولا إيه؟.
وبيقولوا إنهم حركة مش فكرية!. قال إيه عشان بيعتمدوا على النقل. وكإن النقل ده مش محتاج إعمال العقل عشان تنفذه وتوضحه للناس. أمال إيه الكتب إللي عند كل سلفي دية ومجلدات قد كده؟. هما آه رجعيين ومتخلفين لكن ما هو أي حد سنده ألف سنة فما فوق رجعي يعني رجع بتفكيره لورا. ومتخلف يعني تخلف عن التقدم والحضارة الحديثة. والصفتين دولا مش شتيمة بقدر ما هما وصفين ف المقام الأول.
ومش عارف أنا مش ملاحق أرد ع السلفيين أقوم أرد على العلمانيين المتطرفين كمان؟. يا جماعة عايزين تتعلموا علمانية صح عندكم المسيري وأيمن نور والناس المعتدلة الجميلة دية. المسيري له مقالة حلوة أوي عقب تصريحات فاروق حسني عن الحجاب. قال فيها إن الحجاب له كذا بعد: اجتماعي كشكل. واقتصادي كتوفير. وديني كواجب. فحتى لو رفضناه من بعد أو بعدين أكيد حنقبله من البعد التالت. وأيمن نور قال ف موقف العلمانيين المتطرفين ف تركيا من الحجاب إن ده غلط إحنا مش حنفرض على حد ومش حنقدر أصلا نفرض على حد حاجة هو مش عاوزها. وإن الليبرالية المفروض نظريا بتتسع للجميع.
والخلاصة إن مهما اختلفنا مع السلفيين أو الإخوان أو غيرهم من المعتدلين فالمهم هو الرقي بمصر والنهوض بيها. وفي طاقات عند الناس دية مبهرة على استعداد لخدمة مصر بس عايزه تشجيع وتوجيه وإننا ناخدهم ف حضننا. والتطرف ف أي شيء مذموم. ولا تسرفوا.

أحمد منتصر
في
صفر 1429

هناك 10 تعليقات:

عصفور المدينة يقول...

انت عسل ودماغك صاحي جدا

أحمد منتصر يقول...

هع هع الله يخليك يا ذوق :)

أحمد منتصر يقول...

طب ده أحد ردودي عليهم:

يا لهوي إيه الناس دي كلها؟

البخاري رحمه الله معاصروه ومن بعده ممن شهد لهم المسلمون من أهل السنة اتفقوا على إنه راجل على دين وورع وتقبلوا كتابه بقبول حسن ومقولة أصح كتاب بعد كتاب الله هو صحيح البخاري لم تأت من فراغ

البخاري لمن درس علم مصطلح الحديث حط قواعد صارمة بل وتعجيزية للأحاديث إللي ضمنها ف كتابه المعروف بالصحيح وفي كتب تانية للبخاري زي الأدب المفرد الكتاب ده مفهوش نفس الشروط التعجيزية دية عشان كده هو فعلا فيه أحاديث ضعيفة لكن صحيح البخاري فيه زي ما قلت شروط تعجيزية زائد شروط صحة الحديث الأساسية عشان كده كان الحاكم رحمه الله وهو من هو في علم الحديث كان بيقول على أي حديث لم يضمنه البخاري صحيح: على شرط البخاري ولم يروه

الحديث الصحيح ببساطة هو كلام مروٍ عن الصحابة وهم فوق الاتهام طبعا إلى التابعين ودول علماء الحديث كانوا بيتحروا الدقة الشديدة عشان مياخدوش بحديث من واحد تابعي مدلس يعني بيدخل الأحاديث ف بعضها أو كذاب يعني بيألف أحاديث أو بينسى كتير زي التابعين إللي كبروا ف السن وخرّفوا أو شيعي بيألف أحاديث ف فضل أهل البيت مناقضة للعقيدة السنية
حتى روي عن دقة البخاري نفسه إن صحت القصة أنه ذهب إلى شيخ ليكتب عنه فرآه راكبا على حصانه يجري به! فلم يأخذ منه البخاري إن صحت القصة لأنه ف نظره بيحب اللعب!

عقليا في أحاديث محدش يصدقها ولما بنبص ف سندها الرجال إللي رووها يعني بنلاقيها أسانيد مظلمة ظلمات بعضها فوق بعض. لكن كتير الحديث مش بيوافق العقل المنفتح زي واحد مثلا اتربى ف الغرب ومصاحب بنات وبيدخن وبيمارس الجنس بصورة مشروعة مع حبيبته. أكيد في حديث مش حيوافق عقل الشخص ده. فهل معنى ذلك أن الحديث موضوع؟..طبعا لأ. خصوصا لو كان سنده نور على نور وكله رجال مشهود لهم بالصدق والعبادة والورع. أصل رجال الحديث زمان مكنوش بياخدوا إلا عن الأئمة غالبا. حاجة زي واحد دلوقتي نقل كلام سمعه من الشيخ الشعراوي رحمه الله. عن الشيخ شلتوت رحمه الله. عن محمد عبده رحمه الله. كده. فرجال السند دولا ناس فلة شمعة منورة منقدرش نقول لأ مينفعش ناخد بكلامهم. وأنا قلت إللي مش عاجبه حديث خلاص مياخدش بيه. لكن يحاول يغيّر ف الدين ده شيء غلط

هل حديث زي حديث بيقول إن أكتر أهل النار النساء بيجافي العقل والعلم؟. هو بيجافي العقلية المنفتحة ده شيء مفهوم. لكن بيجافي العلم ف إيه مش عارف؟. طب منشوف بقية الحديث هما ليه النساء أكتر أهل النار؟ عشان بيعملوا إيه يا رسول الله؟ وبعدين الجنس البشري كله مفهوش إلا الذكور والإناث..فطبعا لازم يبقى في حد منهم ف النار أكتر. ولا النار حيبقى العدد متساوي فيها ما بين الذكور والإناث؟

التبرير الاجتماعي مهم جدا. طبعا معروف إن عقيدة الإسلام قابلة للتطبيق ف كل زمان. لكن الفقه الإسلامي؟. طبعا لأ. طيب ما الرق كان موجود حتى عهد قريب ف الإسلام. فهل ده معناه إن الإسلام أخطأ ولا ده فقه إسلامي وحاجات اجتماعية مستحيل تتغير؟. وبالمثل فمجتمع المرأة كان زمان وحتى وقت قريب مجتمع يتحكم فيه الذكر. فهل ده معناه إن الفقه الإسلامي يطالب بحرية المرأة ومعرفش إيه دون الاعتداد بالواقع الاجتماعي؟. مستحيل طبعا وإلا كان العرب القدماء انجرفوا بقى ورا دعوات تحجيم المرأة وسابوا الدعوة للتوحيد وإقامة الدولة الإسلامية

لا مقدس إلا كتاب الله؟ طيب ما كلام النبي صلى الله عليه وسلم من كلام الله!. والنبي صلى الله عليه وسلم بكلامه كإنه موجود معانا لحد دلوقتي. فإن سمعنا كلامه أطعناه. وإن لم نسمعه نبقى خالفناه. ده كلام الناس القرآنيين إللي كفرهم العلماء لأن السنة إللي هيا الأحاديث الصحيحة هيا تلات تربع الدين

ربنا طبعا مش ظالم ولا عنصري. لكن الله سبحانه وتعالى من جهة أخرى يفعل ما يريد ولا يُسأل عما يفعل. طيب ما ربنا خلق الشيطان. هل خلقه عشان يفتن بيه المؤمنين؟ يبقى ربنا بيعبث. هل خلقه عشان يدخله النار؟ يبقى ربنا بيظلم. هل خلقه عشان وعشان..مش حنخلص ده كلام القدرية ودولا فرقة عقائدية معروفة خرج من عباءتها القرآنيين والفلاسفة الإسلاميين وغيرهم. ويقعدوا يسألوا نفسهم لحد ما يوصلوا لمسألة من خلق الله!؟. وعقيدة أهل السنة ف القدر إننا نؤمن بما يفعل وفعل الله إثباتا. والإرادة بتاعة ربنا قسمين: شرعية يعني دينية يعني الله يحب أن يؤمن الناس ويكره أن يكفروا. وإرادة كونية يعني الله وإن كان عايز الناس تؤمن إلا إن ناس كفرت مخالفة لإرادته الشرعية. وللتفصيل ارجع إلى أحد كتب العقيدة الإسلامية زي الواسطية لابن تيمية وشرحها لابن العثيمين

ستنا خديجة مكانتش بتشتغل دي كانت بتشغل فلوسها. وطبعا في فرق. أقصد إن الستات مكانوش بيخرجوا زي دلوقتي يشتغلوا فعشان كده الراجل كان ولي أمر المرأة

كلام الله ورسوله لازم يعقل فعلا. لكن الدين مبناه على النقل زي ما قلت سابقا. ولو الصحابة كانوا حكموا عقلهم بالطريقة بتاعتكم دية مكانوش آمنوا بمحمد صلى الله عليه وسلم. كانوا حيقولوا: إيه إللي بيقولوا ده جبريل بينزل عليه وإحنا مش شايفينه ويوحي له من رب ف السماء!!!؟ فالدين مبناه على التصديق بالنقل. فإن صدقنا النقل العقل بقى إجباري بيصدق

بالنسبة للحديث إللي ذكرته الأستاذة ميريام بلفظها: لاتكتبوا عنى ومن كتب عنى غير القرآن فليمحه وحدثوا عنى ولا حرج ومن كذب علي فليتبوأ مقعده من النار. فده حديث أي دارس لعلم مصطلح الحديث عارف إنه حديث منسوخ. يعني النبي صلى الله عليه وسلم أمر بكده وبعدين جيه عند موته فقالهم ما معناه: تعالوا أملي عليكم كتابا لا تضلون بعده أبدا. ومنسوخ يعني ملغي. زي ما القبلة كانت ناحية بيت المقدس. وبعدين الحكم اتنسخ وبقت ناحية الكعبة. وبعدين يا جماعة ما إنتوا مستشهدين بحديث على كلامكم أهوه. طب ما أنا آجي وأقول ده ضعيف وانتهى الأمر!

الأستاذة ميريام قالت حاجات غريبة جدا. فالنبي صلى الله عليه وسلم مش كل الوحي إللي جاله ف القرآن وبس. ويقدر يتنبأ بالمستقبل بإذن الله. ويوم غزوة بدر الكبرى بشر المسلمين إما بالغنائم وإما بالنصر قبل المعركة. وكلام النبي ينقسم لقسمين فقسم اجتهد هو فيه شخصيا وبعدين ربنا عاتبه أو غيّر حكمه. وقسم هو النبي حكم فيه من عند الله فالنبي هو كلمة الله ف الأرض لا ينطق عن الهوى أبدا حتى ف مزاحه

وأخيرا مساواة المرأة بالحمار والكلب فده إن عبرت بين يدي المصلي. يعني في تخصيص مش العملية كوسة هيا. وربما كان سبب المساواة هو إن المرأة ممكن تكون حائض. أو إن المرأة لما حتعدي حتشغل الرجل بالنظر إليها فصلاته تبطل

ملحوظة عابرة إلى الأستاذة ميريام والأستاذ غير المعرف: إنتوا مش عارفين تكتبوا عربي أساسا فليه بتفتوا بالشكل ده ف الدين؟

وكفاية كده منعا للإطالة :)

عصفور المدينة يقول...

أحمد ياريت تراسلني لأني على وشك أترك التدوين لفترة لظروف العمل ابعت لي رقم موبايلك عشان ننسق نتقابل

ســـــــمــــكة يقول...

مشكلة الناس انهم يا ابيض يا اسود
بيختارو ارائهم لمجرد الاعتراض على الطرف الاخر من غير حتى اقتناع داخلي...
من الاعتدال ان احترم السلفيين لان افكارهم حرية شخصية طبعا من غير اغصاب حد للخضوع ليه....واني احترم العلمانيين لنفس السبب بردو
ساعات تحس ان بعض العلمانيين (ساقوا)في بعض افكارهم لدرجة تخلينا نحس انهم طارو برة المنطق تماما ووصلوا لحد يخلينا نحس ان عقولهم حاوية للتمرد
واحيانا نلاقي تشدد (مضحك) لبعض السلفيين بحجة ان المجتمع خرب ومحتاجين للرجوع في كل امر للدين للاصلاح فتحس ان عقولهم بقت مزيج من التخلف على الجاهلية واشياء اخرى ليس لها معنى
كل ذلك يضعني في نقطة واحدة...ان اكون انا لا اتبع احدا ولا اعتنق افكار احد
نكون نحن فقط...سنشعر حينها اننا بشر طبيعيون منطقيون.
تحياتي

أحمد منتصر يقول...

عصفورنا:

يا لهوي نتقابل ونقعد نتكلم ف السلفية وكده ولا إيه؟

عموما أنا بعتلك رقمي على إيميليْك
بتاع الهوت وبتاع جميل

ابقى تعلالي بقى بعربيتك طنطا نعوم ف شارع البحر هع هع :)

تحياتي وربنا يستر :)

أحمد منتصر يقول...

سمكةةةةة:

فعلا أغلب الناس متطرفين. عشان كده خير الأمور الوسط

متفق فيما قلتِه وفي ناس كتير بتقول بكلامك ده وزهقتْ من كل الجماعات الدينية والفكرية وبقوا مستقلين

تحياتي ويا ريت تكوني الأيام دية أحسن :)

أحمد منتصر يقول...

يلا أهم بانوا على حقيقتهم وهدفهم القضاء على الإسلام :)

حطيت الصبح لينك الموضوع ف رد على موضوع عندهم مش لاقيه :)

التطرف الطبيعي للحاجة الساقعة بقى

s@gi l'ombre يقول...

قريت
ى حاجات عاجبانى
وحاجات موش عاجبانى
بس اللى متاكد منه
ان كلام زى ده لازم يترد عليه بدماغ رايقه وتفنيد علشان انتعايز تخترع دين وسطى مش مستند على اى دليل
لمجرد ان تطبيق الشريعه كامله بيبقى صعب
على كفره فى ردك ليا حسيت انك بتكلمنى كانى واحد منهم
انا اتمنىى ابىق واحد من السلفيين
اللى اعرفهم اللى هما انصار السنه
بس للأسف مش منهم
دوقتى انا بنفذ دينى صح بجروب مع زمايلى وفق الكتاب والسنه
بشكل ما يخلنيش اتعقد او ابقى تعبان قوى زى ما قلت
الكبت بيولد الانفجار وبيخليك تنحرف بكل مش متوقع
حبه حبه
الدين اوغلوا فيه برفق
دى وصيه الحبيب محمد صلى الله عليه وسلم
وصيه بجد لازم أقولهالك
اذا بليتم فاستتروا
يعنى بلاش تجاهر بالإثم أكيد عارف الحديث اكتر منى
اذا كنت قريت 100 كتاب سلفى
بجد دول ولا حاجه .. وعلى حسب قريت لمين
اسمع شرياط واحضر دروس علم
انا قرت ما ؤيربو عن العدد اللى بتقوله
ولسه مش عارف اى حاجه
بس عارف اللى يقيم دنيتى صح بلا تعقيد ولا تفريط
فاهمنى
مش زى ما انت واخده
بريئه
ياراجل
دى فى ايات نازله عن غض البصر تنسخ اى حاجه تقولها
وعن التسكع ف الشارع بلا هدف
دى الف باء دين اي ابو حميد
اسمى مصطفى علشان لو تعبت ف نطقه
تحياتى كتير لدماغك
بس اتمنى تعمل معادله أصح من كده
وبلاش تحمل نفسك سيئات قبل ما تعرف انت برتوح لفكر صح ولا غلط
ربنا يهدينا جميعا
اه نسيت
السلام عليكم
وبلاش لبانه التكفير دى كتير
انت عارف مش السلفيه اللى بتلوكها
سلام

أحمد منتصر يقول...

مصطفى
:

دين جديد إيه ووسطي إيه؟ أنا ببساطة بدعو إلى عدم التفكير بطريقة دينية
راجع مقالة: متخليش تفكيرك ديني

ليه تقعد تفكر ف دي حلال ودي حرام؟

كبر نافوخك

حكاية عدم جواز الجهر بالذنب دية متنفعش اجتماعيا

يعني إنت سمعت أغنية حلوة حتبقى عايز تكلم صاحبك عنها

لو شفت فيلم حلو شرحه

لو شربت سيجارة واتكيفت شرحه

لو شفت بنت حلوة شرحه

فلو خدنا بحكاية عدم جواز الجهر بالذنب دية مش حتخلص والحل إن تفكيرك يبقى مش ديني

أمال أنا بهاجم العلمانيين المتطرفين ليه؟ أصل الدين قيمة تاريخية كبيرة لا يجب تشويهها

لا للابتداع ف الدين

ولا برضه لتطبيقه بشكل كامل

وعليكم السلام الله يسهلو يا عم :)