الأربعاء، 5 مارس، 2008

كلماتي 1

هذا العمل (كلماتي) هو أفشل أعمالي مخاطبة للجمهور وبالرغم من ذلك أنا مستمر في كتابته منذ سنوات حتى وصل عدد الكلمات إلى ألف كلمة لا يصلح منها للنشر إلا كلمات معدودات.
هنا أعرضه بطريقة طريفة:

رجل يشرح النحوَ بالقميص العربيّ: أنا أحبه!
لما بشوف واحد بيشرح النحو أو اللغة عموما ببدلة وحالق دقنه بستغرب أوي. دايما بحب إللي يشرحلي لغة يبقى لابس جلابية وعامل دقن لطيفة كده.

مرّة أخرى نلتقي..فهل نعصي..أو نتقي؟!
حتة كده من أيام السلفية. تنفع فاتحة قصيدة أو حكمة تتعلق على باب أي بنك ربوي :).

لا تشاهدْ فيلما مع أحد!
لحد دلوقتي بحب أشوف الأفلام لوحدي ف البيت ع الكمبيوتر. أوقف الفيلم براحتي. أشغل معاه موسيقى لو فيلم ممل. حتى ف السينما بتمنى أروحها لوحدي خصوصا لو الفيلم مش كوميدي عشان أصحابي بيقعدوا يضايقوني أثناء الفيلم من فرط تأثري. عموما كده أو كده صديقي العزيز حَمّود بيدخلني السينما مجانا وطبعا مش حسيب العزومة وأدفع تذكرة ف فيلم خصوصا إذا كان مصري.

رأيت ما فعل الله بأحد العاشقين..فاستعذت بالله من العشق!
دي حتة كده من أيام السلفية. الواد العاشق إللي شفته ده البت بتاعته سابته علشان هو مفلس. القصة المعتادة يعني. جالي وقعد يعيط وكده. طبعا أنا أياميها كشيخ همام استحقرت ده جدا. ما عنها حاجات إنسانية جميلة ونبيلة إنك تتعلق ببنت وكده. عموما دلوقتي هل أنا أتمنى أقع ف العشق؟. همممممممم والله أنا عندي وقت فراغ كبير!.

شيء يفعله السفيه: الأكل من أجل الترفيه!
الحتادي من أيام السلفية لا أعادها الله. أيام ما كنت بحتقر الأميين. همممممممم دلوقتي شايف إن الأكل من أجل الترفيه حرية شخصية. وشيء لذيذ لأن الأكل نعمة من نعم الله من الجميل إننا نتحدث بيها.

يلا كفاية دول إنهارده وحبقى أرجع كل شوية بكلمات جديدة :).

أحمد منتصر
في
صفر 1429

هناك 6 تعليقات:

مشتاق لله يقول...

السيد احمد تعرف لما قرئت ماكتبته ضحكت جدا شكرا ليك لانك اضحكتني -بس عارف ليه لان كل ماذكرته لايفعله السلفيون معليش انت ماكنتش سلفي انت كنت مفلس والان انت تحاول تبني شخصية جديدة اتمني ان تحاول ان تبنيها بعقلانية اكبر ودراسة اشمل يكون الله مكونها الاول وصدقني حتي لو كنت علمانيا كما تقول ستحتاج لله -شكرا لانك سمحت لي بالدخول ودمتم سالمين

أحمد منتصر يقول...

يا هلا يا هلا بالإخوة العرب :)

غير معرف يقول...

اهلا بيك اخيرا عرفت اني عربي مش مصري -طيب ياعم بس اقلك علي سر انا احب مصر ادك وممكن اكتر منك ههههههههههههه -عموما مبروك المدونة الجديدة والله تحفة وخلي بالك مش هسيبك الا ان تحولني لعلماني او احولك لسلفي متزن يحب الدنيا ويحب الاخره معا ودمتم سالمين

أحمد منتصر يقول...

يا عم أنا عجينة ف إيديك شكلني زي ما أنت عاوز :)

رهف يقول...

اممممممم طب يارب ما تلاقى فرسة ولا حتة نعجة
ههههههههههههههههههههههههههه
مش انتا استعذت بالله من العشق
كمان بطل اكل عشان تخنت وبطل بلطجة يا بتاع السينما البلوشى انتا
وشيل الصورة ام كوفية دى عشان الدنيا حررررررررررررر اوى كفاية كده
انا بقالى كتير اوى مدخلتش انتا عارف بس مدونتك تحفة كمان المييل عندى مش شغال اشوفك ع خييييييييييييير
سلامو عليكو

أحمد منتصر يقول...

آية:

ههههههههه لا أنا عايز فرسة وفرسة أمورة كمان :)

والله أنا استعذت بالله من العشق زمان بس بطلت أقول الكلمة دية :)

بس العشق خطر عموما

لا أنا بتخن وبرفع عادي حسب كمية المشي :)

أنا شلت الصورة أم كوفية فعلا عشان التطور الطبيعي للحاجة الساقعة بقى :)

الله يخليكي أهم حاجة المدونة تعجبك وأنا فعلا نفسي أشوفك ع المسنجر لكن يلا ترجعيلنا قريب يا قمر ويا رب تكوني بخير دايما وصحة وعافية وشكرا ع التعليقات دية كلها :)

وعليكم السلام ف أمان الله

الله معك :)