الاثنين، 31 مارس 2008

الشهوة

Image hosted by servimg.com
الشهوة..لا تنتظر دعوة من أحد
نص إبداعي من الدرجة الأولى
محروس أحمد- جريدة الدستور المصرية
26 مارس 2008


جبهة..وجنتان..شفاه..أتمهل.
علمت في ذلك اليوم أنها تمتلك قوة ملاحظة وذاكرة قوية كخفاش، ففي المرة السابقة تعمّدت أن أديرها من شوارع عدة على وتيرة (ودنك منين يا جحا؟) قبل أن نصعد للشقة..ولكن هذه المرة قبل أن أنزل لآخذها طرقتْ باب الشقة..فتحتُ..فدخلت كسيدة البيت..خلعت حذاءها باستهانة ورمت حقيبتها على أول مقعد، وقبل أن تنزع دبابيس طرحتها كنت قد هجمت.
جبهة..وجنتان..شفاه..كتفان..نهدان..أتمهل.
وكأني أشعر بقرب نهايتي..أو نهايتها..كنت جائعا وكانت..لم أمد يدي على غير جسدها..أطعمتني بيدها. (هتاكلي إيه؟)..إنت مجبتش فراخ مشوية زي المرة إللي فاتت ولا إيه؟..الأكل جاهز ع السفرة..
الطعام من يدها فقط له طعم..أمسك بيدها..ألحس أناملها بتلذذ وأصوّب رماح بصري لعينيها..أدوخ.
وجهها يضغط على أعصابي برفق فيصيبها بخدر لذيذ، وذراعها المنتهية بأناملها تتحرك في الفراغ فتطيّرني معها..تصعد وتهبط وأنا لا أتعب..الجزء المنتظر اقترب..تصمت..تتكلم عيناها..لا أدعوها.. بل أنتظر الدعوة.
قدمان..سمانتان..ركبتان..فخذان..أتمهل.
قبلتها الأولى لن أنساها ما حييت..أستشعر طعمها في فمي وألوكها في بطء مستشعرا كل خلية من خلايا شفتيها..شفتها الأولى حلوة المذاق..شهية..لكنها ظالمة..لا تروي..أما السفلى (آه من السفلى) غليظة..قاسية..ترتعش..تنتصب..وتمارس بين شفتيّ الجنس الكامل.
جبهة..سمانتان..ركبتان..فخذان.
سقطت جميع الحصون..أدخل المدينة منتصرا..بلا مقاومة تذكر.

الخميس، 27 مارس 2008

قيظ

Image hosted by servimg.com
قيظ

شرب الماء لا أملك أفعل غيره. ومع سفّ وبلع ريقي أشعر بالاشمئزاز من لزوجة إبطيّ ولوْطهما بفعل التعرّق. (يع) تنط كل شوية ما بين كلماتي. عفوا محدّثي فالنار تحت كرسيي. أخلع فانلتي وأبقى بالداخلية. أدوّر المروحة وأرقبها بزفير محروق. أتململ في قعدتي. أراوح ما بين فخذيّ. الخروج إلى الشرفة في هذا الجو يا مخبولَ جنون. واللبس والانحدار نحو الشارع إلى الجامعة مجازفة.
تراودني نفسي بيد أن الكنز برذاذاته المنعشة لا يحل المشكلة. وأبقى أناجي سيجارتي حتى الظهر...

أحمد منتصر
في
ربيع الأول 1429

الأربعاء، 26 مارس 2008

عمرو دياب: مطرب لم تصنعه شركة وإنما صنع شركات

Image hosted by servimg.com
عمرو دياب علي مدار تاريخه إللي وصل 25 سنة لم يسجل في تاريخه إلا لـ3 شركات فقط هما صوت الدلتا وعالم الفن وروتانا وده إنجاز يحسب لعمرو وإن دل علي شيء فهو يدل على إنه مطرب بيهوى الاستقرار. كل منتج تعامل مع عمرو عرف إنه معاه سلعة رائجة وكان بيحاول يستفاد منه بقدر الإمكان ماكنش في منتج بيبخل علي عمرو بأية أموال لأنه عارف فلوسه رايحة فين وهترجع إزاي وكام؟
اقرأ المقالة كاملة ههنا:

الإل إم الأزرق شاحح من السوق

Image hosted by servimg.com
دخت عبال ما لقيت إل إم أزرق ووجدته أخيرا عند كشك قدام محل solo ف شارع سعيد. قلتله هو ماله مش موجود ليه؟. قاللي أصله شاحح من السوق والزباين بتزعل وكده. سألته ف فزع حيغلى ولا إيه؟. قاللي لأ دي الشركة سحبته من السوق عشان تكبّر العلامة التجارية!.

الثلاثاء، 25 مارس 2008

شلة الضياع

Image hosted by servimg.com
شلة الضياع

بعد الاستحسان إللي لاقته تدوينة (ليلة عيد الأم) من العيال بتوع الشلة. اقترحوا عليا تدوين الليلة دية كمان. العبد لله وافق لإن الموضوع ممتع جدا وأنا مغرم بطريقة تدوين الغربيين لما بيتكلموا عن حياتهم بالصور والفيديوهات. إذن ده نمط جديد من التدوين أتمنى ينتشر ف المدونات العربية.
مش من عادتنا كشلة ضياع نخرج يوم الاتنين بس أهوه أصلنا مش بنروح الكلية ف سبرباي عشان موجة الحر الرهيبة. ما عن النتيجة طلعت وأنا مدفعتش المصاريف مكسل أروح أدفعها وأعرف النتيجة. المهم الوالد كان عايز يعرفها تحت إلحاح الوالدة فجابها: راسب ف كل المواد طبعا والمضحك إن في مادة جيبت فيها صفر!! هع هع.
عادي خالص لما عرفتها قعدت أضحك ونزلت جيبت إزازة لتر شويبس يوسفي ساقعة. الوالد فرح أوي وقال أهم حاجة نشرب وشربنا أنا وأمي وأبي وأخويا إسلام ورقصني يا جدع!.
نمت الساعة خمسة العصر وكنت موصي سيد يكلمني الساعة تمانية يصحيني عشان نخرج. وبالفعل حصل. كلمني فيديو كالعادة العالم بتوع فودافون دولا فلة شمعة منورة بجد. ناس موز موز موز بصراحة. إيه يا بني إنت فين؟. قاللي أنا رايح لروميو أهوه البس إنت ولما أرنلك تعلالي أبو فريخة.
سيد واد عبقري ما شاء الله كان عنده مادتين ف الترم الأول السنادي بما إننا كلنا بنعيد تالتة حقوق وكل واحد شايل مواد على قد نيته. جاب ف مادة عشرة يعني ناجح. وجاب ف مادة تسعة يعني سقط فيها بس ممكن يترفع لعشرة وينجح بدرجات الرأفة ف آخر السنة. لما قابلته قلتله يعني ساقط فيها. روميو قال لا ناجح فيها بس يشد حيله ف الترم التاني!. إنت عِلماني أصلا مش فاهم حاجة!!. يا بني اسمها عَلماني إنت وهو بطلوا جهل بقى. مسكتوش وقعدوا يغلسوا عليا لحد ما حمود جيه.
أول ما اتقابلنا أنا وسيد وروميو روحنا الكشك بتاع سعيد مع محب شربنا ساقع. أنا شربت صاروخ ميريندا وجيبت علبة سجاير روزمان أحمر. ممممممم الأزرق أحسن متهيألي. روميو خد مني سيجارة ودخل عالم التدخين من أوسع أبوابه أخيرا. وسيد خد سيجارة كالعادة. كنت عاوز أجيب إل إم أزرق بأربعة ونص وكنت نازل جاهز بخمسة ونص ملقتش عند الراجل فخدت جنيه من سيد وجيبت روزمان.
قعدنا شوية جنب الكشك وبعدين روحنا عند h2o وقفنا هناك. الجو كان حلو أوي نسمات الهوا اللذيذة تخرجك من بقية سطوة قيظ النهار. في خاطرة اسمها (قيظ) حنشرها قريّب ع المدوّنة بمناسبة موجة الحر الشديدة دية.
وبعدين روحنا قعدنا ف عريشة حديدية مخصصة للعسكري يجلس فيها بالنهار قدام محل solo الحريمي. ممممممم زهقنا روحنا وقفنا قدام فتح الله. زهقنا برضه مشينا ف حسان ابن ثابت وبعدين حد من العيال عزمني على طبق كشري عند أصالة ف عمر بن عبد العزيز. طلعنا بعديها على شارع البحر أكبر شارع فيكي يا طنطا. حمود اتصل. إيه يا بني إنت فين؟. كان عايزني أجيله قال ميدان الساعة. أنا معايا سيد وروميو تعلالنا شارع البحر مع النادي. استنيناه هناك جالنا بالأتوبيس.
خد سيجارة. قلت لحمود أنا حبطل أقول عن نفسي علماني لحسن الناس العادية نظرتها وحشة للعلمانيين. أنا حقول ليبرالي. ويقعدوا يفكروا ف معناها سنة بقى!. روميو طلع مياتيني: إنت علماني ولا ألماني؟.
حمود جاب لب وسيد وروميو جابوا آيس كريم. وبعدين دخلنا على الشارع إللي فيه مستشفى المنشاوي. بعديها مشينا ف سعيد وحمود اقترح نقعد ف قهوة هارتي ف شارع النادي.
روحنا القهوة طلبت شاي. حمود وسيد طلبوا شيشة. سيد وروميو طلبوا كوكتيل فواكه. قعدت أشرب سجاير مع الشاي وبعديه. وشغلت كام أغنية زي أغنية فيلم كده رضا بتاعة هشام عباس. وأنا حر لعمرو دياب. قلتلهم إن رانيا زعقتلي إمبارح وشتمتني عشان واحدة اسمها وفاء سلطان باين مرتدة وبتهاجم الإسلام أنا قلتلها دية حرية رأي. روميو شتم فيا شوية ومُصر على إنها عِلماني بكسر العين.
وقعدوا يتريقوا عليا وعلى خليلتي سيجارة أبث في أنفاسها سخطي. فقررت ألحنها إغاظة ليهم.
حمود وسيد
Image hosted by servimg.com
Image hosted by servimg.com
Image hosted by servimg.com
مونتي
Image hosted by servimg.com
Image hosted by servimg.com
http://www.youtube.com/watch?v=oUoB1vgN9PY
روميو وإحنا ماشيين قال: تصدّقوا إحنا زي الواد العلماني ده مش بنصلي!!.

أحمد منتصر
في
ربيع الأول 1429

الاثنين، 24 مارس 2008

اضحك على السلفيين

Image hosted by servimg.com
ههههههههههههه مجموعة من السلفيين المتطرفين منهم واحدة فرحانة بنقابها أوي عملوا مدونة سمّوها (إلى الهدى إئتنا) قال إيه عشان مناقشة ومحاورة العلمانيين وغيرهم من متبعي الشبهات على حدّ قولهم. بسذاجتي اسبشرت خيرا وقلت: يا سلام ده السلفيين قبلوا وبدؤوا يتقبلوا الآخر أهوه!. رحت ف أول تدويناية وكتبتلهم نصيحة صغيرة:
قبل ما تدافعوا عن الدين:
عنوان المدونة فيه غلط لغوي أصلا (إلى الهدى إئتنا).
(ائتنا): من غير همزة.
فما كان منهم إلا أن صححوا الخطأ وحذفوا التعليق. وعجبي!!.

تلاوة من سورة فصلت

تلاوة من سورة فصلت للقارىء الشيخ أحمد منتصر

الأحد، 23 مارس 2008

تعدد أنماط التفكير

Image hosted by servimg.com
كلمتين في الجون

إيه!. لما كنت سلفي كانوا بيزرعوا ف أدمغتنا –نحن المراهقين- إن لازم يبقى تفكيرك ديني. ده أولا. ثانيا إن لا تبقى سلفي لا تبقى غلط: كافر أو مبتدع أو فاسق يعني مش ملتزم دينيا. وكم عانى العبد لله من مغبة التفكير الجميل ده. تفكير ضيق. مفهوش حدود للإبداع. وتبقى نظرتك للآخر وحشة أوي. وباعتراف الشيخ العثيمين فأغلب الناس مش سلفيين.
واحد سلفي بيشتغل ف توزيع البيض. كنت قاعد ع الكمبيوتر منهمك ف عالم تدوين الأفكار. قاللي: أنا على فكرة جرّبت حوار النت ده زمان. أي كلام وتضييع وقت. واتعرّفنا على نسوان. وجاتلنا طنطا هنا نسوان من إيطاليا. مبتسما هو. سألته في اهتمام: وإنت بتعرف إيطالي؟. طبعا دنا خرّيج آداب إيطالي وبكمّل دراسة فيها أهوه!. قلتله في انبهار حقيقي: ياه ما أنت ابن ناس أهوه!.
تبا!. هو إنت لإما تبقى ضايع لحد لما تندم على ما فعلت. لإما تبقى سلفي وتفكيرك ضيق؟. وهنا أتذكر مقولة ألماسية لأحد أصدقائي المنتكسين باقتناع عن السلفية: المتطرف بيبقى متطرف طول عمره سواء كان سلفي أو مكانش سلفي!. الله!.
اتعقدت منهم: تعدد أنماط التفكير ده شيء بديهي ومن أساسيات التفكير السليم إللي مبني على العقل. مش على طول تفكيرك يبقى ديني. وحتى لو كده. الداهية والرزية إنك تجبر غيرك يبقى تفكيره زيك.
المقصود بتعدد أنماط التفكير إنه: حادث. يعني موجود. في ناس فعلا تفكيرها اجتماعي أو مادي أو فردي. ومقتنعين بكده. يعني موجودين غصبن عن أتخن سلفي فيكم. وإنه طريقة لحل مشاكل كتير بتقابلك ف الحياة والدين كمان. زي مسألة: إزاي النبي صلى الله عليه وسلم وهو شيخ كبير يتجوز فتاة عندها تسع سنين؟. دي لو حاولت تفكرها وتحلها بطريقة دينية ستفشل. هنا يطفو على السطح التفكير الاجتماعي لإن ده كان عادي زمان. أو حتى التفكير العلمي لإن مدام الرجل الشيخ قادر على الجماع والفتاة بلغت يبقى مفيش مانع علميا.
والخلاصة إن طريقة تفكير السلفيين الدينية البحتة تودي لداهيتين. الأولى: تحجيم دور شباب وشابات فيهم طاقة كبيرة عن النواحي العلمية والإبداعية بحجة الحلال والحرام. التانية: تعميق الهوة ما بين الملتزمين دينيا وغيرهم. لإن مهما تعمل مش كل الناس حتبقى ملتزمة دينيا. وفي ناس مش عاوزة تبقى ملتزمة دينيا. وفي ناس شايفة إن الالتزام الديني ده مش هو الكمال..والمثالية.

أحمد منتصر
في
ربيع الأول 1429

فيلم في محطة مصر

Image hosted by servimg.com
فيلم في محطة مصر فيلم لذيذ بالرغم من إن الوالد بيقول إنه مقتبس من فيلم أجنبي. كريم عبد العزيز دمه خفيف بس عايز يخس شوية. منة شلبي بنوتة زي القمر وتمثيلها تقيل متنفعش ف الكوميدي ف رأيي. أغنية الفيلم جات بظروفها بتاعة إيهاب توفيق حلوة أوي. إخراج أحمد جلال كويس وهو مخرج صاعد وف خلال كام سنة حيبقى معروف أوي خصوصا إنه بيعرف يعمل أكشن كمان زي فيلم واحد من الناس.
موسيقى الفيلم معرفش لمين بس حلوة أوي. التصوير ف منطقة ريفية جميل جدا وياريت نزوّد من مناطقنا الريفية ف أفلامنا يا جماعة. الفيلم كفيلم مصري يعتبر فيلم جيد يستحق المشاهدة. عايز أعرف آراءكم فيه...
Image hosted by servimg.com
Image hosted by servimg.com
Image hosted by servimg.com

السبت، 22 مارس 2008

تاج من سارورة

اسمك؟
أحمد

اسم الدلع المشهور بيه وسط أصحابك؟
مونتي

كنت طالب شاطر في المدرسة؟
لحد إعدادي. من أول ثانوي بدأ العك

مجال دراستك؟
قانون

إيه كانت أحب مادة ليك في المدرسة و الكلية؟
ف المدرسة العلوم والرياضة وف الكلية الشريعة الإسلامية

كنت عايز تطلع إيه و إنت صغير؟
كاتب

اسم مدونتك؟
أحمد منتصر

لماذا اخترته؟
اسم معبر جدا

و ما هي نيتك من اختياره؟
بحب الوضوح فأوضح حاجة إن مدونتي تبقى باسمي علطول

صورتك في المدونة ... رمزيتها؟
هع هع..دي صورتي الشخصية

هل فكرت في إغلاق مدونتك؟
طبعا كتير

والسبب؟
لأنها بتجيب سيئات بالهبل

لماذا دخلت عالم التدوين من الأساس؟
التدوين بيديك استقلالية جامدة جدا وبيحسسك بذاتك ولما حد يدخل مخصوص
عشان يقرالك ويرد عليك.
التدوين طريقة سهلة جدا لعرض أفكارك ونشرها على نطاق واسع ومرجع سهل
لكتاباتك تقدر تعزو إليه ف أي وقت بسهولة.
التدوين ف مصر مهمة وطنية على كل كاتب يقدر يوصل بأعلى صوته صوت
المغلوبين والضعفاء والمهمشين إلى أبعد حدود.
التدوين حاجة بتخليك تفخر إنك بتستخدم النت استخدام سليم مش ف شات وتنزيل
مالتي ميديا وخلاص.
التدوين طريقة للتعرف إلى الأفكار والأخبار والثقافات من الشباب إللي زيك إللي
يقدر يوصلك المعلومة بأسرع ما يمكن بعكس أساطين المذهب إللي ممكن متفهمش لو قعدت معاهم منهم حاجة.
التدوين أرحب من عالم المنتديات.

حد قل أدبه في التعليق .. عملت إيه؟
كتير. بحذف التعليق

إيه اللي هيحصل لإيميلك لما تموت؟
لا تعليق

إديت الباسورد لحد قبل كدة؟ إيه كانت علاقتك بيه؟
آه. لرشا وحمّود ودولا من أصدقائي الأنتيم

شخصيتك... نوعها ايه؟
واضحة. ناصحة من النصاحة. استهلاكية. قابلة للتغيير للأحسن دوما.

مودك ايه؟
غالبا ما بكون مهيس جدا ولو عليا أرقص ف الشارع

الأكلة المفضلة؟
ممممممممممم بفضل المشروبات

السفر بالنسبة لك؟
شيء لذيذ

صفات أخدتها من بابا؟
البرود

صفات أخدتها من ماما؟
النصاحة

أكتر 6 حاجات بتكرهها؟
التعصب والالتزام الديني والإفلاس والإهمال والبنت المغرورة والمشاوير

أكتر 6 حاجات بتحبها؟
تقبل الآخر والتعلم وكسب المال والنظافة والبنت الودود والمشي لوحدي
الشغل بالنسبة لك؟
فلووووووووس

تمرر التاج لمين؟
رهف بتاعة هكذا أحب
ومشتاق لله بتاع حالة حوار
وأحمد رمضان
وسمكة

فرح بنت بنت عمتي: بنوتة لذيذة أوي

فرح بنت بنت عمتي مروى بنوتة لذيذة أوي ربنا يبارك فيها وف أمها ووالدها وأخيها محمد. الليلة كانت أول مرة أشوفها نتيجة إني مش من واصلي الأرحام للأسف. المهم البنت أمورة أوي أنا التقطتلها كام صورة وفي فيديو ف الآخر حمّلوه.
Image hosted by servimg.com
Image hosted by servimg.com
Image hosted by servimg.com

الجمعة، 21 مارس 2008

ليلة عيد الأم

Image hosted by servimg.com
ليلة عيد الأم

الليلة الخميس أنا والشلة بنخرج كالعادة. سيد اتصل بيا كنت لسه صاحي وبستحمّى عشان الفترادي أنا ليلي نهاري. طلعت من الحمام كلمته فيديو لإن فودافون عاملة لكل واحد 100 دقيقة فيديو. حبيبي ومعرفش إيه تعلالي بقى إيه..دلوقتي!. المهم قفلت معاه وأكلت بسلة ولحمة بالشوكة والسكينة والمعلقة بما إني بقيت علماني خلاص والأكل بالإيدين دقة قديمة!. ومأكلتش رز عشان من ساعة ما بدأت تدخين مليش نفس.
بعد كده دخلت الحمام تاني فضيت التنك. وبعدين لبست. وشغلت الدش لقيت فيلم ناصر 56 قعدت أتفرج عليه شوية. اتصلت بسيد. إيه يا بني إنت فين؟. قاللي أنا ف السكة انزلي أهوه. لبست الجاكت وأنا نازل لقيت الحاج جيه وبيقول الدنيا حر. قلعت الجاكت. ونزلت نص كم وكان الجو فيه هوا لذيذ.
قابلت سيد حبيبي عامل إيه؟. وبعدين قلتله تعالى نعدي على صاصا صاحبي السُني بتاع اللبس. عدينا عليه لقيت هناك علاء فاتح المحل. فين اللبس الجديد يا عم؟ مفيش. دورت على بنطلون جينز عنده يكون بُني. لقيت حاجة جباردين مجاتش على مقاسي. قست حاجة تانية كانت ضيقة شوية ومعجبتنيش أوي. تركي بـ75 كمان. استخسرت وقلت ف نفسي أستنى لما يجيب فانلات آخدلي فانلتين أحسن.
علاء وجعلي دماغي لما شاف علبة السجاير معايا. إنت بتدخن؟ وهو أساسا بيدخن. محبش حد يناقشني ف حاجة هو مش قادر يعملها. قعدنا نتكلم شوية عن الدينية والعلمانية. هو قاللي إنت غلط ومعرفش إيه. قلتله أنا عارف إني غلط دينيا بس أنا تفكيري مش ديني. والعلمانية هيا أنسب منهج للعصر ومفهاش تشدد. قاللي تشدد إيه؟ قلتله النقاب والدقن وتقصير البنطلون وعدم تقبل الآخر. لما كل واحد سواء مسيحي أو يهودي أو مسلم يبقى تفكيره علماني كده حنبقى حاجة واحدة.
وأنا وسيد ماشيين قاللي إنت مش عاجبك النقاب ف إيه؟ يعني ترضى إن حد يبص لمراتك؟ قلتله أيوه عادي. قاللي تبقى خول!. قلتله النقاب ده شيء غبي إزاي نلغي وجود جنس كامل؟ إيه ذنب الإنسان إنه أنثى؟. قاللي إنت مدخل نفسك ف حوارات ملهاش لازمة خالص. قلتله أبدا. إنت لازم تختارلك مرجعية لو واحد تفكيره ديني مسك البلد لو حرامي سرق حيقطع إيده. لو واحد زنى لو كان متجوز حيرجمه حتى الموت لو كان مش مجوز حيتجلد مية جلدة!. والبنات كلهم حيتحجبوا وبلاوي. قاللي مفيش حد يقدر يخلي الناس كلها متحجبة. قلتله لا يا عم ما طالبان لما كانت ماسكة أفغانستان كانت كل البنات متحجبة وكل الرجالة بدقون. قاللي برضه إنت مدخل نفسك ف حوارات ملهاش لازمة. قلتله لما تلاقي ف الانتخابات واحد علماني وواحد ديني وواحد ملحد حتختار مين؟. قاللي حختار الأنفع ليا. قلتله ما أنت حتعرف منين الأنفع ليك لو مدخلتش نفسك ف الحوارات دية؟.
حمّود اتصل بسيد إنتوا فين؟ سيد قاله قابلنا عند سعيد مع محب. روحنا هناك عن طريق امتداد شارع أنور وسيد تايه يا عيني ومش عارف هو فين. أصل يا جماعة سيد من العجيزي. الواد ده هو وحمود من العجيزي!.
وصلنا هناك فين حمّود؟ طبعا أبو مواعيد مضروبة لسه مجاش. قلت لأبو السيد تعالى نشرب حاجة من عند h2o أنا عايز أجيب جوز هند زي رانيا. قاللي لا أنا واكل أكل جامد ومش قادر. قلتله نجيب ساقع من الكشك إللي هنا قاللي مش عاوز. جيبت أنا ميريندا صاروخ وقعدت أمزمز فيها مع سيجارة روزمان. الواد سيد أخد سيجارة ع الله يبدأ بقى تدخين ونبدأ ناخد منه سجاير هع هع. سيد اتصل بحمّود إنت فين ياض؟ قاله عند مستشفى الأمريكان سيد سألني هيا فين دية شاورتله يمين وأنا باخد نفس من السيجارة ف تلذذ. أصل سيد ده مش عارف أي حاجة أصله من العجيزي. الواد ده من العجيزي لوووووول!.
أخيرا حمّود جيه حاطط حوالين عنقه شال أبيض. إيه يا جماعة هو حلو؟ قلتله حلو. حمّود أخد سيجارة معرفش لحد إمتى حصرف ع العيال دية؟ وعيال تانية أصحابنا جم والعلبة ادمرت رحت شاري من الكشك علبة روزمان أزرق تانية. يبقى كده الساقع والسجاير بـ 6 جنيه ونص. اتبقى معايا تلاتة ونص قلت مفيش h2o إنهارده.
شندي رابع الشلة جيه. قعدنا شوية جنب الكشك وبعدين قلنا نلف شوية. روحنا ناحية h2o وقفنا. وبعدين حمّود طلع ورقة بمية جنيه وقعد يتمنظر بيها بس كان عايز يجيب بيها حاجة لأمه من شارع النادي. انطلقنا لشارع النادي وهناك حمّود دخل محل هدية وأنا وسيد قعدنا نتصور.
ده حمّود
Image hosted by servimg.com
وده أبو السيد
Image hosted by servimg.com
مونتي
Image hosted by servimg.com
Image hosted by servimg.com
Image hosted by servimg.com

أحمد منتصر
في
ربيع الأول 1429

الخميس، 20 مارس 2008

كيف يتم اختيار الوزراء في مصر؟

Image hosted by servimg.com
Image hosted by servimg.com
كيف يتم اختيار الوزراء في مصر؟
مجتزأ من مقال أيمن نور في جريدة الدستور المصرية 19 مارس 2008


الوزارات في مصر مثل المكعبات يمكن فكها وتركيبها وهدمها وإعادة تسميتها دون مبرر إلا اللعب..ويكفينا أن أحد وزرائنا الأماجد تم اختياره من داخل دورة مياه!

أما وزارة الهجرة والمصريين بالخارج فلها قصة تبدو مضحكة لكنها قمة المأساة بل الملهاة –قل ما شئت بعد أن تقرأ التفاصيل- ففي عهد الدكتور عاطف صدقي وتحديدا في حكومته الثانية كانت الترشيحات استقرت على اختيار وزيرة قبطية وحيدة كوزيرة للهجرة والمصريين بالخارج ولأسباب معلومة لم يصادف هذا الاختيار قبول القيادات الكنسية التي قيل إنها طلبت من الأستاذة الجامعية المعروفة الاعتذار عن الوزارة كما أبلغت أسماء أخرى مرشحة لذات الوزارة أن تعتذر أيضا!!.
وقد توالت الاعتذارات عن هذه الوزارة إلى الحد الذي تأجل بسببه إعلان التشكيل ليومين قضاهما الدكتور عاطف صدقي بمقر الحزب بكور النيل بحثا عن بديل بينما الاعتذارات تتوالى عليه من كل الأسماء التي تم الاتصال بها!!.
في هذا الوقت كان الدكتور عاطف صدقي يتردد على الحمام المواجه لمكتب الدكتور يوسف والي أمين عام الحزب لأن صدقي كان مريضا بالسكر مما يستدعي هذا التردد الذي قاده بالمصادفة لحل أزمة التشكيل الوزاري!!.
ففي إحدى زيارات صدقي للحمام وجد شخصا يقف إلى جواره –لنفس الغرض- نظر إليه صدقي من أعلى نظارته السميكة وقال على طريقة (وجدتها): يا فلان إنت مسيحي!؟. فرد الرجل: نعم يا سيادة الرئيس!. فقال له صدقي: انتظر هنا ولا تتحرك. وغادر صدقي دورة المياه إلى مكتب يوسف والي حيث أجرى اتصالا عرض فيه اسم الرجل على القيادة السياسية التي لم تجد بدا من الموافقة لإنجاز التشكيل فعاد صدقي إلى الحمام ليصطحب الرجل وهو محام من الأسماء التي ترددت في قضايا التعويضات -حين ذاك- وأبلغه باختياره. لم يصدق الرجل نفسه وخرج مع صدقي من الحمام إلى الوزارة التي قضى فيها عدة أشهر واختفى اسمه من الحياة السياسية كما اختفت وزارة الهجرة والمصريين بالخارج من التشكيلات الوزارية اللاحقة!!.

الثلاثاء، 18 مارس 2008

الأعمدة اليومية بجريدة الدستور

Image hosted by servimg.com
سحر الكلمة

مرحبا. جريدتي المفضلة هي جريدة الدستور. أتابعها بشغف بصفة شبه يومية نظرا لضيق ذات اليد. ولولا الأخير كذلك لتابعت صحفا أخرى عدة: المصري اليوم. البديل. روز اليوسف. الوفد. والصحف القومية. وفي هذا المقال أحاول رصد حال الأعمدة اليومية بالدستور رصدا لينا عفيفا.
Image hosted by servimg.com
العمود الأول هو (من أول السطر) للمايسترو –كما يلقبونه- إبراهيم عيسى. وهو عمود سهل اللغة. ساخرها. أحيانا يكون دينيا في علم السيرة على وجه الخصوص. تتخلله العامية. ويضمّن من حين لآخر وجهات نظر جديرة بالمناقشة بحق.
Image hosted by servimg.com
العمود الثاني هو (عمود نور) للدكتور نبيل فاروق. وهو الكاتب البوليسيّ الأشهر صاحب سلسلة رجل المستحيل. وله تجربة احترافية في أدب الخيال العلميّ ألا وهي سلسلة ملف المستقبل. يتميز عموده اليومي بسهولة اللغة. تتخلله العامية. والسخرية الشديدة. ومازال متأثرا بأسلوبه الأدبي فيه. يحاول فيه الدكتور محاربة الفساد المتفشي في النظام المصري دون كلل.
Image hosted by servimg.com
العمود الثالث هو عمود صغير بعنوان (دنيا العجائب) لمحمد عبد القدوس. وهو عمود ساخر جدا. يمتلىء بعلامات التعجب. وهو من حين لآخر يلفت نظري إلى أشياء عجيبة متناقضة لم أنتبه إليها قبلا.
Image hosted by servimg.com
العمود الرابع هو (حلاوة زمان) للهرم اليساري الرابع أحمد نجم يحكي فيه أبو النجوم –كما ينادونه دوما- حكاو جرت له منذ عشرات السنين. يحكيها بلغة سهلة سلسة تتخللها العامية كثيرا. ومن حين لآخر يُفرد العمود كاملا لقضية ما. مثل قضة (الحجاب الإيراني) على حدّ تعبيره. وقضية الجماعات السلفية.

أما العمود الخامس فهو (أقول لكم) لرئيس التحرير التنفيذي للجريدة إبراهيم منصور. وهو عمود في رأيي جامد جاف. كنت لا أقرؤه قديما ولكني صرت أقرؤه حاليا من باب التعوّد ولرغبتي في معرفة الرأي الآخر. عموما هو عمود سياسي. يكرر كاتبه كلامه كثيرا عن قضايا حديثة بعينها. مثل (الترقيعات الدستورية) على حدّ تعبيره.
Image hosted by servimg.com
أما العمود السادس فهو (لوجه الوطن) لعضو حركة كفاية والناشط المشاغب عبد الحليم قنديل. وهو عمود سياسي دوما. لغته عالية. ويتيمز عن غيره من الأعمدة ببضعة سطور في نهايته تسبقهم كلمة (إشارة) يلفت نظرنا فيه الكاتب إلى خبر ما أو مفارقة مدهشة.
Image hosted by servimg.com
العمود السابع بحسب ترتيب الصفحات هو عمود (خلق الله) للكاتبة نجلاء بدير. وهو عمود خفيف ذو نكهة مختلفة بسبب رشاقة عبارة كاتبته وتحدثها عن هموم عموم المصريين. وهو من أفضل أعمدة الجريدة في رأيي وأعرضها شهرة.
Image hosted by servimg.com
نأتي للعمود الثامن وهو لكبيرنا الدكتور أيمن نور زعيم حزب الغد. العمود بعنوان (شباك نور) وتظهر صورة نور على رأس العمود وهو بداخل زنزانته. لن أتحدث كثيرا عن العمود كيلا أتهم بالتحيز المذهبيّ. ولكنه دائما عمود سياسيّ. ساخر لغته متوسطة. يتحدث فيه نور كثيرا عن حبسه: الأسباب والدوافع ومجلس الشعب.

العمود التاسع هو (أرابيسك) لأيمن شرف. وهو عمود يشبه عمود (أقول لكم) في النمطية المملة ولكنه أكثر من شبيهه إثارة بيد أنه ليس سياسيا دوما.
Image hosted by servimg.com
العمود العاشر والأخير وهو الأفضل في رأيي هو عمود الكاتب والمفكر الإسلامي العلماني الكبير فهمي هويدي وهو عمود بلا عنوان. قلت إنه الأفضل لأنه متنوّع الموضوعات. لغته سامقة. تتضمن كل مقالة منه عدة أفكار. كما أن أسلوب كاتبه تحفة فنية بكل المقاييس.
ما رأيكم أنتم أيضا بهذه الأعمدة؟.
أحمد منتصر
في
محرم 1429


الجمعة، 14 مارس 2008

مراتب الناس

Image hosted by servimg.com
كلمتين في الجون

كل واحد كده تلاقيه مقسم الناس عنده لكذا نوع. واحد يقولك الناس لإما جدعان. لإما أندال. لإما ناس طيبة وعلى نياتها. واحد تاني يقولك الناس لإما ملتزمين دينيا. لإما مش. لإما ناس جاهلة مش فاهمة حاجة.
عندي: الناس تلات أقسام. الأول: اليمينيين بكافة أطيافهم. إللي بيفكروا من وجهة نظر دينية بحتة. إللي متناقضين مع مجتمعاتهم سواء الشرقية أو الغربية. إللي شايفين الناس لإما أبيض يا إما إسود. وحري بهم السكنى في مغارة في العصور الوسطى أو ف خيمة. وشخصيا لم أعد أثق في أي تفكير ديني روحاني.
التاني: الناس العادية إللي ملهاش منهج محدد. تفكيرهم يميل لليمينيين وأفعالهم تميل للعلمانيين. وده بيرجع إلى إنهم سذج معندهمش لا ثقافة ولا مرجعية فكلامهم يناقض أفعالهم. وأفعالهم تناقض كلامهم. واتكلمنا عليهم ف مقالة (التفكير المعاكس: التفكير باتجاهين). أنا صحيح بحسدهم على راحة البال لكن التناقض شيء يضايق صاحب المرجعية للدرجة القصوى.
التالت: هو العلماني إللي تفكيره مادي مناسب للعصر ومش روحاني. والعلماني غالبا مش ملتزم دينيا بمعنى إنه مش بيواظب على الصلاة ولا حتى صلاة الجمعة. وغلط كتير من الناس إللي قالوا إن العلمانية مش ضد الدين. وغالبا هما خايفين من غضبة القسمين الأول والتاني عليهم. لكن ببساطة وريني العلمانيين إللي مواظبين على الصلاة كام واحد؟ ندرة. وده مش عيب بقدر ما هو توضيح لموقف ومسح للغبار إللي عليه.
بتوع القسم الأول مبيروحوش سينما ويقولولك حرام ويقعد ف بيته
أو المسجد. بتوع القسم التاني يقولك حرام لكن بيروح سينما أو ميروحش ويشوف الفيلم لما يتعرض ف التليفزيون. بتوع القسم التالت يقولك السينما فن هادف وجميل ويروح السينما وهو فخور بانفتاحه ومرواحه. لكن عموما إللي بيعمل حاجة وهو مقتنع بيها ومش بيجبر التاني إنه يعمل زيه هو حر لكن أهم حاجة ميكونش ندمان عللي بيعمله...

أحمد منتصر
في
ربيع الأول 1429

الخميس، 13 مارس 2008

ليلة برفقة رشدي أباظة وإحدى عشرة سيجارة

Image hosted by servimg.com
ليلة برفقةِ رشدي أباظة وإحدى عشرة سيجارة

انقطع سيل الإنترنت!، لا يضايقني الأمر بقدر ما يضايقني الملل. في رأيي أن الأشياء المزعجة تكرارُها يورث البلادة. كما أن الفراغ يؤتي الإبداعَ. بالتفكير والتأمل. وإن كانت الخبرات لازمة لحصول الإبداع بالطبع.
أكمل فيلم sweeny Todd فأكتشف زيادة تبلدي. النهاية مزعجة بحق. لا أجد أفلاما جديدة عندي. ما أفشلَ الحاسوب عند خلوّه. أفتش. أجد فيلم (جعلتني مجرما) لأحمد حلمي وإخراج عمرو عرفة. لهذا الفيلم عندي ذكرى خاصة. دخلته مع فتاة في سينما ريفولي بوسط البلد في القاهرة.
رشدي أباظة: العفيف. الساذج. الطيب. تضحك عليه ممثلتي المفضلة غادة عادل (يا لجمال اسمها!). ويمكثان في فيلا في الساحل الشمالي حيث البحر. بعيدًا عن التلوّث.
أفلستُ. لا أملك إلا إحدى عشرة سيجارة. ولن أتحصّل على مصروفي الشهري الهزيل إلا يوم عشرين منه. كانت علبة سجائر NEXT باقية. صرت أشرب منها ثلاث سجائر. صاروا ثنتين ليليًا. شربت واحدة عند منتصف الليل مع باكتة شاي ليبتون الأخضر، أشرب كل ليلة ثنتين كذلك كي أشرب الشاي الأخضر المر اللذيذ حتى هطول المصروف.
أخرج إلى الشرفة. أشغل قبل ذلك أغنية على الحاسوب. أتنفس دخان السيجارة ببطء وعمق وتركيز أشداء. التدخين مزاج عندي لا أقصد أدخن منظرة أمام الفتيات أو في الشارع. أدخن عند الحاجة.
يهلك التبغ حتى المرشح. أرميها آسفا. أراقبها وهي تهبط حتى تتبعثر على الأسفلت. أفتقد مشهد الدخان وهو يتموّج في الليل البهيم.
اتهمني ويتهمني البعض من أصدقائي بأني لا أعرف أضبط فتيات. أصحح له. أنا أساسا ضبطتُ فتياتٍ. إلا أني لا أملك اللمسة الأخيرة. لا أستطيع إكمال المشوار مع الفتاة. بيد أن ثلاث حاجات. أما الأولى فلأني مفلس. مصروفي ستون جنيهًا أستخسر أصرفه على فتاة وعندي كل الحق. وأما الثانية فلأني عندي صعوبة في النطق. لذا أحرص على ألا أتكلم مع الفتاة كثيرا والفتيات يحببن الرغي. لذا تتهرب مني الفتاة بعيدا. ذات مرة قبلتْ فتاة ضمنيا صعوبتي في النطق. إلا أني طلبت منها الابتعاد عني لأنها كانت بتتريق عليّ. ولأني لم أستطع ولن أستطيع مجاراتها في التريقة فلقد آثرت الفرقة.
وأما الثالثة فلأني أؤثر الصاحب على الصاحبة أو الرفيقة أو الزميلة. وهذا لا يرجع إلا أني جدع أو حتى عبيط!. بل يرجع إلى أني لا أطمئن للشخص إلا بعد معاشرة طويلة له. لذلك فالصُوَيْحِب الذي أعرفه من شهور أرفع منزلة عندي من فتاة عرفتها بالأمس. وتجدر الإشارة إلى أني لا أتعرّف إلى أحد. بل كل من أعرفهم تعرّفوا إليّ أو عرّفهم أحد إليّ. فردية. وهنا طرفة. ذلك أنّ لكل صاحب منهج من منهجه نصيب في نفسه سبق أو لحق لا بد. فأنا منذ طفولتي اعتدت الوحدة. وبعد ذلك اخترتُ العزلة. فكانت الليبرالية أنسب منهج بالنسبة لي لتقديسها الفردية. خصوصية الفرد. وحدة المجتمع ننطلق منها إلى ما فيه عدالة المجتمع. وحتى وإن قل أفراد اتجاه ما (كالمثليين مثلا) بالنسبة إلى غالبية المجتمع المغايرين. فإننا نطالب لهم ومعهم بحقوقهم الطبيعية لأنهم أفراد. جمع فرد!.
أفكار بالجملة تدور بذهني والليل في الشتاء طويل. أكتب قليلا في مقالة أشترك بها في مسابقة تابعة للأمم المتحدة عن الحقوق الفردية. جوائز المسابقة خمسون ألف جنيهٍ وأكثر. أمني نفسي برصيد في البنك يكفل لي مصروفا شهريا جيدا. يا كريم!.
وفي النهاية رشدي أباظة تنجح سذاجته في هداية غادة. يتزوجها ويدير أموالا وشركة كبيرة. أحيانا تكون السذاجة فاتحة خير على صاحبها. أرقص وليس برقص على الموسيقى. أفكر في تدخين سيجارة أخرى وليكن ما يكن. أختم الكتابة بنقطة.

أحمد منتصر
في
صفر 1429

نقول إيه بالفصحى

Image hosted by servimg.com
العبد لله بما إنه مصحح لغوي بيحب يفكر ساعات بالفصحى. ومن نافلة الفعلة دية إنه يحاول يغني بالفصحى. وفي أغاني بالعامية حلوة أوي لما بتتغنى بالفصحى بتبقى لذيذة. المهم دي أغنية (نقول إيه) بتاعة عمرو دياب بالفصحى:
ماذا نقول حبيبي أنت وأنا لا يوجد شيء نقوله
واصلين لدرجة حب في الدنيا لا أحد وصلها

أنا لك وعمري ما أكون يا حبيبي إلا لك روحي شاغلها
إن الثانية وأنت بعيد كيف قلبي سيتحملها؟

يا حبيبي أوصف فرحتي بك كيف صعب عليّ
أكثر يا قلبي ما حلمت منذ كثير صار بيديّ

السبت، 8 مارس 2008

التفكير المعاكس: التفكير باتجاهين

Image hosted by servimg.com
مساء الخيرده فيديو ليا كنت بقرأ فيه مقالتي (التفكير المعاكس التفكير باتجاهين). تهتهت فيه شوية. وغلطت فيه لغويا لأني مكنتش مشكله ف الورق. لكن الحمد لله طلع بصورة مرضية. بانتظار آرائكم :)
سحر الكلمة
التفكير المعاكس: التفكير باتجاهين

عندما يختار المثقف اتجاها ومرجعية له. فإنه يفعل ذلك على الأقل حتى تكون مواقفه واحدة ثابتة مستندة إلى نمط معين ومحدد من الاتجاهات والأيدولوجيات المختلفة المتباينة. وذلك على عكس رجل الشارع العادي والذي تكمن مرجعيته بالأساس في عاطفته أو قلبه. بيد أنه غير مثقف أو غير مطلع على أنماط التفكير المختلفة والتي يُعمل صاحبها عقله عن طريقها عند اتخاذ موقف محدد في قضية ما.
إذا اتفقنا على هذا الكلام السابق ندخل فورا في صلب الموضوع. ذلك أن رجل الشارع العادي عندما يعمل عاطفته أو قلبه في قضية ما فإنه يتذبذب بين اتجاهات سياسية ومذاهب فكرية مختلفة. فأحيانا يكون رجل الشارع العادي متأسلما أكثر من الإخوان كما حدث في مسألة تصريحات وزير الثقافة المصري فاروق حسني حول الحجاب. فلقد خرجت المظاهرات التي قوامها أناس عاديون لا تحكمهم أيدولوجية معينة في غضب عارم ينمّ عن حِمية وعصبية دينية ملفتة. بينما لا نرى مظاهرات مثلها إلا كل حين ومَيْنٍ نتيجة احتلال الولايات المتحدة للعراق أو احتلال فلسطين!!.
دعك من هذا..فعلى الأقل الخارجون في تلكم المظاهرات ليسوا بملتزمين دينيا بمعنى أن منهم من يدخن السجائر والنارجيلة. ومنهم من يرتبط بعلاقة حب تتضمن مقابلات وتلامس أيدٍ ونظرات محرّمة مع زميلته في الجامعة. بل ومنهم من إذا سألته ماذا قدّمت للإسلام؟ فغر فاه وتفصد جبينه من العرق وابتلع ريقه!.
ولقد جرى لي موقف يتعلق بموضوعنا من قريب. حيث قابلت أنا وصديق لي صديقا قديما. علمتُ منه أنه كان يعمل في مدينة شرم الشيخ مدلكا بستمائة جنيه. فلما أبديتُ الخيبة جرّاء تركه العمل هنالك نهرني قائلا: لا يا عم حرام!. ثم انصرف صديقي القديم تاركا إيانا أنا وصديقي نفكر. أعلنتُ أنا استعدادي أنا أعمل مدلكا في شرم الشيخ بستمائة جنيه. فنظر لي صديقي بدهشة وقال: يعني تأكل من حرام!؟. فسكتُ برهة مفكرا ثم قلت: أنت تقول لي ذلك وأنت تأكل من حرام!. أنسيتَ أنك توصّل للناس الإنترنت بوصلات غير شرعية قانونيا؟. ذلك أن الشركة الأم لا تسمح لك بفعل هذا!. فبُهتَ الذي نسي..واضطرب.

أحمد منتصر
في
غرّة محرّم 1429

الجمعة، 7 مارس 2008

صوري بالنهار عند h2o

صديقي العزيز محمد حسن جالي من دسوق فحبيت أورّيه h2o أفضل من يصنع العصير في طنطا كلها وهو بشارع سعيد لمن يزور طنطا ويرغب في تجربته. المهم العيال صوّروني هناك كام صورة كده حمّود صديقي العزيز حيتجنن عليهم ونفسه يروح برضه h2o يتصوّر هناك بالنهار. على فكرة أنا من ساعة ما عرفت h2o وأنا بشرب من عنده بوريو أو تشوكلت كيك. وهو مشروب بأربعة جنيهات ولكنه دسم ولذيذ.
Image hosted by servimg.com
Image hosted by servimg.com
Image hosted by servimg.com

الأربعاء، 5 مارس 2008

ولا تسرفوا

Image hosted by servimg.comImage hosted by servimg.com
كلمتين في الجون

الواحد احتار مع العلمانيين المتطرفين دولا!. بينقدوا على السلفيين حاجات هيا فيهم برضه: الصواب المطلق. وعدم قبول الآخر. وشتم المخالف واستحلال عِرضه. وموقفهم من الأميين. وحاجات.
ده غير إنهم أصلا مش فاهمين الدين صح. ودي حاجة أنا أجزم بيها. مبياخدوش بالإجماع!. وبعدين أعلامهم يبدؤوا يعملوا نفسهم مجتهدين وهما مش فاهمين حاجة ويفسروا النصوص على مزاجهم. فمنهم المستشار العشماوي إللي قال إن الحجاب مش من الإسلام!. أمال الأنثى المسلمة تصلي بإيه؟. وإن الخمر مدام إللي شربها موصلش لدرجة السكر تبقى حلال يا بني حلال!!. أمال ليه إللي يشرب خمر ف الدنيا ملوش خمر ف الجنة؟. ومنهم سيد القمني. وإللي بيقول إن القرآن نص تاريخي والأحاديث الصحيحة سندا محتاجة تنقيح عقلي (العب!).
وبيقولوا إن السلفيين متشددين دينيا!. قال عشان متمسكين بالنص. وده طبعا لعب عيال. لإن السلفية من أهم أدواتها التمسك بالدليل النقلي. ولولاه لفتح باب الابتداع ف الدين على مصراعيْه. هما آه السلفيين متشددين اجتماعيا. لكن دينيا؟ لا يمكن. وإللي يقول عليهم متشددين دينيا ده جاهل. أمال الحدادين والقطبيين وبتوع الجماعة الإسلامية دولا إيه؟.
وبيقولوا إنهم حركة مش فكرية!. قال إيه عشان بيعتمدوا على النقل. وكإن النقل ده مش محتاج إعمال العقل عشان تنفذه وتوضحه للناس. أمال إيه الكتب إللي عند كل سلفي دية ومجلدات قد كده؟. هما آه رجعيين ومتخلفين لكن ما هو أي حد سنده ألف سنة فما فوق رجعي يعني رجع بتفكيره لورا. ومتخلف يعني تخلف عن التقدم والحضارة الحديثة. والصفتين دولا مش شتيمة بقدر ما هما وصفين ف المقام الأول.
ومش عارف أنا مش ملاحق أرد ع السلفيين أقوم أرد على العلمانيين المتطرفين كمان؟. يا جماعة عايزين تتعلموا علمانية صح عندكم المسيري وأيمن نور والناس المعتدلة الجميلة دية. المسيري له مقالة حلوة أوي عقب تصريحات فاروق حسني عن الحجاب. قال فيها إن الحجاب له كذا بعد: اجتماعي كشكل. واقتصادي كتوفير. وديني كواجب. فحتى لو رفضناه من بعد أو بعدين أكيد حنقبله من البعد التالت. وأيمن نور قال ف موقف العلمانيين المتطرفين ف تركيا من الحجاب إن ده غلط إحنا مش حنفرض على حد ومش حنقدر أصلا نفرض على حد حاجة هو مش عاوزها. وإن الليبرالية المفروض نظريا بتتسع للجميع.
والخلاصة إن مهما اختلفنا مع السلفيين أو الإخوان أو غيرهم من المعتدلين فالمهم هو الرقي بمصر والنهوض بيها. وفي طاقات عند الناس دية مبهرة على استعداد لخدمة مصر بس عايزه تشجيع وتوجيه وإننا ناخدهم ف حضننا. والتطرف ف أي شيء مذموم. ولا تسرفوا.

أحمد منتصر
في
صفر 1429

كلماتي 1

هذا العمل (كلماتي) هو أفشل أعمالي مخاطبة للجمهور وبالرغم من ذلك أنا مستمر في كتابته منذ سنوات حتى وصل عدد الكلمات إلى ألف كلمة لا يصلح منها للنشر إلا كلمات معدودات.
هنا أعرضه بطريقة طريفة:

رجل يشرح النحوَ بالقميص العربيّ: أنا أحبه!
لما بشوف واحد بيشرح النحو أو اللغة عموما ببدلة وحالق دقنه بستغرب أوي. دايما بحب إللي يشرحلي لغة يبقى لابس جلابية وعامل دقن لطيفة كده.

مرّة أخرى نلتقي..فهل نعصي..أو نتقي؟!
حتة كده من أيام السلفية. تنفع فاتحة قصيدة أو حكمة تتعلق على باب أي بنك ربوي :).

لا تشاهدْ فيلما مع أحد!
لحد دلوقتي بحب أشوف الأفلام لوحدي ف البيت ع الكمبيوتر. أوقف الفيلم براحتي. أشغل معاه موسيقى لو فيلم ممل. حتى ف السينما بتمنى أروحها لوحدي خصوصا لو الفيلم مش كوميدي عشان أصحابي بيقعدوا يضايقوني أثناء الفيلم من فرط تأثري. عموما كده أو كده صديقي العزيز حَمّود بيدخلني السينما مجانا وطبعا مش حسيب العزومة وأدفع تذكرة ف فيلم خصوصا إذا كان مصري.

رأيت ما فعل الله بأحد العاشقين..فاستعذت بالله من العشق!
دي حتة كده من أيام السلفية. الواد العاشق إللي شفته ده البت بتاعته سابته علشان هو مفلس. القصة المعتادة يعني. جالي وقعد يعيط وكده. طبعا أنا أياميها كشيخ همام استحقرت ده جدا. ما عنها حاجات إنسانية جميلة ونبيلة إنك تتعلق ببنت وكده. عموما دلوقتي هل أنا أتمنى أقع ف العشق؟. همممممممم والله أنا عندي وقت فراغ كبير!.

شيء يفعله السفيه: الأكل من أجل الترفيه!
الحتادي من أيام السلفية لا أعادها الله. أيام ما كنت بحتقر الأميين. همممممممم دلوقتي شايف إن الأكل من أجل الترفيه حرية شخصية. وشيء لذيذ لأن الأكل نعمة من نعم الله من الجميل إننا نتحدث بيها.

يلا كفاية دول إنهارده وحبقى أرجع كل شوية بكلمات جديدة :).

أحمد منتصر
في
صفر 1429

ترفيه

حسبت ما صرفته اليوم:

- 8 سجائر بجنيهين تقريبا.
- 2,25 جنيها أكل.
- 1,25 جنيها مواصلات.
- بجنيه حاجة ساقعة.

يا لهوي أنا مسرف!...

الاثنين، 3 مارس 2008

استشعرت نفسي رجلا ظلاميا

Image hosted by servimg.com
خرجت إلى الشرفة أشرب سيجارة أفكر في صديقي العزيز الذي ضبّط أخيرا فتاة بعد حرمان عشرين عاما. كان جاري متدليا نصفه العلوي أمامي ينظر إليّ يستغرب تدخيني. نظرت إليه واستغربت عدم تدخينه!.
أفكر. وقبلها نصحته بألا يغلط غلطتي. ألا وهي ألا يعرّف فلانا وفلانا إلى فتاته الجديدة (!). أفكر. استشعرت نفسي رجلا ظلاميا من القرون الوسطى. أفكر. أتذكر فتاة عرفتها منذ شهور لعلها تقرأ ما أكتبه الآن نفرت مني كفرسة جامحة. في أول لقاء بيننا عرّفتها إلى صديق عزيز يشتكيني إليّ أني لا أضبطه. وفي ثاني لقاء عرّفتها إلى آخر كي يضبطني مع فتيات في كليته. وفي اللقاء الثالث والأخير جبت كل شلتي كيلا يشتكيني أحد أني لم أضبطه!.
أنفث نفسا تبغيا وأفكر. الفتاة زعلت لأني عرّفتها إلى أصحابي المحترمين. ثقلتْ. وظنت أنها أحلى البنات. أو ذعرتْ. وظنت أنها مشاعة للجميع.
أفكر. أعوج ضبي. أنظر إلى العمارة الجديدة. الظلام يحط. وقلبي ينط. وأتذكر أنه حتى الجامعة الأمريكية بها محجبات...

أحمد منتصر
في
صفر 1429

الأحد، 2 مارس 2008

تاج من ابن حجر العسقلاني

تاج من ابن حجر العسقلاني


مين من المدونين يصلح لتولى منصب
رئيس الوزراء فى دولة عسقلانيا العظمى
وزير الثقافة مختار العزيزي
وزير الإعلام وائل عباس
وزير التعليم مش لاقي
وزير البحث العلمى (أيوه .. البحث العلمى ليه وزارة لوحده) هأو مش لاقي
وزير الجامع الكبير (زى شيخ الأزهر فى الدولة الصديقة مصر يعنى) عصفور المدينة
وزير الصحة مش لاقي
وزير العدل
أنا
وزير الداخلية حسن الهلالي
وزير الخارجية أحمد الصباغ
وزير الهجوم (زى الدفاع فى دول تانية يعنى) حفصة
وزير المواصلات كريم أصله بيركب ميكروباص كتير
وزير المالية آبي عشان متريشة وعندها عربية
وزير الاتصالات محمد صلاح
وزير الزراعة رباب كساب
:)

السبت، 1 مارس 2008

ثبت بكل ما كتبته في نقد السلفية

هنا أورد روابط كل ما كتبته في نقد السلفية لأهميته لسببين: الأول أني كنت سلفيا يعني هذه شهادة من العمق. والثاني أني أرى أني أفضل من نقد السلفية على الإنترنت بأسلوب سهل موجز.
يحدث باستمرار
السلفيون الجدد
عودة الخريف
مريم بتعرف تلعب
تطبيق الدين
تدين سلبي
الخطورة السياسية للدعوة السلفية
زوايا خربة في الشخصية السلفية
شيطان اسمه حماس
ثلاثون عاما على المد السلفي في مصر
.... تنتقب
منقبة سايقة
خلي بالك من زوزو
لوهاس: البديل الصحي للسلفية
متخليش تفكيرك ديني
أيها المفتي اخرس
هل الملتزم دينيا هو خير الناس؟
أنقذوا أميرة
الإرهابي
السلفيون والجنس
الخجل عند بناتنا
السلفية غير صالحة لمصر
عليّ وعلى أعدائي
راديكالي قديم
العب العب العب العب
إسدال النقاب على العقل
أهمية الفن
دعوة مشبوهة
تنويه مهم
تعدد أنماط التفكير
اضحك على السلفيين
صوري أيام السلفية
موقف السلفيين من إضراب 6 أبريل
احترم غيرك يحترمك
الجو الذي يعيش فيه أطفال السلفيين
مسلم في الفضاء
اضحك على السلفيين ج2
دولة للسلفيين في مصر

العنكبوت

Image hosted by servimg.com
العنكبوت

تتشابك الأحداث وتتلازج. فأعيش البعد قبل القبل. والقبل بعد البعد. والوسط مفقود. فالتي ذوبتني عشقا قديما..انسلت عني بعيدا. طبيب يطلب مني ارتشاف رشفة ماء أتبعها ببلع قرص وردي باهت اللون. تزوغ عيناي بعد دقائق وأفترش المنضدة الوسيرة أمامه فيسألني عن ومضاتي التي خالجتني بالأمس. أأخذ شهيقا آخر غير الأول الذي نفثته بفجع. أعبق السقف بنظراتي الساهمة الطويلة وكأني غير سامعه. ثم أفضل في النهاية إغماض عينيّ على أن أتعذب مرتين.
كالعادة يا دكتور أراها. أنثى لا أعرفها أشعر أني أعرفها. وشعور لم أشعره أشعر أني شعرته من قبل. تتطاير مني التفاصيل فأراها في مكان أنا لست فيه. وأملس على شعرها الأزرق ناعما بنسيم الربيع وأنا أنظر إلينا على بعد أشبار. في الحقيقة واضح كالشمس أني أهلوس. ولكني نفيتها عن نفسي لأني ذات مرة رأيتني معها بداخل كنتاكي عندنا في بلدتنا. وأنت تعرف بالطبع أنّ كنتاكي طوباته الأولى لم توضع عندنا بعد واكتفوا بإعلان ضوئي كبير ينوّه عن قرب افتتاح المطعم. إذن..أنا أرى المستقبل. من الجميل أن تعرف. نعم بالفعل جميل. فأنت حينما تشعر مجرد شعور أن مستقبلك مشرق تنتعش. فما بالك بمستقبل مشرق صرت تراه بنفسك؟.
لعل طرف الخيط يفلت مني باطراد. والويل لدماغي المعقود من انفراط. بدأت القصة بالنسبة لي فعليا عندما كنت أتناول الغداء برفقتها في كنتاكي. الطعام لذيذ كالمعتاد وغصبا عنهم فقد دفعت مئة جنيه. وهي قبالتي تأكل ولا ترفع نظرها عني. أسعدني ذلك فأي ذكر يحب أن تنظر له الغيداء برضا. أكلنا أكلا لم يسبق لي أن استطعمت مثله قط. وكانت دعاباتنا عن الصدور الخاوية والأوراك النحيلة أجمل منه. أما أجمل ما في اللقاء فكان شعر صاحبتي المصبوغ والذي نبه علينا كل المبصرين فانتفشت لذلك مزهوا.
كان ذلك يا دكتور منذ عشر سنين. بدا لي أنه لم يسمعني وانشغل بحقني في ذراعي بشيء ما. ولكني استطردت وحركت رأسي تجاه النافذة أنظر إلى البدر متعجبا. إنه كان في تلك الليلة مبهرا. فما باله الليلة باهتا؟.
إنها لا تتذكرني قبل اللقاء. ولا أعرفها بعد الاشتياق. نزلت من سيارتي أنظر إلى الخدش الحادث بفعل احتكاك كاد يودي بحياتي وحياة سائق السيارة التي عرجت عليّ فجأة من الاتجاه المقابل.
نزل بدوره السائق..بل نزلتْ. كان شعرها ألحظ ما فيها. شردت لحظات بينما تقدمت هي إليّ قائلة وهي تلوّح في عصبية أن آسفة وأنها غفلت قليلا ذلك السبب. أعربت عن ألمي للطبيب الذي طالما كانت تصغي إليّ آذانه فلم يعبّرني بالمرة. بل فتح شقا بمشرطه في جلدي لصق قلبي. وصار يعبث بقربه وهو في أمسّ الحاجة إلى تربيت.
بحاجة إليكِ يا أمي الجديدة الفقيدة. بحاجة إلى حنانكِ. ضمتكِ لي الودود. وأقتل في نفسي بحثا عنكِ فأنتِ فاتنتي الدءوب. ألجمتني حلاوة كلماتك السكر. وعبقتني بورود يقطر منها العنبر. كنت في المرحلة الثانوية عندما وجدتهم يتحرشون بكِ. أقدمت على ما كنت أتجنبه طوال حياتي. ضربوني. سحلوني. قتلوني. ووجدتني بين ذراعيكِ وفي حضنكِ تلملمين مبعثرات كرامتي.
بحركة بشفتيها تعبر عن أنوثة بالغة. تختفي بدثار الحياء فتتوق لمعاودة لقياها. أنتِ حلوة قوي. أحبكِ قوي. كم حلمت بكِ زوجا أسكن إليه يطوقني يعانقني يهدهدني حبيبتي. وتتوهين فأضيع.. وتتلألأ عيناي.

شكرا للصديقة إيمان النجدي

أحمد منتصر
في
رمضان 1428