الأحد، 23 ديسمبر 2007

فيلم الجزيرة: فيلم كل إللي فيه فاكر إنه صح

Image hosted by servimg.com
كلمتين في الجون

فيلم الجزيرة فيلم جيد أديله 8 من 10. لكن أكتر حاجة شدتني فيه إن كل إللي فيه فاكر نفسه هو إللي صح. منصور المجرم السفاح تاجر مخدرات بيبرر إنه خارج على القانون عشان الواقع. والضابط رشدي لما كان بيتعاون مع منصور زمان عشان يقمع الإرهابيين كان فاكر إنه صح. ولما الإرهابيين خلصوا عاوز يقضي على منصور والمشكلة إنه فاكر برضه إنه صح. حاجة تحير وتدعو للتفكير. يعني هيا عشان مصلحتك ف إنك تعمل حاجة تعملها؟. دي أهم حاجة طلعت بيها من الفيلم. بجانب حاجات فرعية زي الإعجاب بالرجولة الحقة الصعيدية. وقصة الحب العُذري الجميل بين منصور وكريمة. وجمال التصوير والإخراج. وأخيرا أبعث بتحياتي إلى شريف عرفة وأحمد السقا وإلى كل صناع الفيلم.

أحمد منتصر
في
ذي الحجة 1428

من أجل العلمانية

Image hosted by servimg.com
كلمتين في الجون

بينما واحد صاحبي ولا سلفي ولا نيلة بل وبيشتم فيهم علطول بيسمع إنريكي إجليسيس لقيته بيقوللي: إنت بتاخد ذنوب كتيرة أوي عشان إدتني الأغاني دي!. اضطررت إني أقول خصوصا إن في ناس كانت معانا والمواقف دي بتأثر ف الواحد: الأغاني الأجنبية تجوز شرعا!!. وطبعا لا تجوز دينيا ولا حاجة.
المهم إني اكتشفت إن دور العلمانية حتى العلمانية الجزئية إللي مش إلحاد عند التطبيق بغض النظر عن الدراسة النظرية مش الفصل بين أحكام الدين والحياة السياسية والعلمية وبس لكن كمان أرباب العلمانية بيدّخلوا من وقت لآخر ف الخطاب الديني لدرجة إنهم ممكن يغيّروا ف الدين نفسه..من أجل العلمانية...

أحمد منتصر
في
ذي الحجة 1428

الخجل عند بناتنا

Image hosted by servimg.com
كلمتين في الجون

من العجيب في مجتمعنا إننا لما بنلاقي بنت خجولة كده وبتكسف ومقفلة الناس بتفرح وتقول عليها: دي مؤدبة!. دي قفل!!. وده ف الوقت إللي إحنا بننادي فيه بتفعيل دور المرأة السياسي والاجتماعي لإن المرأة مش مكانها البيت ده تفكير رجعي متخلف لأ المرأة والرجل سواء ومفيش فرق ما بينهم ف الحقوق والواجبات.
عشان كده لو عاوزين بجد نعمل جيل من المصريات يشرّفونا بحق وحقيق لازم نعالج الخجل عند بناتنا لإنه عادة إنسانية إذا زادت عن حدّها بتبقى مرضية وبتولد إنسان ضعيف الشخصية في حاجة دايمة للآخرين.

أحمد منتصر
في
ذي الحجة 1428

السلفيون والجنس

Image hosted by servimg.com
كلمتين في الجون

المرأة المتبرجة عند السلفيين شيطان يجب لعنه عشان جسمها كله عورة لازم تخبيه!. قمة التخلف والرجعية إزاي ندفن جنس كامل تحت النقاب؟. ده وأد البنات أيام الجاهلية أرحم يا عم!. ناهيك عن صور وأد البنات الحديث عندهم إللي بتقوم على العنصرية الجنسية برضه زي: حبس البنت ف البيت ومنع خروجها. التحكم في تحديد مستقبلها من عمل وزواج وطريقة تفكير دينية أو اجتماعية معينة.
زائد إن السلفيين بيمنعوا كل وسائل تفريغ الرغبة الجنسية حتى البريئة منها زي العادة السرية والتنزه ف الشارع (!) وطبعا العلاقات الجنسية قبل الزواج. طيب الحل إيه عندهم؟. أقولك يا بوب الحل عندهم هو (الأمر) بالزواج السريع. طب أصلا الناس مش لاقية تاكل يا شيخ!. يقولك لأ جوّزوا الشباب ولو ف أوضة!. وطبعا أي شاب فنتزي ومزازنجي ميرضاش لنفسه إنه يتجوّز وهو عنده 19 سنة لسه ويشيل مسئولية أسرة وبيت وكده من بدري. غير إن الزوجة غالبا مش حتشتغل يعني الولد يا عيني حيشتغل ليل نهار عشان يعرف يعيش!!.
الشيخ يقولك خلاص عايز تأجل الجواز يبقى عليك وعلى الصوم يا أخي!. يا عم الشيخ أبوس إيديك إحنا عايزين نخاطب شرائح اجتماعية مختلفة مش الملتزمين دينيا وبس. أنا مثلا مبستحملش الصيام خالص.
ده غير حلولهم بقى إللي تخليك تفطس على نفسك م الضحك زي: منع الخروج من البيت عشان ف الشارع فيه مناظر عارية!. وزي تحريم اقتناء التلفاز (إوعى وشك!) عشان بيعرض مناظر مثيرة للغرائز!.

أحمد منتصر
في
ذي الحجة 1428

السبت، 22 ديسمبر 2007

الحرية الجنسية: الحل الأسهل لجرائم الاغتصاب

Image hosted by servimg.com
كلمتين في الجون

لسه من قريب سواق ميكروباص بالدلتا حاول خطف بنت عندها 17 سنة واتنين صحابه لكن البنت صرّخت فسواق أتوبيس سمعها واعترض الميكروباص وتم إنقاذها بأعجوبة!. الشباب من الجنسين عنده كبت جنسي نتيجة لازدواجية ثقافة المجتمع وإللي بتترنح بين التشدد السلفي السعودي والانفتاح والحرية الأمريكية. يعني ما بين المسجد والتليفزيون!. الإسلاميون بيطرحوا حل الزواج السريع الميسّر بقالهم سنين لكن الحل ده متمّش تقنينه على كل زيجات الطبقة المتوسطة لسببين: الأول إن مفيش جهة أو جهات كبيرة تبنت الموضوع ده. ثانيا إن مش كل المصريين توجهاتهم إسلامية بحتة وإللي عايز يجّوّز دلوقتي بيبقى مرعوب موت من الالتزامات المادية خصوصا في ظل الأزمة الاقتصادية المصرية الحالية.
يبقى الحل من وجهة نظرنا كعلمانيين هو إتاحة الحرية الجنسية عن طريق إتاحة إيجار الشقق الخالية للشباب بالساعة. وتثقيف الشباب من الجنسين وتوعيتهم وتعريفهم بطرق منع الحمل واستخدام الواقي الذكري والكلام ده.
لكن سياسة الكبت المستمر وقطع المناظر الجنسية من الأفلام كل ده بيزيد من مشكلة الشباب من الجنسين الجنسية. وحتي إللي درسوه عن الأعضاء التناسلية ف المدرسة ف إعدادي حاجات هايفة وسطحية جدا ولا تغني ولا تسمن من جوع. وف المقالة الجاية حنتكلم عن موقف السلفيين من الرغبة الجنسية.

أحمد منتصر
في
ذي القعدة 1428

الغاية تبرر الوسيلة

Image hosted by servimg.com
كلمتين في الجون

كنت قاعد أنا وتيتا جدتي يعني ف البلاكونة. ولما شافت واحدة منقبة ف الشارع قالتلي: يا عيني الستات إللي بيخبوا وشهم دول أنا بخاف عليهم م الكتمة!. فأنا ضحكت. وبعدين سألتني: هو النقاب ده ف القرآن؟. لقيت نفسي بشاورلها في عصبية إنه لأ!. وف اللحظة إللي بعد كده قلت ف نفسي: يا لهوي دنا كدبت!.
بعد تفكير عميق اكتشفت إن ده هو الصح. ولازم نمنع كل الأفكار إللي بالشكل ده من إنها تسيطر على عقولنا حتى لو كانت موجودة ف القرآن. لازم دعاة العلمانية يبشروا بيها الناس ليل نهار لإن الإسلام لو طبّقت كل أحكامه حاجات كتير حلوة حتتغير: السينما. الموسيقى. الحرية الجنسية. الديمقراطية. حرية الاعتقاد.
نرجع للنقاب: مش عارف إزاي واحدة عاقلة تغطي جسمها كله من أوله لآخره بحتة قماش إسود غليظ؟. حاجة غريبة والأدهى إن كتاب كبار كتير ضد النقاب آه لكن بينادوا بترك الممرضات المنقبات يعملن على أساس إن النقاب ضمن حرية الاعتقاد والحرية الفردية!.
كلام غريب يعني لو جات جماعة راديكالية متطرفة شوّهت نفسها بوشم إسود مخيف على وجوه إناثها نسيبهم ينشروا أفكارهم ع البحري كده؟. ما إحنا لو سيبناهم الناس حتفتكر إنهم صح ويزيدوا ويزيدوا!.

أحمد منتصر
في
ذي القعدة 1428

في حب أيمن نور

Image hosted by servimg.com
كلمتين في الجون

في الحقيقة الواحد بينحني بمزيد من الإجلال والاحترام لسيد من سادات مصر ورجالها الشرفاء ألا وهو الدكتور أيمن نور. ف الذكرى التالتة 5 ديسمبر 2007 لسجنه معرفتش أروح ميدان طلعت حرب عشان أقف بجوار زوجته السيدة جميلة إسماعيل وإيد شمعة حب في حق أيمن نور بسبب ضيق ذات اليد.
لسه فاكر انتخابات الرئاسة ف 2005 إللي مبارك ضحك فيها على كل المصريين بوعود خايبة منفذش نصها. بينما السيد أيمن نور وضع برنامج انتخابي نشرته جريدة الغد ف وقتها كان قمة الرقي والنزاهة السياسية لكن لغياب الوعي السياسي عند المصريين وقتها محصلش صاحبنا إلا على نص مليون صوت وجيه ف المركز التاني في سباق الرئاسة بعد مبارك إللي خد أكتر من 80% من أصوات الناخبين المصريين.
أيمن نور يا إللي مسجون دلوقتي ف قضية ملفقة 100% وصحتك ف النازل أنا آسف عشان مقدرش أقدملك غير كلماتي المتواضعة في حقك دية. فاللهم إني أسألك بعدلك ورحمتك وحكمتك لطفا بعبدك أيمن نور فإنه أراد بالمصريين خيرا. آمين.

أحمد منتصر
في
ذي القعدة 1428

الجمعة، 21 ديسمبر 2007

حدد كليتك قبل مذاكرتك

Image hosted by servimg.com
كلمتين في الجون

ومفيش مانع إني أقولكم تجربتي عشان مش لاقي أحسن منها تعبر عن وجهة نظري. الحكاية وما فيها إني لحد نهاية امتحانات تالتة ثانوي بتاعتي مكنتش عارف لسه أدخل كلية إيه!. وكنت بذاكر ف ثانوي أي كلام لحد ما جبت 74,5%. وبعد التنسيق ما ظهر نصحنا الشيخ السلفي الطنطاوي سامح قنديل إللي أنا كنت بحضرله دروس كتير وقتها. نصحنا إننا ندخل آداب عربي عشان تكون عَونا لينا بجانب دراستنا الأساسية للدين. ولكن للأسف كانت النصيحة جاية ف وقت متأخر أوي بالنسبالي لإن التنسيق بتاع كليات الآداب إللي حواليا كان طالب أكبر من مجموعي.
المهم دخلت تجارة شبين الكوم بالمنوفية وضيّعت فيها سنة. وبعدين حوّلت حقوق طنطا وضيّعت فيها 4 سنين أهما وأنا مش مقتنع بدراستي فيها.
واضح أوي إني لو كنت حددت هدفي م الأول كنت زماني من أوائل دفعة آداب عربي بطنطا. عشان كده بنصح الشباب الصغير إللي ف إعدادي بإنه يحدد هدفه من دلوقتي. عايز تدخل كلية سياحة مثلا يبقى متدخلش ثانوي عام أساسا خش ثانوية فندقية. عايز تدخل تجارة م الأول يبقى عليك وعلى الثانوي التجاري. عايز تدخل زراعة يبقى إنت يا جميل مكتوب للثانوي الزراعي. عايز تدخل ألسن يبقى لازم تدخل ثانوي عام أدبي وتذاكر من أول السنة عشان الألسن بتاخد مجاميع كبيرة يا بوب.
لكن إنك تدخل ثانوي عام وتذاكر أي كلام وبعدين تدخل كلية والسلام..لأ يا حمام!.

أحمد منتصر
في
ذي القعدة 1428

مش شرط عشان تبقى راجل تعرف بنات

Image hosted by servimg.com
كلمتين في الجون

من المحزن إن الاعتقاد السائد عند أغلب الشباب إن الرجولة إنك تبقى معاك مزز كتير!. وتلاقي الشاب إللي ميعرفش يا عيني بنات منكسر كده على نفسه ومكسوف إزاي هو مش مزبط ولا بنت؟. يالهوي ده يبقى كده مش راجل!. يا عم الفرفور روّق كده وهدّي أعصابك. لإن الرجولة هيا مجموعة صفات كده مضروبين ف خلاط واحد: المروءة والشجاعة والثبات. صفات نبيلة ونادرة لما بتتوفر ف الدكر من دول بيبقى راجل مهما صغر سنه. لكن عمر معرفة البنات الكتيرة ما كانت بتخلي الواحد راجل. لأ العكس غالبا بقى لإن كتير من الشباب لما بييجي يتعرّف على موزة بيقدم تنازلات كتيرة زي التذلل ليها والميوعة والصرف بإسراف والاستظراف بقلة أدب واحتقار نوعيات معينة من البنات إللي مش بيكلموه والسمعة السيئة. وكل الحاجات ديا منافية للرجولة والجنتلة يا مان. طبعا ممكن تبقى راجل وتكون عارف بنات باحترامك برضه يا بوب وبأدب. لكن الشاهد إنه مش شرط عشان تبقى راجل تعرف بنات. وأخيرا وللعلم بالشيء أنا مش بقول الكلام ده لإثبات شيء ما!.

أحمد منتصر
في
ذي القعدة 1428

يا أحلى منهم

Image hosted by servimg.com
كلمتين في الجون

شاهدت مؤخرا كليب إيهاب توفيق الجديد إللي المقال باسمه وبصراحة التجديد إللي فيه والمميزات خلتني أتكلم عنه. فمثلا جسم إيهاب الرياضي لفت نظري بشدة ومعروف إن الرياضة بتقلل من عمر الإنسان وأنا افتكرت عمر إيهاب 30 سنة بس باللوك الجديد ده!. وبالنسبة لحركات إيهاب الرشيقة هو والموديل الشقية فأعجبتني جدا وإدت للكليب روح شبابية حلوة ومناسبة كمان لجو الأغنية. وطبعا مننساش تصوير الكليب السريع إللي بيلفت الانتباه. وبالنسبة للموديل فكانت جميلة أوي. أجمل من مطربات عربيات كتير. وأنا بصراحة نادرا وكل فين وفين لما بتعجبني موديل. موديل الكليب كانت عينيها حلوة ورشيقة وملابسها تحفة. كذلك كلمات الأغنية للفنانة الموهوبة حمدية التيتي كانت جميلة وفيها تجديد زي كوبليه: هالله على الجمال..هالله ملوش مثال..هالله جامدة أوي زي الكتاب ما قال.
وف النهاية الإخراج المتميز لفادي حداد لازم نشجعه عليه خصوصا إن العري تم توظيفه جيدا بلا إثارة ما عن الموديلز معصعصين أساسا!. وبالنسبة للأغنية نفسها فموسيقاها تم توظيفها جيدا عشان تكون سهلة الحفظ. كليب للتاريخ فعلا يا إيهاب.

أحمد منتصر
في
ذي القعدة 1428

الخميس، 20 ديسمبر 2007

ابن ضابط رتبة كبيرة بطنطا يثير الذعر بين الأهالي

دي صورة عربية جولف ف طنطا جايبها ضابط رتبة كبيرة لابنه العيل إللي ف إعدادي بيجري بيها ويا أصحابه ف شارع النادي بطنطا وشارع نادي المعلمين
نداء إلى محافظ الغربية يا عم الحق أحسن الواد ده لو خبط حد وحيحصل قريبا دمه حيبقى ف رقبتك إنت وأبوه سيادة الباشا الرتبة الكبيرة
Image hosted by servimg.com
والعربية بتبقى دايما راكنة جنب مديرية أمن الغربية عيني عينك
وأنا اقتنصت الصورة ديا وهيا راكنة لأول مرة ف شارع نادي المعلمين

شارع الحلو بطنطا غرقان

من تصويري
Image hosted by servimg.com
Image hosted by servimg.com
Image hosted by servimg.com

مش معقول

Image hosted by servimg.com
كلمتين في الجون

أثناء بحثي عن عمل وسط محلات مدينتي طنطا بأفجأ بحاجات عجيبة صارت أساسيات عند أرباب المحلات ديا. منها إنهم بيطلبوا واحد لعشر ساعات ف اليوم أو أكتر وأحيانا بلا إجازات أسبوعية!. والمرتب بيكون مش ملائم بالرغم من كمّ الساعات المبالغ فيه ده للعامل يعني بيتراوح من 120 جنيه إلى 300 جنيه بالكتير!. وده مرتب ضعيف جدا بالنسبة لواحد معاه شهادة دفع فيها أبوه دم قلبه عشان ياخدها سواء كانت متوسطة أو عالية. وكون إن أرباب المحلات بيقعدوا قد العمال ف المحل فده مش مبرر مقنع لساعات العمل الكبيرة. كذلك كون إن المرتب قليل عشان العمال دول مش بيستمروا لسنوات ف العمل فده برضه مش مبرر معتبر لشح أرباب العمل.
لذلك أنا بدعو للإضراب عن العمل أو عن التقدم للعمل عند أرباب المحلات الجشعين دولا. فإما تقليل ساعات العمل إلى 8 ساعات مع وجود ساعة راحة ف النص وإجازة أسبوعية. وإما زيادة المرتبات لتتراوح من 300 إلى 500 جنيه.
إن ما يفعله أغلب أرباب العمل من إرهاق للعمال حتى يصل الأمر بالعامل إلى المرواح والنوم فورا استعدادا ليوم عمل جديد غير معقول ولا مقبول وهو ظلم يحاسبون عليه يوم القيامة عند العدل سبحانه وتعالى.

أحمد منتصر
في
ذي القعدة 1428

مش عاوز أضيع مستقبلك

كلمتين في الجون

روحت لسايبر نت كافيه يعني يطلب شابا. قعدت مع عم الحاج صاحب السايبر قاللي إنت معاك إيه؟. قلتله أنا طالب جامعي. قاللي لا مينفعش أشغلك عشان مضيعش مستقبلك ده يبقى كده حرام عليا. ابتسمت في تهكم وقلت لنفسي: وأيّ مستقبل بعد كلية الحقوق!؟. وبعدين طلع الشغل 12 ساعة!!. قاللي: لو تعرف واحد صاحبك معاه مؤهل صنايع تعليم متوسط يعني ابعتهولي لكن إنت حرام تضيع مستقبلك عشان معطلكش عن المذاكرة!.

أحمد منتصر
في
ذي القعدة 1428

الوهم

كلمتين في الجون

شفت ولد وبنت شكلهم غلابة ماشيين ف الشارع فرحانين. قلت ف نفسي: يا ترى هو فاكر إنه حيرتبط بيها لما يكبر؟. ويا ترى هيا فاكرة إن أهلها حيوافقوا إنها ترتبط بواحد قدّها؟. حمدت ربنا على إني من المدرسة الواقعية وإللي بتمنعني من الارتباط حاليا لإن الواقع مش مساعد.
الوهم والأحلام إللي ناس كتيرة بتجري وراها صارت الطريقة المثلى للهروب من الواقع المر إللي عايشينه. عن طريق الحب. عن طريق الضحك. أو حتى عن طريق الإدمان!. ونصيحتي للشباب الصغير إنه يهتم بالشغل وبالحاجات إللي نفعها أكتر من ضررها.

أحمد منتصر
في
ذي القعدة 1428

السكوت المحرّم: مصريون ضد التعذيب

كلمتين في الجون

إيه شعورك لما تسمع عن أخوك إللي اتحرق حيا بقسم شرطة سيوة؟. ولا أخوك التاني إللي
رموه من بلاكونة بيته فمات قدام مراته وولاده بالعمرانية؟. ولا أخوك الطفل الصغير إللي عذبوه بالكهربا لحد الموت بقرية شها مركز المنصورة؟.
إيه شعورك لما الشرطة تاخد أختك وتعتدي عليها بالصعق بالكهربا ف أماكن حساسة وتعلقها من دراعتها وتسخن سيخ حديد وبعدين تكوي ثدييها وفخذيها!؟. وده حصل ف قسم شرطة رشيد فعلا!!.
لازم وقفة. ولا عشان بيحصل بعيد عننا يبقى ملناش فيه؟. لو الكل خد موقف من بهدلة إخواننا وأخواتنا المصريين ف الأقسام الحال حيتشقلب للأحسن...

أحمد منتصر
في
ذي القعدة 1428

الإرهابي

كلمتين في الجون

ف الواقع إن كل سلفي مرشح إنه يبقى إرهابي بين عشية وضحاها. لإن مصدر تفكير الإرهابي ف الأصل هو التفكير الديني السعودي المعروف بالوهابي. وده تفكير طول عمره كان محصور ومتمثل في شخصيات تاريخية معينة زي الأئمة الأربعة وابن تيمية وتلامذته ابن القيم والذهبي وغيرهم انتهاء بمحمد بن عبد الوهاب. وعمر التفكير ده ما قامت له دولة أو اعتنقه ناس عقلانيون يتسمون بالموضوعية.
وف النهاية كل أطراف الصراع وأبناء الجلدة الواحدة بيدفعوا التمن غالي زي ما بنشوف ف العراق. وعادل إمام حضناه إيدين شرين ندمان على ما اقترفت يداه من آثام بحق الجميع..يحتضر!.

أحمد منتصر
في
ذي القعدة 1428


أنقذوا أميرة

كلمتين في الجون

فجأة أميرة بنت الربيع البيضة الحلوة لقت أبوها ربى دقنه ولبس جلابية. وبعد شوية أخوها عمل زيه وبدأ يحفظ قرآن ويحضر دروس ف العقيدة السلفية والفقه الحنبلي. وليالي كتيرة كان بيبات ف أمن الدولة. أميرة لقت مرة أخوها داخل عليها بقماش إسود غليظ وقالها: ده اسمه النقاب. علشان جسمك حلو والرجالة ف الشارع ذئاب. أميرة لبست النقاب وبعد شوية أخوها قالها كفاية عليكي الإعدادية والبيت هو حجابك الأكبر!. كمان شوية أخوها جابلها عريس لقطة دقنه سودة طويلة واكلة نص وشه. وجلابيته قصيرة ميني جيب. وشايل نوكيا 3310.
رجاء حار: كونوا كلكم قاسم أمين وإنقذوا أميرة!!.

أحمد منتصر
في
ذي القعدة 1428

من فضلك رنلي

كلمتين في الجون

من الحصريات إللي بينفرد بيها الشعب المصري الرنات أو الـ missed calls . ودي للي ميعرفش الفقراء بيعملوها كل يوم جمعة أو كل عيد أو لمجرد رمي السلامات أو حتى للمعاكسات. وتلاقي كتير حد يزعل منك عشان مبترنلوش. بالرغم من إن ده شعار الفقراء وساعتها أقوله يا فقير. يقوللي خلاص اتصل مترنش!. أقوله خلاص حرن!!.
يا جماعة لازم نبطل عادة الرن دي عشان شكلنا قدام الأمم التانية. ولو رنينا يبقى ف أضيق الحدود وللضرورة القصوى.

أحمد منتصر
في
ذي القعدة 1428

الثلاثاء، 4 ديسمبر 2007

فوبيا الحسد

كلمتين في الجون

من رواسب الجاهلية على رأي الشيخ حسين يعقوب الخوف المبالغ فيه من الحسد. وكإنه إله تاني!. وتلاقي الواد طويل عريض كده وعنده ييجي 30 سنة وإحنا ف القرن الواحد والعشرين ومرعوب من الحسد بهيستريا. خللي بالك من فلان أصل عينه وحشة. مرة طبطب على رجل فلان كانت تاني يوم متعورة!. وأنا مسخسخ على نفسي م الضحك. يا بني عيب بلاش التفكير الرجعي ده إحنا ف الألفية التالتة.
الحسد ثابت فعلا ف القرآن. والنبي صلى الله عليه وسلم اتسحر وبعدين جبريل رقاه وبقى بيرقي نفسه كل ليلة قبل النوم. وبس كده من غير لمس خشب ولا تخميس ف الوش ولا تبخير ولا خرزة زرقة. فوقوا بقى يا قوم ومتضحكوش الناس علينا!.

أحمد منتصر
في
ذي القعدة 1428


الأربعاء، 21 نوفمبر 2007

هل الملتزم دينيا هو خير الناس؟

كلمتين في الجون

في فكرة غلط تماما منتشرة بين المصريين ألا وهيا إن الملتزم دينيا هو أحسن واحد وخير الخلق أجمعين وهو البوب الكبير. وده بيرجع إلى إن للدين ف قلوب المصريين هيبة بالرغم إنهم مش ملتزمين بيه. المهم تلاقي الواد لسه صغير ف السن ومربي دقنه ومش عارف إيه والناس تقوله يا شيخ وتقضيله مشاويره بترحاب مبالغ فيه وكإنهم حياخدوا ثواب أكبر لما يعملوا كده هوه.
لأ لازم نعرف إن الملتزم دينيا ملتزم لنفسه. وفيه إللي أحسن منه. وأحسن واحد ف المجمتع على التحقيق هو عامل النضافة لإنه بيشتغل لينا مش لنفسه. ونفعه متعدي. والمسئول الشريف. والقاضي العادل. والمدرس المفيد الخلوق. عشان كده متستغربش لو لقيت حد مربي دقنه عشان الناس تعامله كويس!.

أحمد منتصر
في
ذي القعدة 12428

الأحد، 11 نوفمبر 2007

مطلوب مؤهل عالي


كلمتين في الجون
من أكتر الحاجات إللي بتضايقني أثناء بحثي عن وظيفة إني ألاقي مكتوب: مطلوب ناس مؤهلات عليا للعمل كمندوبين مبيعات!. أو للعمل في أي شغلانة تافهة مش محتاجة التخصص إللي بيوفره بكالوريوس التجارة أو ليسانس الحقوق أو غيرهما.
وده غلط. لإن بكده إنت كرب عمل ممكن تخسر موظف كفء بس معاه مؤهل متوسط مثلا. وإنت كان كل هدفك من طلب موظف بمؤهل عالي إنه يكون مؤدب وابن ناس. كإن إللي معاه مؤهل متوسط ابن ستين كلب. مش ده تفكيرك برضه؟.
لازم أرباب العمل يراعوا الحالة التعليمية إللي بتمر بيها مصر حاليا. الحالة إللي تخلي صاحب المؤهل العالي حمار مش فاهم حاجة. وابن الناس الفقير مش قادر على مصاريف المؤهل العالي فيكتفي بمؤهل متوسط. ومتقولش تاني مطلوب مؤهل عالي!.
أحمد منتصر
في
شوال 1428

أيها المفتي اخرس


كلمتين في الجون
فضيلة المفتي أفتى يا أختي إن 147 مصري غلبان كحيان غرق ف البحر طلبا للرزق وهربا من الاضطهاد غير شهداء لأنهم طماعين ووحشين وغير طيبين!. أيها المفتي اخرس!. مش كان الأوْلى تتكلم عن سبب هجهم من البلد؟. مش كان الأوْلى تتكلم عن خمستاشر ألف مصري بيرحلوهم كل سنة لمصر عشان مهاجرين غير شرعيين لبلاد أخرى؟. هما ليه هربوا؟. من إيه كانوا خايفين؟.
فين الشغل إللي وفرته الحكومة ليهم؟. فين الأمن إللي وفرته الداخلية ليهم؟. فين المستقبل الجميل إللي مستنيهم في ظل وجود شخصيات زي جمال مبارك وأحمد عز في سُدّة الحكم؟. أيها المفتي اخرس!.
أحمد منتصر
في
شوال 1428

منتهى الدكتاتورية


كلمتين في الجون
زمان كان الأب هو المتحكم ف أسرته لدرجة إنه كان يقدر يبيع ولاده ويئد بناته!. وكان الأب إذا مات يئول الأمر إلى أكبر أبنائه من بعده. منتهى الدكتاتوية. بس دلوقتي الكلام ده معادش مناسب للواقع. يعني لا يجوز إن الأب يفضل يتحكم ف أبنائه عقائديا ودراسيا ومهنيا واجتماعيا. لازم وقفة. لازم الشاب ينفصل تدريجيا من صغره عن البيت. ويشتغل ويعتمد على نفسه. عشان ساعة ما يبلغ سن الرشد 21 سنة يقدر يستقل بنفسه تماما بعيدا عن سيطرة الأب المتمثلة في البيت الوحيد. وساعتها الأب مش حيقدر يتحكم ف اختيارات ابنه مستقبليا. وبالنسبة للبنت فهيا عايزه كذا مقالة لأنها موضوع كبير زي السلفيين كده.
أحمد منتصر
في
شوال 1428

صحة المصري


كلمتين في الجون
كالعادة وزي كل سنة السحابة السودا مغطية جزء كبير من الدلتا من غير ما ناخد ولو خطوة بسيطة لحل المشكلة. المشكلة إن السحابة السودا بتسبب بريحتها الشبيهة بالسولار والبلاستيك المحروق أمراض صدرية وتنفسية ونزلات رَبْوية. وناس كتير بتصاب من السحابة بالتهاب رئوي حاد!. وحسب علمي أكتر محافظتين متضررين من الموضوع ده هما الغربية والمنوفية. يعني الأمر يهمنا بدرجة كبيرة يا أهل طنطا.
لازم الحكومة توفر المكابس لأنها البديل الصحي لحرق مخلفات المحصول. ولازم نواب الشعب يهتموا بالأمر ده جدا وينقلوه للمسئولين لأن صحة المصري فوق كل اعتبار.
أحمد منتصر
في
شوال 1428

الأربعاء، 7 نوفمبر 2007

أول موقع لطنطا وأهل طنطا

دلوقتي اشترك في أول موقع لطنطا وأهل طنطا

الاثنين، 5 نوفمبر 2007

متخليش تفكيرك ديني

كلمتين في الجون

خرجت إمبارح للتمشية وترويق البال وبينما كنت بسمع عمرو دياب وآخر روقان جالي واحد سلفي. سلم عليا وسخر من سماعي لعمرو دياب. اتهمني بالتفاهة لأنني أقف ف الشارع بالشبشب ساندا على عربية سامعا عمرو دياب!. أخذ يأمرني باتباع المنهج الصحيح على حد قوله والمحافظة على الصلوات ومراجعة القرآن والجلوس مع الإخوة.
قلتله إن الحاجات دي مش هيا القمة. لكن الأهم منها هو خدمة المجتمع والدولة والأهل. قاللي إنت تافه شايفك واقف ف الشارع أهوه ومش بتعمل حاجة. قلتله متخليش تفكيرك ديني خليه علماني. قاللي هو ربنا خلق الناس ليه؟. قلتله الناس ف الدنيا مش تهمة إنهم يستمتعوا بحياتهم.
سألته عن عمل لي. فأخذ يشكك في قدراتي. ونصحني بأخذ دورات ف الكمبيوتر واللغة والكومينيكيشن. وأرجع تركي للسلفية إلى إني كنت أصلا سلبي فيها. سلمت عليه وروّحت متبضين!.

أحمد منتصر
في
شوال 1428


الجمعة، 2 نوفمبر 2007

تقسيم المقسم

كلمتين في الجون

ما يتقسم!. أنا صحيح تفكيري وطني ف المقام الأول لكن إللي خلاني أتكلم ف الموضوع ده هو تعصب كتير من القوميين العرب لعدم تقسيم العراق لأنهم ببساطة اتعوّدوا إن العراق دولة واحدة. وده بغض النظر منهم عن أية اعتبارات محلية خاصة بالعراق.
العراق يا جماعة فعلا متنيل على عينه وفيه كذا طائفة: فالعرب السنة موجودين ف وسط العراق بما فيها بغداد. والعرب الشيعة موجودين ف جنوب العراق وخصوصا البصرة. أما ف شمال العراق فالأكراد ينفع تتعملهم دولة جميلة كده محندقة ونتخلص بقى من مشكلة الأكراد.
وبالنسبة للمثقفين والسياسين العراقيين فأنا لاحظت إن الغالبية العظمى منهم تحض على التقسيم الإداري. وإن كل منطقة من المناطق التلاتة يكون حكمها ذاتي. جميل. ويا جماعة التقسيم ده واقع فعلا يعني إحنا طبقا للنظرية الواقعية مجبناش حاجة جديدة من عندنا. والموضوع مجرد تقسيم المتقسم!.

أحمد منتصر
في
شوال 1428

الأربعاء، 31 أكتوبر 2007

انسى الكمال

كلمتين في الجون

كتير لما الواحد بيلوم إللي معاه عشان سبب تافه. زي واحد خد من واحدة ميعاد مجاتش. يا سلام يقوم يسيبها!. لا يا أخويا خليك وراها لحد ما ييجي منها.
والإنسان الكامل ده معادش منه خلاص. انتهى ونسخه الكربونية باظت. والزمن ده زمن النقص. ومفيش بركة. إللي معاك متلقيهوش مخلص ليك لإن الحياة اتغيرت وبتتجه كل مدى للمادية والذاتية والأنانية. ده حتى الوقت مش ف صالحك يا راجل.
عشان كده ارضى بالقليل. وإللي تلاقيه إنهارده ممكن متلاقيهوش بكره. وصاحب ضرره مش كبير أحسن من صاحب ضرره كبير. وانسى الكمال.

أحمد منتصر
في
شوال 1428

قناعة

كلمتين في الجون

ساعات الواحد بيبقى نفسه ف حاجة. ونفسه فيها أوي كمان. بس مينولهاش. أو ينول منها القليل. أو ينوله منها التعب ووجع الدماغ. والحكاية دي كتير ما بتواجه الإنسان. خصوصا الإنسان متوسط الحال من أمثالنا. والحاجة تبقى قدام عينيه ومش قادر ينولها.
والحل إللي بينصح بيه المتخصصين هو تذكر نعم الله علينا الكثيرة. زي نعمة البصر. نعمة الصحة. نعمة العقل. نعمة الإسلام. نعمة المنهج السليم. نعمة الفلوس. نعمة الوالدين. نعمة القبول عند الناس. وهيا نعم كتير والله بس سبحان الله الواحد مبيفكرش فيها كتير. وييجي عند الحاجة إللي ناقصاه ويفكر فيها. وياما ناس نالت الحاجة إللي ف بالها وبعدين ركنتها على جنب بعد كده م الزهق.

أحمد منتصر
في
شوال 1428


لوهاس البديل الصحي للسلفية

كلمتين في الجون

إنهارده أنا بقدم نمط حياة فيه نتايج الفكر السلفي وأهمها الراحة النفسية عشان محدش يقول إنت مقدمتش البديل. البديل هو نمط الحياة الصحي والمعروف باسم لوهاس Lohas. وده تفكير ظهر ف أمريكا سنة 1998 وعدد أتباعه هناك 68 مليون. وانتشر ف أوروبا وعدد أتباعه هناك 80 مليون. ووصل للصين ف آسيا. وأدينا بنحاول ندخله العالم العربي أهوه.
ومن مميزات التفكير ده إنه بيجذب الشباب زي السلفية. حيث يعتمد على الزهد ف التكنولوجيا الحديثة عن طريق استخدام المواصلات العامة. وتناول الأطعمة النباتية. ولبس هدوم المنسوجات الطبيعية. والاستعداد لشراء الأدوات المستعملة بدون كسوف. والحفاظ على البيئة. وممارسة الرياضة زي الجري. وزيارة الأماكن السياحية.
ولوهاس بيخلي الواحد هادي علطول ومروّق. وحياته بتكون مفيدة له وللبيئة ولغيره. وهيا طريقة مناسبة جدا للفقراء. ومفيدة جدا كمان للصحة عشان الأكل النباتي. وسهل جدا الدعوة ليها لكسب رضا الرب.

أحمد منتصر
في
شوال 1428

الأحد، 28 أكتوبر 2007

خلي بالك من زوزو

كلمتين في الجون

زوزو الفنانة البريئة اتصدمت إن ف الجامعة أفكار هدامة ورجعية اسمها السلفية. السلفيين هاجموها وحاربوها عشان بترقص. زوزو اتعقدت إزاي يبقى في أفكار متخلفة ورجعية زي دي ف منبر العلم الجامعة؟. زوزو سابت الجامعة. زوزو اتجهت للفن. زوزو بقت ضحية الأفكار السلفية.
إن الحكومة المصرية ترتكب جرما لا يغتفر في حق أبنائها وبناتها بترك الحبل على الغارب للسلفيين يرتعون مخلخلين أصولا وثوابت يرتكز المجتمع المصري عليها منذ عشرات السنين.

أحمد منتصر
في
شوال 1428

التعدي على حديقة جدي

حديقة جدي والتي كانت أجمل ما في شارع أبو فريخة والشهير بشارع كفر عصام أمام مساكن الموظفين بطنطا تم تخريبها من قبل الجهلاء
Image hosted by servimg.com
Image hosted by servimg.com
Image hosted by servimg.com
Image hosted by servimg.com
Image hosted by servimg.com

منقبة سايقة

كلمتين في الجون

المنقبات لازم يمنعوا من سواقة العربيات!. ليه؟. قولي ليه!. أقولك زي ما منعنا الكلام ف المحمول. والتدخين. وجلوس الطفل بجوار السائق أثناء القيادة. لازم نمنع المنقبات من سواقة العربيات لإنه ممكن ف أيتها لحظة النقاب ييجي على عيونهم أو على وشوشهم وف الوقت ده حتحصل الحوادث!. ولا إيه؟.

أحمد منتصر
في
شوال 1428

السبت، 27 أكتوبر 2007

تنبيه بشأن محل عصائر أشرف فرغلي بطنطا

كلمتين في الجون

يا جماعة أنا كنت واقف كالمعتاد بالليل من ساعتين تلاتة عند أشرف فرغلي الكائن عند تقاطع شارع علي مبارك مع شارع النادي وشفت منظر سيء جدا.
شفت عامل لابس الجاكت الأصفر بتاع أشرف فرغلي وكان داخل المحل وجايب من المخزن كوبيات بلاستيك. وفجأة الكوبيات دي وقعت منه عن باب المحل الخلفي. راحوا طلعوا جمّعوا الكوبيات دي ودخلوا بيها المحل تاني!.

أحمد منتصر
في
شوال 1428

إهمال بشع

كلمتين في الجون

للأسف كلية الحقوق جامعة طنطا كلية الجامعة هاملاها من زمان ولازم حد يتكلم عن الإهمال البشع فيها. فين النشاطات الطلابية؟. فين الرحلات إللي تبع الجامعة؟. فين شئون الطلبة عشان الطلبة يعملوا الكارنيهات ويدفعوا المصاريف؟.
كلية الحقوق كلية مصرية عريقة بقالها أكتر من تلاتين سنة وعيب إللي بيحصل فيها ده: بهدلة للطلبة بين تلات أماكن الكلية متقسمة عليهم. عدم تشطيب المدرج الجديد بسبرباي لسه وشكله مقرف جدا زي شقة بالطوب الأحمر. نقص الخدمات الترفيهية من رحلات ونشاطات فنية وكشافة وخلافه.
أقترح على عميد الكلية إعادة طلبة تالتة ورابعة من سبرباي إلى المجمع الطبي عشان يبقوا ع الأقل جنب شئون الطلبة. والإبقاء على طلبة تانية مع طلبة أولى ف كلية التربية بشارع البحر. والتكثيف من الخدمات الطلابية إللي أشرنا إليها آنفا لأنها معدومة تماما. وعيب أوي كده يا إدارة الجامعة.

أحمد منتصر
في
شوال 1428


الحلقة الثانية: قراءة هادئة في كتاب التوسل والوسيلة لابن تيمية

قراءة هادئة في كتاب التوسل والوسيلة لابن تيمية

الحلقة الثانية

فصل في المراد بالتوسل بالنبي
صلى الله عليه وسلم

يمضي الشيخ رحمه الله في مسيرته المباركة مبيّنا أن التوسل بالنبي صلى الله عليه وسلم يراد به أمران شرعيان فالأول هو التوسل بالإيمان به وبطاعته. والثاني هو دعاؤه وشفاعته.
قال رحمه الله: (ومن أنكر التوسل به بأحد هذين المعيين فهو كافر مرتد يستتاب. فإن تاب وإلا قتل مرتدا) انتهى.
قلت: كلامه رحمه الله فيه من الشدة ما فيه لما هو مناسب لعصره. ولكن الآن يجب الرفق بالناس فهذا أوان غربة الإسلام ولا حول ولا قوة إلا بالله.
وأما الأمر غير المشروع فهو التوسل بالموتى وذلك لما فيه من الجهل المركب المبين. قال رحمه الله: (وقد قال تعالى ]قل ادعوا الذين زعمتم من دونه فلا يملكون كشف الضر عنكم ولا تحويلا. أولئك الذين يدعون يبتغون إلى ربهم الوسيلة أيهم أقرب ويرجون رحمته ويخافون عذابه إن عذاب ربك كان محذورا[ سورة الإسراء: 56-57.
قال طائفة من السلف: كان أقوام يدعون الملائكة والأنبياء كالعزير والمسيح فبيّن الله تعالى أن الملائكة والأنبياء عباد الله. كما أن الذين يعبدونهم عباد الله. وبيّن أنهم يرجون رحمته ويخافون عذابه ويتقربون إليه كما يفعل سائر عباده الصالحين.
والمشركون من هؤلاء قد يقولون: إنا نستشفع بهم أي نطلب من الملائكة والأنبياء أن يشفعوا. فإن أتينا قبر أحد طلبنا منه أن يشفع لنا. فإذا صورنا تمثاله –والتماثيل إما مجسدة وإما مصورة كما يصورها النصارى في كنائسهم- قالوا: فمقصودنا بهذه التماثيل تذكّر أصحابها وسيرهم ونحن نخاطب هذه التماثيل ومقصودنا خطاب أصحابها ليشفعوا لنا إلى الله. فيقول أحدهم: يا سيدي فلانا أو يا سيدي جرجس أو بطرس أو يا ستي الحنونة (الصحيح لغويا الحنون لأن فعول تصلح للذكر والأنثى ولكن الشيخ هنا ينقل كلام العوام) مريم أو يا سيدي الخليل أو موسى بن عمران أو غير ذلك. اشفع لي إلى ربك)!.
وقال رحمه الله: (ويخالفون بذلك إجماع الصحابة والتابعين لهم بإحسان وسائر المسلمين. فإن أحدا منهم لم يطلب من النبي صلى الله عليه وسلم بعد موته أن يشفع له ولا سأله شيئا ولا ذكر ذلك أحد من الأئمة المسلمين في كتبهم) انتهى.
وقال رحمه الله: (ومن تعبد بعبادة ليست واجبة ولا مستحبة وهو يعتقدها واجبة أو مستحبة فهو ضال مبتدع بدعة سيئة لا بدعة حسنة باتفاق أئمة الدين) انتهى.
وقال رحمه الله: (ومن قال في بعض البدع إنها بدعة حسنة فإنما ذلك إذا قام دليل شرعي أنها مستحبة فأما ما ليس بمستحب ولا واجب فلا يقول أحد من المسلمين إنها (كذا) من الحسنات التي يتقرب بها إلى الله. ومن تقرب إلى الله بما ليس من الحسنات المأمور بها أمر إيجاب ولا استحباب فهو ضال متبع للشيطان وسبيله من سبل الشيطان) انتهى.
يقول رحمه الله: (قد عُلم بالاضطرار والتواتر من دين الإسلام وبإجماع سلف الأمة وأئمتها أن ذلك ليس بواجب ولا مستحب. وعُلم أنه لم يكن النبي صلى الله عليه وسلم ولا أحد من الأنبياء قبله شرعوا للناس أن يدعوا الملائكة والأنبياء والصالحين ويستشفعوا بهم لا بعد مماتهم ولا في مغيبهم فلا يقول أحد: يا ملائكة الله اشفعوا لي عند الله (!). سلوا الله أن ينصرنا أو يرزقنا أو يهدينا)! انتهى.
وقد حرّم النبي صلى الله عليه وسلم ما يفضي إلى الكفر. ففي صحيح مسلم عن جندب بن عبد الله أن النبي صلى الله عليه وسلم قال قبل أن يموت بخمس: (إن من كان قبلكم كانوا يتخذون القبور مساجد ألا فلا تتخذوا القبور مساجد فإني أنهاكم عن ذلك).
قال المحقق: رواه مسلم 532. وذكر جملة غيره.
وعن عائشة رضي الله عنها أن النبي صلى الله عليه وسلم قال قبل موته: (لعن الله اليهود والنصارى اتخذوا قبور أنبيائهم مساجد). يحذر ما فعلوا. قالت رضي الله عنها: ولولا ذلك لأبرز قبره. ولكن كره أن يُتخذ مسجدا.
قال المحقق: رواه البخاري 1390 و4441 ومسلم 529. وذكر جملة غيرهما.
قلت: (يُحذر) بتشديد الموحّدة -الذال ووصفت بالموحدة لأنها بنقطة واحدة- وكسرها.
قال رحمه الله: ( لمّا نهى عن اتخاذ قبور الأنبياء والصالحين مساجد. فنهى عن قصدها للصلاة عندها لئلا يفضي ذلك إلى دعائهم والسجود لهم. لأن دعاءهم والسجود لهم أعظم تحريما من اتخاذ قبورهم مساجد) انتهى.
وزيارة القبور صنفين: شرعية وبدعية فالزيارة الشرعية تذكر بالآخرة وهي كما قال رحمه الله: (أن يكون مقصود الزائر الدعاء للميت كما يقصد بالصلاة على جنازته الدعاء له) انتهى.
وقال رحمه الله: (وأما الزيارة البدعية فهي التي يقصد بها أن يطلب من الميت الحوائج أو يطلب منه الدعاء والشفاعة. أو يقصد الدعاء عند قبره لظن القاصد أن ذلك أجْوَب للدعاء) انتهى.
ثم ذكر جملة حكايات من تمثل الجن لبني آدم لفتنتهم.
فعن أبي هريرة رضي الله عنه أنه قال: قال رسول الله صلى الله عليه وسلم: (إن عِفريتا من الجن جاء يفتك بي البارحة ليقطع عليّ صلاتي فأمكنني الله عز وجل منه فذعتّه أردت أن آخذه فأربطه إلى سارية المسجد حتى تصبحوا فتنظروا إليه كلكم. ثم ذكرتُ قول سليمان ]رب اغفر لي وهَب لي ملكا لا ينبغي لأحد من بعدي[ فردّه الله تعالى خاسئا).
قال المحقق: رواه البخاري 461 ومسلم 541. وذكر جملة غيرهما.
قال رحمه الله: (فمنهم من عصمه الله وعرف أنه الشيطان كالشيخ عبد القادر في حكايته المشهورة حيث قال: كنت مرة في العبادة فرأيت عرشا عظيما وعليه نور. فقال لي: يا عبد القادر أنا ربك وقد حللت لك ما حرّمت على غيرك (!). قال: فقلت له: أأنت الذي لا إله إلا هو؟ اخسأ يا عدو الله. قال: فتمزق ذلك النور وصار ظلمة وقال: يا عبد القادر. نجوت مني بفقهك في دينك وعلمك وبمنازلاتك في أحوالك. لقد فتنتُ بهذه القصة سبعين رجلا. فقيل له: كيف علمت أن الشيطان؟. قال: بقوله لي (حللت لك ما حرّمت على غيرك) وقد علمت أن شريعة محمد صلى الله عليه وسلم لا تنسخ ولا تبدّل. ولأنه قال: أنا ربك. ولم يقدر أن يقول: أنا الله الذي لا إله إلا هو) انتهى.
قال رحمه الله: (والمقصود هنا أن من أعظم ضلال المشركين ما يرونه أو يسمعونه عند الأوثان كإخبار عن غائب أو أمر يتضمن قضاء حاجة ونحو ذلك. فإذا شاهد أحدهم القبر انشق وخرج منه شيخ بهيّ عانقه أو كلمه ظنّ أن ذلك هو النبي المقبور. والقبر لم ينشق وإنما الشيطان مثل له ذلك كما يمثل لأحدهم أن الحائط انشق وأنه خرج منه صورة إنسان. ويكون هو الشيطان تمثل له في صورة إنسان وأراه أنه خرج من الحائط) انتهى.
والأدلة في نقض الدعاء والتوسل بغير الله كثيرة منها:
قوله تعالى ]ما كان لبشر أن يؤتيه الله الكتاب والحكم والنبوة ثم يقول للناس كونوا عبادا لي من دون الله ولكن كونوا ربانيين بما كنتم تعلمون الكتاب وبما كنتم تدرسون. ولا يأمركم أن تتخذوا الملائكة والنبيين أربابا أيأمركم بالكفر بعد إذ أنتم مسلمون[ سورة آل عمران: 79-80.
وقوله صلى الله عليه وسلم لابن عباس رضي الله عنه في الحديث الشهير: (إذا سألت فسأل الله وإذا استعنت فاستعن بالله) وهو صحيح.
وعن النبي صلى الله عليه وسلم أنه قال: (يدخل من أمتي الجنة سبعون ألفا بغير حساب. وقال: هم الذين لا يسترقون ولا يكتوون ولا يتطيّرون وعلى ربهم يتوكلون).
قال المحقق: رواه البخاري 6541 ومسلم 220. وذكر جملة غيرهما.
قال رحمه الله: (وكانت عائشة إذا أرسلتْ إلى قوم بصدقة تقول للرسول: اسمع ما يدعون به لنا حتى ندعوا لهم بمثل ما دعوا لنا ويبقى أجرنا على الله) انتهى.
فانظر رحمك الله إلى الزهد فيما عند الناس حتى ولو كان دعاءً.
قال رحمه الله: (فكل من لم يعبد الله بعد مبعث محمد صلى الله عليه وسلم بما شرعه الله من واجب ومستحب فليس بمسلم) انتهى.
قلت: كلامه رحمه الله عسير على أهل عصرنا. والصواب أن نقول الآن: فكل من لم يعبد الله بعد مبعث محمد صلى الله عليه وسلم بما شرعه الله من واجب ومستحب فهو مخطىء.
قال رحمه الله كلاما نفيسا نختم به هذه الحلقة: (وأما سؤال الميت فليس بمشروع ولا واجب ولا مستحب بل ولا مباح. ولم يفعل هذا قط أحد من الصحابة والتابعين لهم بإحسان. ولا استحب ذلك أحد من سلف الأمة. لأن ذلك فيه مفسدة راجحة وليس فيه مصلحة راجحة. والشريعة إنما تأمر بالمصالح الخالصة أو الراجحة. وهذا ليس في مصلحة راجحة بل إما أن يكون مفسدة محضة أو مفسدة راجحة. وكلاهما غير مشروع) انتهى.

أحمد منتصر
في
شوال 1428

الأربعاء، 24 أكتوبر 2007

قحبة تنتقب

كلمتين في الجون

أكتر من واحد أكدلي إن واحدة شرشر كانت شرشر أوي يعني. وبعدين صورها انتشرت ع الموبايلات ف طنطا كلها. فعشان تخبي نفسها اتنقبت ويا دار ما دخلك شر!.
النقاب عند تفسيره نفسيا هو محاولة للهروب من شيء ما: اضطهاد. أو عقاب الرب. أو نظرات الناس. أو حتى من أجل التميز!. فالمنقبات ف مصر نصهم اتنقب مش تديّنا. لأ عشان هاربات من شيء ما.
النقاب رمز ديني لجماعة المفروض تبقى محظورة. ولا النظام بيحظر الإخوان بس عشان مصلحته وسايب السلفيين بيرتعوا ف مصر مفسدين ف الأرض؟. لازم وقفة. وبقترح منع المنتقبات من دخول الجامعات عشان الحفاظ على عقول بناتنا من الأفكار الهدامة.

أحمد منتصر
في
شوال 1428


ثلاثون عاما على المد السلفي في مصر

كلمتين في الجون

دعاة السلفية بينسوا إن التفكير السلفي دخل مصر فعليا في السبعينات ولحد دلوقتي مشوفناش مميزات له كرقي الدولة أو ارتفاع مستوى دخل الفرد أو زيادة الإنتاج القومي. شفنا مجرد مظاهر كاذبة دلالة على التدين كالنقاب أو إلغاء شخصية المرأة. وكاللحية والجلابية أو عودة عصر البداوة من تاني. وكالتزمت ورفض الآخر وعدم الاهتمام بالعلوم.
ساعات بقعد مع نفسي وأقول هو مينفعش نجمع ما بين الدنيا والدين؟. يعني مينفعش أسبح على نغمات الموسيقى الهادية؟. يعني مينفعش أأجل الصلاة شوية عشان أكمل الفيلم؟. مينفعش مصليش صلاة الوتر نهائيا من غير ما حد يديني كلمتين ف جنبي؟.
التفكير أي تفكير إن مكانش بيقدمنا يبقى أكيد بيرجعنا لورا. و30 سنة كفاية قوي على تفكير عقيم زي التفكير السلفي عشان نعرف عيوبه. ولا لازم نستنى 30 سنة كمان وساعتها حيكون العالم سبقنا 60 سنة؟!.

أحمد منتصر
في
رمضان 1428

شيطان اسمه حماس

كلمتين في الجون

للأسف هيا دي الحقيقة. أنا مش مع قادة فتح الحرامية طبعا لكن فكر فتح هو الأقرب إلى التفكير السليم. وتعالوا نشوف سوا تفكير حماس بقى عامل إزاي:
يقول الكاتب والباحث طلعت رضوان في مقالة له: (إسرائيل التي لا يعترف بها العروبيون (من العروبة) والأصوليون المسلمون ويحلمون بإبادتها تركت للفلسطينيين مهمة تصفية بعضهم البعض لتتفرغ للعلوم وتطبيقاتها ووصل الأمر إلى درجة مشاركتها في مشروع الجينوم البشري وفي نقل الرائحة عن طريق الكمبيوتر. بل إنها زودت طائرات الحلفاء في حملة البلقان بأنظمة توجيه كمبيوترية. وتشارك في شبكة الردع الصاروخي. وبينما العرب والأصوليون الإسلاميون يحلمون بهداية الأمريكان والأوروبيين للدخول في الإسلام وتصدير المصاحف نجد أن السلطة الأفغانية بعد رحيل طالبان تتصل بإسرائيل وتقدم لها طلبين رسميين للحصول على مساعدات إسرائيلية في مجالي الطب والزراعة.
لقد آمن الفلسطينيون أعضاء حماس بأن الوطن مفهوم وثني فكان من بين أهدافهم المقدسة وهم يحاربون الفلسطينيين الكفرة أعضاء فتح إنزال الأعلام الفلسطينية وهذا الفعل إنذار لكل الأنظمة التي مولت ودعمت كل تنظيم يعتمد المرجعية الدينية ويرفض مفهوم الوطن. إنذار يقول إن الزحف المقدس قادم لإقامة إمارات إسلامية كما إن إنزال الأعلام الوطنية درس لكل الأحزاب والكتاب الذين غازلوا التنظيمات ذات المرجعية الدينية. هذا إذا كان الإنذار سيجد من يسمعه والدرس سيجد من يفهمه) انتهى كلامه.
مش عارف أقول إيه؟ الراجل قال كل حاجة!.

أحمد منتصر
في
رمضان 1428

زوايا خربة في الشخصية السلفية

كلمتين في الجون

شخصية السلفي بيبقى فيها عيوب كتيرة. منها الانطواء والخجل. وعدم التعامل مع الجنس الآخر واحتقاره. والاستهتار بالعمل وفي العمل عشان كده أرباب العمل بيخافوا يشغلوا سلفيين عندهم. وأخيرا ومش آخرا عدم تقبل الآخر.
والسلفي قبل ما بيبقى سلفي بتبقى عنده الصفات ديا أو هو كده أصلا. ودايما تلاقيه بيستند إلى القرآن والسنة والمشايخ لحد لما يبقى رجل آلي مبيتحركش إلا بفتوى يا عيني. ويفتقر الإنسان السلفي إلى التفكير الإبداعي تماما لإنه مقلد لأئمته.
ولو حاول السلفي التغيير من نفسه حيصطدم ولا بد بمنهجه الغريب المتناقض مع الواقع. يعني مثلا واحد سلفي عايز ياخد دورات في الإنجليش ف الجامعة الأمريكية مش حيقدر يقول بهجر المخالفين له ف الحالادي!.

أحمد منتصر
في
رمضان 1428

حكمة الرئيس

كلمتين في الجون

كنت بفكر في الصراع العربي الإسرائيلي ولما حاولت الكتابة عن الموضوع اتضحت لي ميزة من مميزات مبارك وهيا إنه بقاله زمن بيدعو لحل نهائي للصراع يتعايش فيه العرب والإسرائيليين ويا بعض. هو صحيح حل فانتازي في ظل رؤية الإسرائيليين لينا كجنس أقل منهم مكانة لكن محدش ينكر إن تفكيرنا فيهم كده برضه!.
علينا إدراك الواقع والمتغيرات. والإسرائيليين خلاص سكنوا الأرض دي ومعدش ينفع نقول دي مش أرضهم. طب ما هما كانوا في سينا كاحتلال فلما رجعت لينا رجعوا كسياحة!. يعني كده كده يا جماعة الناس دول مش حيبرحوا الأرض دي إلا على جثثهم فلازم نتقبلهم حقنا للدماء.
وكحلول تدريجية علينا الزواج من بعض. وفتح الحدود ما بينا. وضم إسرائيل إلى أية منظمة إقليمية ولو حتى تفصيل عشانها. وتدويل مدينة القدس زي الفاتيكان كده. وتعليم العبرية في المدارس العربية. وتعليم العربية في المدارس الإسرائيلية. وإعادة النظر في المناهج الدراسية إللي حشيت قبل كده بثوابت ميّعتها المتغيرات. والأهم من ده كله الإشادة بحكمة الرئيس!.

أحمد منتصر
في
رمضان 1428

الخطورة السياسية للدعوة السلفية

كلمتين في الجون

هيّ إن السلفيين عايزين يخلوا مصر زي السعودية وده فيه تصدير لقومية أخرى بلا أدنى تعقل ولو سألت أي سلفي وقلتله نفسك مصر تبقى زي مين؟. حيقولك نفسي تبقى زي السعودية!.
القمصان القصيرة واللحى المنتفخة والعبايات السعودية الصرفة كل ده مش من لبس المصريين. طبعا المصريين أغلبهم مسلمين محدش يقدر يقول حاجة لكن الخوف إننا ننسى مصريتنا وننجرف وننسى تاريخنا بدعوى التدين.
لذلك مش مستبعد السلفيين لما يمسكوا الحكم يدخلوا تحت ولاية آل سعود. أو على الأقل يتنحوا عن الحكم بدعوى إنهم طلاب آخرة مش دنيا للي بلا أية خبرة سياسية مسبقة.
من الآخر السلفيين بينفروا الناس من المشاركة السياسية وهما عارفين إن الوصول للحكم هو أقرب طريق لفرض أفكارهم.. فاحذروا يا أولي الألباب!.

أحمد منتصر
في
رمضان 1428

تدين سلبي

كلمتين في الجون

من ساعة كنت متفق مع واحد نتقابل. صحيت بدري صليت وتأنقت ونزلت. ولما وصلت المكان إللي هو محدده ملقتهوش. اتصلت بيه مردش. اتصلت بعد شوية قاللي معلش الراجل أخر الصلاة في المسجد فتأخرت.
وده منتشر أوي الأيام دي. إن كتير من الناس بيعملوا حاجات من سيما المتدينين علشان يقنعوا نفسهم إنهم متدينين. ويتهربوا من المسئوليات المنوطة بهم في الحياة.
استنيت كمان وبعدين اتصلت. يا بني إنت فين؟. اكتشفت إنه في منطقة تانية أساسا وجاي في تاكسي!.

أحمد منتصر
في
رمضان 1428

تطبيق الدين

كلمتين في الجون

الليلة كنا مجموعة من الشباب نتحدث. وتطرق الحديث إلى الاختلاط. وهنا انبرى شاب يحاربه ويمنعه ويقول: أنا لو واحد صاحبي الروح بالروح عمري ما أخليه يكلم مراتي!. ويكلمها ليه؟ ويقعد معاها ليه أصلا؟.
وقال التاني: النبي حذر من الحمو. وقال: الحمو الموت. والحمو ده هو أخ الزوج على فكرة فما بالك بصاحبه؟.
فقال المعتدل: يا جماعة إحنا زمان مكناش كده. وكان جدي وجدتك بيقعدوا مع جيرانهم وأصحابهم عادي خالص.
دخلت أنا في آخر الحوار قائلا: تفكير سلفي!.
قال التاني: يعني تفكير الصحابة كان غلط؟.
قلت في حزم: ياعم إنت بتطبق الدين في الحاجات إللي على مزاجك؟. يعني لو جاتلك شغلانة مرتبها حلو ف بنك -والبنوك لا تجوز- حترفض؟. طبعا حتروح هوا!. مش حتقولي قال الرسول!.

أحمد منتصر
في
رمضان 1428

حكومة بنت كلب

كلمتين في الجون

لما عامل يشتغل 11 ساعة يوميا بلا إجازات وياخد دولار ونص ف اليوم تبقى الحكومة بنت كلب!.
لما كرامة المصري تمتهن عيني عينك ويسجن ابن بلدي ويتشتم ويضرب بالجزمة جوه البلد وبراها تبقى حكومتي بنت كلب!.
لما شاب ميعرفش يتجوز قبل سن التلاتين وميعرفش يشتري شقة وميعرفش يخلف عيال براحته تبقى الحكومة بنت كلب!.
لما أصحاب المواهب يكبتوا. ويمنعوا. عشان معندهمش واسطة أو معارضين للحكومة تبقى إيه؟ تبقى حكومة بنت كلب!.
لما الحكومة تبقى مليانة على تمة عينها رجال أعمال معاهم فلوس زي الرز وتلاقي شحات واحد ف الشارع تبقى حكومة بنت ستين كلب!.
لمّا أروح بقى أأكل الكلب إللي فوق السطح ده أصله بيهوهو!.

أحمد منتصر
في
شعبان 1428

مريم بتعرف تلعب

كلمتين في الجون

رهف الصغيرة رجعت البيت مع باباها قلقانة. مالك يا رهف؟. أصل يا بابي المس ف الكلاس قالتلي متقعديش كتير مع مريم. قلتلها ليه يا مس؟. قالتلي عشان مسيحية!. هو يعني إيه يا بابي مسيحية؟.
- إنتي كنتي بتعملي إيه مع مريم يا رهف؟.
- كنا بنلعب ف الحوش!.
- طيب مريم بتعرف تلعب ولا مبتعرفش؟.
في اليوم التاني لما رهف شافت المس جريت عليها وقالتلها: مريم بتعرف تلعب!.

أحمد منتصر
في
شعبان 1428

صفر

كلمتين في الجون

الصفر إللي خدته مصر ف مسابقة تنظيم مونديال 2010 درس لازم نعيد دراسته. الحكومة الهبلة ضحكت علينا وقالتلنا إنها تقدر تقف ف وجه جنوب أفريقيا وتنظم المونديال ويلا يا مصريين وأحلى هبل ف الجبل.
وطبعا إللي حصل إننا خدنا صفر عبارة عن كحكة كبيرة مدوّرة. الحكومة شغلتنا شوية. وإحنا صدقنا وعيشنا الدور. وإللي يغيظك إننا كنا مصدقين إننا عندنا إمكانيات تنظيمية كبيرة بينما لجنة المسابقة إدتنا صفر بحاله يعني مفيش أي حاجة عندنا.
وكذلك الزمان بيدور. والحال لا يتغير ولا يتبدل. الحكومة بتضحك علينا عن طريق الأرقام المطاطية. قال إيه معدل النمو الاقتصادي ارتفع. ولما نصدق ده نفاجأ إن ولا في نمو اقتصادي ولا حاجة لأنه كالعادة صفر.

أحمد منتصر
في
شوال 1428


تجربة نبيلة

كلمتين في الجون

بضايق لما بشوف ابن بلدي بيرمي زبالته ف الشارع كده عيني عينك ولو بص قدامه حيلاقي سلة زبالة. ليه كده يا شباب دحنا جدودنا عملوا حضارة عظيمة؟ والتصرف ده بيدل على استهتارنا بيها وبقيمتها.
ف الصين عملوا تجربة نبيلة: الشباب جمّع نفسه ف فرق تطوعية وبدؤا ف جمع زبالة سور الصين العظيم. ووالله شفت صورة بنت صينية لابسة شيك وأمورة ما شاء الله ماسكة كيس أخضر وبتلم الزبالة. شباب زي الورد مصر عايزه شباب زيه ينهضوا بيها.
ف رأيي الاستهتار هو إللي ورا عادة رمي الزبالة ف الشارع. والعامل التاني هو قلة سلال الزبالة ف الشوارع. الاستهتار قلنا الحل بتاعه آنفا. أما سلال الزبالة فممكن أي شركة كبيرة تعمل سلال زبالة عليها الشعار بتاعها كدعاية أو كل محل يعمل جنبه سلة حلوة كده يدخلها المحل لما ييجي يقفل بالليل.

أحمد منتصر
في
شوال 1428

أزبل كلية ف طنطا

كلمتين في الجون

أزبل كلية ف طنطا هيا كلية الحقوق. طلبة كلية الحقوق جامعة طنطا يا جماعة مقسمين على مكانين بعاد عن بعض!. أولى وتانية ف كلية التربية الكائنة بشارع البحر بطنطا. وعلى بعد أكتر من اتنين كيلو متر تالتة ورابعة ف سبرباي ودي منطقة خارج مدينة طنطا إداريا أساسا!.
أما شئون الطلبة بتاعة حقوق طنطا فدي مكانها مش معروف لأغلب الطلبة. ولكن أقوى رواية بتقول إنها ف المجمع الطبي بطنطا وده مكان ما بين كلية التربية وسبرباي!!.
آخر مسخرة وآخر هبل كلية متقسمة على تلات أجزاء والمفروض إنها كلية من أعرق كليات الحقوق ف مصر كلها.

أحمد منتصر
في
شوال 1428

عودة الخريف

كلمتين في الجون

http://www.yallagam3a.net/artdisp.asp?artid=768
من الواضح إن طلاب الإخوان المسلمين لسه عايشين ف القرون الخالية. على اللينك إللي حطيته موقع يلا جامعة بيشتكي إن أحد أعضاء هيئة التدريس ف جامعة طنطا كلية التجارة استنكر قعاد طلبة سنة أولى المستجدين صفتين صفة ولاد وصفة بنات!.
أنا كمان بستنكر بجوار الدكتور الموقر القرف ده. يعني بعد المكاسب الحضارية إللي كسبتها مصر والمرأة ف العصر الحديث حنرجع تاني نقول بالفصل ما بين الجنسين ونضيق ع الشباب كمان وكمان؟.
يا طلبة الإخوان المسلمين في حاجات أهم من الكلام ده وأهم من السياسة إللي إنتوا مش فالحين فيها أساسا. حث الأغنياء على الزكاة والتصدق على الفقراء أحسن ميت ألف مرة من الكلام إللي بتقولوه ده. ومازالت الحرب مستمرة للنهوض بمصر.

أحمد منتصر
في
شوال 1428

الاثنين، 22 أكتوبر 2007

السلفيون الجدد

كلمتين في الجون

من الحاجات إللي ثبتت خطورتها بمرور الأيام تحفيظ السلفيين القرآن للأطفال الصغار. وده بيخلي الطفل لما يكبر يبقى الدين عنده من المنظور السلفي هو الفهم الصحيح للإسلام.
الخطورة جامدة جدا لإن الأمن سايب الحبل على الغارب للسلفيين ف النقطادي. فتلاقي المسجد الصغير مليان على تمة عينه بسلفيين مستقبليين.
عشان كده لازم الأمن يضرب بيد من حديد على هذه التجمعات الموبوءة بالأفكار الهدّامة للمجتمع المصري. وإتاحة الفرصة لحفظ القرآن لدى المؤسسات الدينية القومية.

أحمد منتصر
في
شوال 1428

الأحد، 21 أكتوبر 2007

موقع اكتب ينتهك حرية الرأي

كلمتين في الجون

من شوية كنت بنشر كالعادة مقالة من كلمتين في الجون على مدونتي على أحد المواقع العربية للتدوين. والسبب في اختياري للموقع ده هو دعم أي مواقع عربية ف المقام الأول.
لكن بعد نشرها وف نفس اليوم فوجئت بمسحها!. وتم إنذاري بما أن مدونتي (مليئة بالإسفاف ومقالتي خصوصا تسخر من الإسلام)!!. وطبعا ده آخر تهريج.
الموقع مش يد الله في النت. يمسح ما يشاء ويبقي ما يشاء. والسلفية زي أي مذهب فكري قابل للنقد وأؤكد على انتفاء الصواب المطلق عند أي مذهب فكري عموما. الأمر خطير يا جماعة والموقع إللي عمل كده هو موقع اكتب دوت كوم
www.ektob.com ودي ف نظري سابقة خطيرة وانتهاك أخطر لحرية الرأي.

أحمد منتصر
في
شوال 1428


الحلقة الأولى: قراءة هادئة في كتاب التوسل والوسيلة لابن تيمية

قراءة هادئة في كتاب التوسل والوسيلة
لابن تيمية

الحلقة الأولى

مقدمة

بعد الحمد لله والصلاة والسلام على رسوله ومصطفاه. فإن كتاب (قاعدة جليلة في التوسل والوسيلة) لابن تيمية رحمه الله من أنفس الكتب الإسلامية في العقيدة على مذهب أهل السنة والجماعة. أتقن فيه ابن تيمية العرض والتمحيص كعادته بكلمات سهلة ومادة جزلة.
وها نحن نقدمه على حلقات باختصار مخل للغاية للتنبيه إلى كثير من المسائل التي تعرّض لها الكتاب ويثيرها منبهين على عدم جواز استئثار الجماعة السلفية بكتب شيخ الإسلام رحمه الله ذلك أننا وإن اختلفنا عند التطبيق لن نكون إلا مسلمين على منهج أهل السنة والجماعة رحمهم الله وحشرنا في زمرتهم في الآخرة أجمعين. آمين.

مقام النبي الكريم
صلى الله عليه وسلم

يؤصّل ابنُ تيمية في هذه المقدمة قاعدة جليلة ألا وهي مصدر التحليل والتحريم فيقول: (فالحلال ما حلله الله ورسوله والحرام ما حرمه الله ورسوله والدين ما شرعه الله ورسوله) انتهى.
ثم يؤصّل لقاعدة لا تقل أهمية ألا وهي وجوب اتباع النبي صلى الله عليه وسلم والتوسل بذلك: (والإيمان به ومتابعته هو سبيل الله وهو دين الله وهو عبادة الله وهو طاعة الله وهو طريق أولياء الله وهو الوسيلة التي أمر الله بها عباده في قوله ]يا أيها الذين آمنوا اتقوا الله وابتغوا إليه الوسيلة[ سورة المائدة: 35) انتهى.
ثم أكد على مكانة النبي صلى الله عليه وسلم بقوله: (ومحمد صلى الله عليه وسلم أعظم جاها من جميع الأنبياء والمرسلين) انتهى.
ثم نبّه على مسألة مهمة ألا وهي استئثار المسلمين بشفاعة النبي صلى الله عليه وسلم في الآخرة فقال: (ولكن الكفار يتفاضلون في الكفر كما يتفاضل أهل الإيمان في الإيمان. قال تعالى: ]إنما النسيء زيادة في الكفر[ سورة التوبة: 37. فإذا كان في الكفار من خف كفره بسبب نصرته ومعونته فإنه تنفعه شفاعته في تخفيف العذاب عنه لا في إسقاط العذاب بالكلية) انتهى.
مثلما حدث لأبي طالب عم النبي صلى الله عليه وسلم لمّا شفع النبي صلى الله عليه وسلم فيه فخُفف من عذابه والأحاديث في الكتاب بالتفصيل.
ويجب التنبيه على أنه في الدنيا يجب معاملة أهل الكتاب اليهود والنصارى معاملة أفضل من معاملة الكفرة الأصراف كالملحدين وعبدة الأوثان. فهم بالجملة يؤمنون بالله وبملائكته وإن لم تخل عقائدهم من النظر.
يمضي ابن تيمية رحمه الله في إثبات عدم انتفاع الكفرة بشفاعة النبي صلى الله عليه وسلم فيقول: (ففي صحيح مسلم عن أبي هريرة أن النبي صلى الله عليه وسلم قال: (استأذنت ربي أن أستغفر لأمي فلم يأذن لي واستأذنته أن أزور قبرها فأذن لي). انتهى.
قال المحقق: رواه مسلم 976. وذكر جملة غيره.
وفيه عدم جواز الاستشفاع بأم النبي صلى الله عليه وسلم وتقديسها كما تفعل الصوفية لأنها كافرة.
يقول ابن تيمية: (وثبت عن أنس في الصحيح أن رجلا قال: يا رسول الله أين أبي؟ قال: في النار. فلما قفل دعاه فقال: إن أبي وأباك في النار) انتهى.
قال المحقق: رواه مسلم 203. وذكر جملة غيره.
وقد أنبأ النبي صلى الله عليه وسلم قريش كلها الأقربين منهم له والأبعدين على أنه لن يغني عنهم من الله شيئا إن لم يؤمنوا ولا يملك لهم من الله شيئا.
ثم قال رحمه الله كلاما مهما جدا: (وأما شفاعته ودعاؤه للمؤمنين فهي نافعة في الدنيا والدين باتفاق المسلمين وكذلك شفاعته للمؤمنين يوم القيامة في زيادة الثواب ورفع الدرجات متفق عليها بين المسلمين وقد قيل إن بعض أهل البدع ينكرها. وأما شفاعته لأهل الذنوب من أمته فمتفق عليها بين الصحابة والتابعين بإحسان وسائر أئمة المسلمين الأربعة وغيرهم وأنكرها كثير من أهل البدع من الخوارج والمعتزلة والزيدية). انتهى.
والزيدية من طوائف الشيعة وإن كانوا معتدلين عنهم. وبالنسبة لإنكار الشفاعة لأهل المعاصي من المؤمنين فمن منكريها في عصرنا الحديث الدكتور مصطفى محمود في كتابه الشفاعة منذ سنوات.
واستطرد رحمه الله: (وقال هؤلاء: من يدخل النار لا يخرج منها بشفاعة ولا غيرها وعند هؤلاء ما ثمّ إلا من يدخل الجنة فلا يدخل النار ومن يدخل النار فلا يدخل الجنة ولا يجتمع عندهم في الشخص الواحد ثواب وعقاب). انتهى.
وهذا خطأ كبير ففي الحياة الدنيا يوجد المؤمن الذي يصلي ويقوم بأركان الإسلام ولكنه يزني أو يسرق فهذا اجتمعت فيه خصال إيمانية وخصال لا إيمانية فلا يستوي بمن لم يجمع من الإيمان شيئا البتة أو من هو أقل منه في الإيمان.
وفي هذا الأمر نكتة أدبية: ذلك أنّ الخير الصرف لا يوجد إلا بقدر والشر الصرف لا يوجد إلا بقدر. والغالب في بني آدم أنهم لا بأخيار ولا بأشرار أصراف. بل يغلب على الإنسان الجمع بين خصال الخير والشر. لذلك كانت الشخصيات الأدبية الصرفة في خير أو شر أقرب إلى الشخصيات الهزلية والتي ينبغي على الأديب اجتنابها في أعماله الجادة.
وبالعودة إلى موضوعنا فإنه قد ثبت أن النبي صلى الله عليه وسلم يشفع في كثير ممن دخل النار من أمته من أهل التوحيد الذين غلبت سيئاتهم حسناتهم.
وأولا وأخيرا فلا شفاعة بغير إذن الله سبحانه وتعالى الذي قال: ]مَنْ ذا الذي يشفع عنده إلا بإذنه[ سورة البقرة 225.
ولا شفاعة للمشركين عند الله سبحانه وتعالى لذلك أثبت سبحانه تلكم القاعدة في القرآن قائلا: ]قلْ ادعُوا الذين زعمتم من دون الله لا يملكون مثقال ذرة في السموات ولا في الأرض وما لهم فيهما من شرك وما لهم منهم من ظهير. ولا تنفع الشفاعة عندَه إلا لمن أذن له[ سورة سبأ: 22-23.
قال ابن تيمية رحمه الله: (فالمشركون كانوا يتخذون من دون الله شفعاء من الملائكة والأنبياء والصالحين ويصورون تماثيلهم فيستشفعون بها ويقولون: هؤلاء خواص الله فنحن نتوسل إلى الله بدعائهم وعبادتهم ليشفعوا لنا. كما يُتوسَل على الملوك بخواصهم لكونهم أقرب إلى الملوك من غيرهم فيشفعون عند الملوك بغير إذن الملوك وقد يشفع أحدهم عند الملك فيما لا يختاره فيحتاج إلى إجابة شفاعته رغبة ورهبة) انتهى.
وقد أطال شيخ الإسلام رحمه الله في الكتاب في المسألة السابقة ولا مجال هنا لبسطها.
قال رحمه الله: (هذه أبطلها النبي صلى الله عليه وسلم وحسم مادتها وسد ذريعتها حتى لعن من اتخذ قبور الأنبياء والصالحين مساجدَ يصلى فيها وإن كان المصلي فيها لا يستشفع بهم. ونهى عن الصلاة إلى القبور. وأرسل علي بن أبي طالب فأمره أن لا يدع قبرا مُشرفا إلا سوّاه ولا تمثالا إلا طمسه ومحاه. ولعن المصوّرين). انتهى.
ما قاله رحمه الله ثبت عن النبي صلى الله عليه وسلم بلا خلاف. ولكنّ الخلاف في تأويل هذه النصوص. في قوله (ولعن المصوّرين) أقول: التصوير أصناف: فهناك التماثيل المجسّمة وهذه لا تجوز بالاتفاق. وهناك الرسومات فإن كانت لذي روح لم تجز. وإن كانت لغير ذلك جازت. وكذلك تأخذ نفس حكمها الصور الفوتوغرافية على خلاف بين العلماء المعاصرين بشرط ألا تعلّق..فإن علقت لم تجز بالاتفاق.

أحمد منتصر
في
رمضان 1428